Tsurinkuna y paykunapita aywaraqkuna imanö kayänanpä kanqantapis Jacob willanqan
49
Tsaypitanami llapan tsurinkunata qayaykur Jacob nirqan: “Ñöpäman llapayki witiyämuy. Waray warantin imanö kayänaykipä kanqantami kanan willayäshayki.2 “Llapayki witiykamur ninqäta wiyayay.
3 Rubén, qammi mayor tsurï kaykanki.
Chölullarä kaykaptïmi qam yurirqayki.
Llapan wawqikikunami respitayäshurqayki.
Paykunapita mas munayyuqmi karqayki.
4 Mayu atskayaptin tsapayta mana kamäpakunqannömi qamtapis jutsa rurayta munaptiki tsapayta kamäpakuyäshunkitsu.
Concubïna warmïwan punurmi penqakuyman churamashqayki.†
Tsaymi mayor derëchuykita oqrashqayki.
5 “Simeónwan Levími tanta pakishqanö kayan.
Paykunami runakunata cuchilluwan wanutsiyarqan.
6 Pasaypa rabyarmi runakunata wanutsiyarqan.†
Asikuyänan raykuqmi törukunapa ankunta roquyarqan.
Tsaymi paykuna qorikäyanqanchöqa qorikaytapis munätsu.
7 Paykuna ajanäyanqan pasaypa mana allimi karqan.
Paykunapita aywaraqkunatami destinä Israel nacioncho mashtakashqa täyänanpä.
8 “Judá, qampita aywaraqkunatami llapan Israel mayinkuna kuyayanqa.
Chikiqninkunataqa munayninmanmi churayanqa.
Llapan Israel mayinkunapis respitarmi ñöpanman qonqurikuyanqa.
9 Hïju, malta león uywata tsariqnömi kaykanki.
Uywata tsarinanpä patsaman lätakaykuq leonnömi kaykanki.
Mantsaypä kaptiki ¿pirä ichikllatapis wajupäshunkiman?†
10 Judá castallapitami reykuna imaypis kayanqa.
Manami pipis rey kayninta qechunqatsu.
Tsaynö kanqa llapanpä munayyuq rey chämunqanyaqmi.
Tsay reytami maytsay nación runakuna cäsukuyanqa.
11 Tsay witsanmi üvapis pasaypa wayunqa.
Tsaymi üva yurallamanna ashnunkunatapis watayanqa.
Vïnupis latsapanta taqshananpänörämi atska kanqa.
12 Tsaytsika üva kaptinmi runakunapa ñawinkunapis vïnupita mas yanarä kanqa.
Tsaytsika lichi kaptinmi kirunkunapis lichipita mas yuraqrä kanqa.
13 “Zabulónpita aywaraqkunami lamar kuchunkunacho täyanqa.
Büquikuna chäkuyänan y yarqukuyänanchömi markankunapis kanqa.
Lindërunkunapis Sidónwan tinkuqyaqmi kanqa.†
14 “Isacarpita aywaraqkunami corralcho kaykaq kallpasapa ashnunö kayanqa.
15 Täyanqan markankunapis täkuy munaymi kanqa.
Tsaymi qepita apayänanpäpis waqtankunata kamapäyanqa.
Wätay karpis kushishqallami kawayanqa.
16 “Danpita aywaraqkunami wakin Israel trïbukunanö trïbun runakunata mandayanqa.
17 Tsaynöllami näni ñöpancho maya maya pakaraykaq culebranö kayanqa.
Paykunami cawallupa chakinta kanir muntaqninta jitatsiqnö kayanqa.
18 Tayta Dios, ¡qamllamanmi yärakü salvamänaykipä!
19 “Gadpita aywaraqkunatami tsaytsika soldädukuna atacayanqa.
Tsaynö atacayaptinpis kikinkunatami qatikachäyanqa.
20 “Aserpita aywaraqkuna täyanqanchöqa mikuypis atskami kanqa.
Tsaymi rey mikunqannö imaypis alli allillata mikuyanqa.
21 “Neftalípita aywaraqkunami munanqanpa lluytsunö puriyanqa.
Kuyayllapä wawankunata qeshpitsiq lluytsunömi kayanqa.
22 “Josépita aywaraqkunami yaku kuchuncho wiñamuq jachanö kayanqa.
Paykunami atska wayuq jachanö kayanqa.
Lloqlluyparä jacha wiñar pirqa jananpa lätaqnömi kayanqa.
23 Paykunatami pasaypa chikir flëchankunawan atacayanqa.
Tsaynöllami imaypis ajanätsiyanqa.
24 Tsaynö kaptinpis Josépita aywaraqkunapa rikrankuna pasaypa kallpasapami kayanqa.
Flëchananpä flëchakunantapis chachakmi aptaräyanqa.
Tsaynö kallpasapa kayanqa llapanpä munayyuq Tayta Dios yanapaptinmi.
Paymi Israel runakunata mitsir munayninwan imapitapis tsapan.
25 Yärakunqä Tayta Dios yanapaykulläshuy.
Llapanpä munayyuq Tayta Dios ciëlupita patsa bendicionninta churaykallämutsun.
Patsa rurinpita yakutapis pashtaykatsillämutsun.
Wamraykikuna y uywaykikuna atska kayänanpä bendicionninta churaykallämutsun.
26 Taytäpita bendicionta chaskinqäpita mastami qamman bendicionnïta churamü.
Kay bendicionqa jirkakuna imaypis mana ushakaq kanqannömi qampä y qampita aywaraqkunapä imaypis kanqa.
Qamtaqa wawqikikunapitami Tayta Dios akrashurqayki.†
27 “Benjamínpita aywaraqkunami mantsaypä löbunö kayanqa.
Tsarinqan uywata tutalla mikuqnömi kayanqa.
Tardipanami soldädu mayinkunata aypunqa”.
28 Tsaynö nirmi tsurinkunaman Jacob bendicionta churarqan. Chunka ishkay tsurinkunapita aywaraqkunami Israel runakuna chunka ishkay trïbukuna kayan.
Jacob wanunqan
29 Tsaypitanami tsurinkunata Jacob nirqan: “Unay castäkunawan tinkuq aywakunäpänami kaykä. Wanukuptï taytäwan awilü pamparanqanman apaykamar pampayämanki. Paykunami heteo runa Efrónpa chakran machaycho pamparaykäyan. 30 Tsay machayqa Canaáncho Mamripa wak tsimpan Macpelachömi kaykan. Tsay machaytami chakrantinta Efrón runapita awilü Abraham rantirqan castankunawan pampakuyänanpä.† 31 Tsaychömi pamparaykan awilü Abraham, awilä Sara, taytä Isaac† y mamä Rebecapis. Warmï Leatapis tsaymanmi pamparqä. 32 Tsay machaytami chakrantinta heteo runakunapita awilü rantirqan”.
33 Tsurinkunata yätsiskirmi cämanman chachaykur Jacob wanuskirqan.†