Jacobta pampayanqan
50
Taytan wanuskiptinmi José marqakurkur waqarnin mutsarqan. 2 Nirkurnami makincho kaykaq mëdicukunata José nirqan taytanpa ayanta chukrutsiyänanpä.a José ninqannöllami mëdicukuna rurayarqan. 3 Imaypis chukrutsiyanqannömi mëdicukuna chusku chunka (40) junaq Israelpa ayanta chukrutsiyarqan. Jacobtami Egipto runakunapis qanchis chunka (70) junaq lütuyarqan.4 Lütuyta ushaskirnami Faraónpa palaciuncho mandashiqninkunata José nirqan: “Qamkunawan alli kaykaptïqa kaynö nir Faraónta rugapaykayällämay: 5 ‘Josépa taytan manarä wanurshi Diosninpa jutincho juratsinä Canaánman apaykur kikin uchkunqan sepultüranman pampananpä.† Tsayshi kachaykunki taytanta pampaq aywananpä. Pampaskirnashi raslla kutikamunqa’ ”.
6 José rugakunqanta willayaptinmi Faraón nirqan: “Taytanta awninqannölla aywar pampamutsun”.
7 Tsaynö niptinmi taytanta pampaq José aywarqan. Paywanmi aywayarqan Faraónta palaciuncho mandashiq runakuna, Israel mayor runakuna y Egiptucho wakin mandashiqkunapis. 8 Tsaynöllami Josépa tsurinkuna, willkankuna, wawqinkuna y llapan castankuna pampaq aywayarqan. Gosénchöqa uywakunawan wamrakunallami quëdayarqan. 9 Tsaymi Joséta aywashir atska runakuna carrëtankunawan y cawallunkunawan aywayarqan.
10 Jordán mayu tsimpancho Goren-ha-atad pampaman chaykurnami pasaypa llakikur waqayarqan. Josépis qanchis junaq pasaypa llakikurmi taytanta lütur waqarqan. 11 Tsaynö lütuyanqanta rikarmi tsaycho taq cananeo runakuna niyarqan: “Egipto runakunami pasaypa waqar lütuykäyan”.
Tsaynö waqayanqanpitami tsay partita Abel-Mizraimb niyan. Tsayqa kaykan Jordán mayu tsimpanchömi.
12 Jacobpa tsurinkunaqa llapantapis rurayarqan taytan mañakunqannöllami. 13 Tsaymi Canaánman apaykur Macpelacho kaykaq machayman pampayarqan. Tsayllaman llapan castankunawan pampakuyänanpämi tsay machayta chakrantinta heteo casta Efrón runapita Abraham rantishqa karqan. Tsay chakrami Mamre wak tsimpancho kaykan.† 14 Taytanta pampaskirnami llapan wawqinkunawan y aywashiq runakunawan Egiptuman José kutikurqan.
Wawqinkuna mana mantsariyänanpä José ninqan
15 Jacob wanuskiptinnami Josépa wawqinkuna pasaypa mantsarir kikinkunapura parlar niyarqan: “Chikinqantsikpitami kananqa José chikimäshun”.
16 Tsaymi juk wawqinta kachayarqan Joséta ninanpä: “Taytantsik manarä wanurmi qamta willayänäpä niyämarqan: 17 ‘Hïju, ñöpata wawqikikuna mana tantiyakuypa chikiyäshunqaykipita perdonaykullay’. Taytantsik ninqannöllami noqakunapis rugakuyä mana alli rikayanqäpita perdonaykayämänaykipä. Noqakunapis taytantsik yärakunqan Tayta Diosmanmi yärakuyä”.
Tsaynö niyanqanta willaptinmi José waqarqan.
18 José kaqman wawqinkuna chaykurmi pasaypa mantsarir ñöpanman lätakaykur niyarqan: “Kananqa qampa wätaynikikunami kayä”.
19 Tsaymi José nirqan: “Ama mantsariyaytsu. Noqa manami Diostsu kaykä pitapis juzganäpä. 20 Qamkuna chikiyämar rantikayämashqa kayaptikipis Tayta Diosmi allipä kamakätsishqa. Tsaymi rikanqantsiknöpis muchuycho runakuna wanuyashqatsu. 21 Tsaynö kaykaptinqa ama mantsariyaytsu. Noqami mikuyta kamaripäyäshayki kikikikunapä y tsurikikunapäpis”.
Tsaynö alli shimillanpa parlaparmi wawqinkunata tantiyatsirqan mana mantsariyänanpä.
José wanunqan
22 Joséqa llapan wawqinkunawanmi Egiptucho tarqan. Payqa kawarqan juk pachak chunka (110) watayuq kanqanyaqmi. 23 Tsaymi tsurin Efraínpa shurukta willkantapis rikarqanrä. Tsaynöllami Manaséspa tsurin Maquirpa tsurinkuna yuriptin Joséman apapäyarqan wamrannö kananpä.
24 Tsaypita juk kutichönami wawqinkunata José nirqan: “Noqaqa wanukushänami. Wanukuptïpis kay nacionpita yarquyänaykipä Tayta Diosmi yanapayäshunki. Nirkurmi pushayäshunki Abrahamta, Isaacta y Jacobta rikatsinqan Canaánman”.
25 Tsaymi llapan wawqinkunata Tayta Diospa jutincho juratsirnin José nirqan: “Canaánman kutiyänaykipä Tayta Dios shamurmi yanapayäshunki. Kaypita aywakurqa tullükunatapis apakurkuyanki”.†
26 Juk pachak chunka (110) watayuq kaykarmi Egiptucho José wanurqan. Wanuskiptinnami Josépa ayanta mëdicukuna chukruskatsir cajonman wiñayarqan.