Josépa tsurinkunaman bendicionta Jacob churanqan
48
Tsaypita manarä unaytami Joséta willayarqan taytan qeshyaykanqanta. Tsaymi rikaq aywarqan tsurinkuna Manasésta y Efraínta pushakurkur. 2 José chanqanta willayaptinmi ujuraykanqanpita imaykanöpa Israel jamarkurqan.3 Tsaymi Joséta nirqan: “Dios El-Shaddaimia yuripämarqan Canaáncho kaykaq Luz markacho. Tsaycho bendisamarmi 4 nimarqan: ‘Qammanmi bendicionnïta churamushä tsurikikuna atska kayänanpä. Tsaynöllami atska nacionkuna kayänanpä tsurikikunamanpis, willkaykikunamanpis y paykunapita aywaraqkunamanpis bendicionnïta churashä. Paykunatami Canaánta rikatsishä imayyaqpis tsaycho täyänanpä’ ”.†
5 Tsaynö niskirnami Jacob nirqan: “Kay Egiptuman manarä chämuptï yuriq tsurikikunami noqapäna kayanqa. Tsaymi Rubén y Simeón tsurïkuna kayanqannö Efraín y Manaséspis tsurïkunanö kayanqa. 6 Paykunapa qepanman yuriqkunami qampa tsurikikuna kayanqa. Tsaymi Canaánman kutiyaptiki Efraín y Manasés herenciata chaskiyanqan kaqcho paykunapis herenciata chaskiyanqa. 7 Tsay tsurikikunami legïtimu tsurïnö kayanqa mamayki Raquel Canaáncho wanushqa kaptin. Paymi wanurqan Padan-arampita kutimur Efrata markaman tsayrä chaykaptï. Tsaymi payta pamparqä Efrataman aywana näni kuchullanman”.† (Efrataqa Belén markami.)
8 Tsaynö nikanqanchömi Josépa tsurinkunata rikaykur Israel tapurqan: “¿Pikunatä paykuna kaykäyan?”
9 Tsaymi José nirqan: “Papä, kay Egiptucho taykaptï Tayta Dios qaramanqan tsurïkunami kaykäyan”.
Taytannami nirqan: “Ñöpäman wititsimuy bendicionnïta churanäpä”.
10 Israel pasaypa awkinna karmi shumaq rikarqantsu. Tsaymi taytanpa ñöpanman tsurinkunata José witiykatsiptin makallakurkur mutsarqan. 11 Josétanami nirqan: “Hïju, wanushqana kanqaykita yarparmi tinkunäpä kanqanta yarparqänatsu. Tsaynö yarpaptïpis Tayta Diosmi munashqa tsurikikunatapis rikanätarä”.
12 Tsurinkunata taytanpa qonqurninpita José witiskatsirnami taytanpa ñöpanman qonqurikurqan urkunpis patsaman töpanqanyaq. 13 Shäriskirnami tsurin Efraínta churarqan taytan Israelpa itsuqninman y Manaséstanami churarqan derëchanman. 14 Tsaynö witiykatsiptinmi bendisananpä paykunapa umanman makinta cruzaypa Israel churarqan. Tsaymi derëcha makinta churarqan Efraínpa umanman, qepa kaykaptinpis. Itsuq makintanami Manaséspa umanman churarqan, mayor kaykaptinpis. 15 Nirkurnami Joséman y ishkan willkankunaman bendicionninta churar nirqan:
“Awilü Abraham y taytä Isaac yärakunqan Tayta Dios, qammi yurinqäpita patsa alli mitsikuqnö rikamashqayki.
16 Qammi imayka desgraciapita tsapämaq Ángel kaykanki.
Kanan kay cholïtukunaman bendicionnikita churaykullay.
Paykuna alli kawaykuyätsun noqata, awilü Abrahamta y taytä Isaacta runakuna imaypis yarpäyämänanpä.
Efraínpa y Manaséspa tsurinkunapis atska kaykuyällätsun.
Paykunapita aywaraqkunapis kay patsacho tsaytsika kaykuyällätsun”.
17 Efraínpa umanman derëcha makinta taytan churanqanqa Josépä manami allitsu karqan. Tsaymi taytanpa derëcha makinta tsarirkur Manaséspa umanman José churarqan. 18 Tsaynami nirqan: “Papä, ama tsaynöqa ruraytsu. Kay kaqmi mayor tsurï kaykan. Paypa umanman derëcha makikitaqa churaykullay”.
19 Tsaynö niptinnami taytan nirqan: “Noqapis musyaykämi mayor mayqan kanqanta. Mayor kaqpis atskaman mirar jatun nacionmi kanqa. Tsaynö kaptinpis qepa kaqmi mas munayyuq kanqa. Paypita aywaraqkunami tsaytsika nacionkuna kayanqa”.
20 Tsay junaq ishkan willkankunaman bendicionninta churarmi nirqan: “Israel runakuna pimanpis bendicionta churarmi niyanqa: ‘Efraínta y Manasésta yanapanqannölla qamkunatapis Tayta Dios yanapaykuyäshuy’ ”.
Tsaynömi Efraínta churarqan mayornö kananpä y Manaséstana qepanö kananpä.†
21 Nirkurnami Joséta nirqan: “Hïju, rikamanqaykinöpis wanukunäpänami kaykä. Noqa wanukuptïpis Tayta Diosqa qamkunawanmi imaypis kaykanqa. Tsaynöllami kutitsiyäshunki awiluyki Isaacwan taytan Abraham tanqan kaqman. 22 Qamtami wawqikikunapita masta herenciäta rikatsishqä. Tsaymi Siquem chakrakunatapis rikatsï. Tsay chakrakunatami amorreo runakunata espädäwan y flëchäwan vincirnin qechurqä”.