Salmo 104 (103)
Tayta Dios kamanqankunapita alabanqan
1 Tayta Diostami llapan shonqüwan alabashä.
Tayta Dios, llapanpä munayyuqmi kaykanki.
Qamqa chipipiypa chipipir latsapashqanömi kaykanki.
2 Chipipiynikiwanmi imayka latsapawannöpis tsapakunki.
Jatun säbanastanömi ciëlutapis mashtamushqayki.†
3 Ciëlucho kaq yaku jananchömi wayikitapis shäritsishqayki.
Pukutaytapis guërra carrëtaykimanmi tikratsinki.
Wayra jananchömi maypapis aywanki.†
4 Wayrapis willakuqnikimi kaykan.†
Lunyaypa lunyar rupaykaq ninapis sirvishuqnikimi kaykan.
5 Cimientuta ruraykurmi patsatapis jamatsishqayki.
Jamatsinqaykipitaqa manami imaypis kuyukuntsu.
6 Imayka latsapawannömi lamarwan tsaparkushqayki.
Altunnin jirkakunatapis yakuwanmi tsaparkushqayki.
7 Ollqutupaptikimi tsaparaq yaku juklla aywakurqan.
Maqakuynörä jinchi parlaptikimi witikurqan.
8 Tsaymi jirkakunapis raqrakunapis yuriyarqan.
Qam ninqaykichömi rikakuyarqan.
9 Patsaman yaku yapay mana juntananpämi señalarqayki.
Tsay señalanqaykipitaqa manami päsantsu.†
10 Qam niptikimi jirkakunapita pukyukunapis pashtamur raqrakunapa yaku aywan.
11 Tsay yakutami munti uywakunapis upuyan.
Munti ashnukunapis yakunarmi tsaykunapita upuyan.
12 Mayukuna kuchunchömi pishqukunapis qeshunkunata rurayan.
Jachakunapa llimllankunachömi rezakur cantayan.
13 Qammi ciëlucho kaykaq wayikipita patsa jirkakunata qarpanki.
Tamyawanmi allpatapis ushmatsinki.
14 Uywakunapämi qewatapis wiñatsimunki.
Mikuyta cosechananpämi runa murunqantapis wiñatsimunki.
15 Vïnutapis kamaripankimi upur kushikunanpä,
aceititapis kamaripankimi qaqllanman llushikuptin chipipïnanpä
y mikuytapis kamaripankimi kallpan kananpä.
16 Líbanucho kaykaq cedru jachakunapis qampami kaykan.
Yaku kanqancho karmi raprasapa wiñayan.†
17 Llimllankunachömi pishqukunapis qeshunkunata rurayan.
Cigüeñakunapis tsay jachakunachömi täyan.
18 Jirkakunachöpis munti cabrakunami kaykäyan.
Qaqakunachöpis tejonkunami pakakuyan.
19 Killatapis junaqkunata musyayänäpämi kamarqayki.
Rupaypis musyanmi imay höra jeqarpunanpä kanqanta.†
20 Patsa tardiyaptinqa tsakaskatsinkimi.
Tsakaypanami munti uywakuna punukuyänanpita yarqayämun.
21 Leonkunapis mikuyänanpä uywata ashirmi qayaräyan.
Qamtami mañakuyäshunki uywata taritsinaykipä.
22 Patsa waraptinqa punukunanmanmi kutikuyan.
Junaqpaqa machayninkunachömi punukuyan.
23 Runakunanami aruyninkunaman aywayan.
Tsaychömi höra chämunqanyaq qoyat aruyan.
24 Tayta Dios, imaykatapis qammi kamashqayki.
Llapantapis shumaq tantiyaykurmi kamashqayki.
Kay patsachöqa kamanqaykikuna maytsaychömi kaykan.
25 Lamarpis jatunkaray y anchumi kaykan.
Tsaychömi jatusaqpis y takshapis tsaytsika uywakuna kaykäyan.
26 Lamar jananpami büquikunapis aywayan.
Lamarchömi jatunkaray mantsaypä Leviatán waräkuypis kaykan.
Tsay uywataqa pukllanaykipämi kamashqayki.†
27 Llapan uywakunami qamta shuyäyäshunki hörallancho mikuyta qaranaykipä.
28 Qaraptikimi mikuyänanpä qorikuyan.
Bendicionnikiwanmi pacha junta mikuyan.
29 Mana kamaripaptikiqa pasaypami turbatäyan.
Jamayninta tsapaskiptikiqa wanurmi allpaman tikrayan.
30 Mirayänanta munaptikiqa pasaypami mirayan.†
Tsaynöpami yapay kay patsaman juntayan.
31 ¡Tayta Dios imayyaqpis alabashqa kaykullätsun!
¡Kamanqanta rikar Tayta Dios kushikutsun!
32 Pay rikaskiptinqa patsapis mantsarir tsuktsukyanmi.
Yataykuptinqa jirkakunapis qoshtatäyanmi.
33 Kawanqäyaqqa salmukunata cantarmi Tayta Diosta alabashä.†
34 Yarpachakunqäpis Tayta Diospa shonqunpänö kaykullätsun.
Paypa makincho karmi imaypis kushikü.
35 Jutsa ruraqkuna kay patsacho ushakäyätsun.
Mana alli runakuna llapanpis illakäyätsun.
Llapan shonqüwanmi Tayta Diosta alabashä.
¡Aleluya!