Salmo 105 (104)
Kuyanqan runakunata Tayta Dios alli rikanqan
1 ¡Tayta Diosta agradëcikuyay!
¡Paypa jutinta joqariyay!
Llapan ruranqanta maytsay nacionchöpis willakuyay.
2 Salmukunata cantar alabayay.
Mantsakaypä ruranqankunata willakuyay.
3 Tayta Diosta ashiqkuna, llapan shonquykikunawan payta alabayay.
Japallan santu Dios kanqanpita kushikuyay.
4 Munayyuq Tayta Diosta imaypis ashiyay.
Yanapashunaykipä payta imaypis mañakuyay.
5 Mantsakaypä ruranqan milagrukunata yarpäyay.
Contrantsikkunata imanö vincinqanta ama qonqäyaytsu.
6 Tayta Diosta sirviq Abrahampita aywaraqkuna, tsaykunata yarparäyay.
Akranqan Jacobpita aywaraqkuna, llapan ruranqankunata ama qonqäyaytsu.
7 Paymi noqantsikpa Tayta Diosnintsik.
Kay entëru patsachömi munanqanta ruran.
8 Pactu ruranqanta manami imaypis qonqantsu.
Juk waranqa (1,000) generación päsaptinpis yarparaykanmi.
9 Tsay pactutaqa Abrahamwanmi rurarqan.†
Jurarmi Isaactapis awnirqan.†
10 Imaypis cumplinanpämi Jacobta y paypita aywaraq Israel runakunatapis awnirqan.
11 Awnirmi nirqan:
“Canaántami rikatsiyäshayki herenciaykikuna kananpä”.†
12 Tsay witsanqa Israel runakuna wallkaqllami kayarqan.
Jäpa nacioncho yupashqallami kayarqan.
13 Paykunami nacionnin nacionnin y markan markan puriyarqan.
14 Tsaynö puriyaptinpis pipis ñakatsinanta Tayta Dios manami munarqantsu.
Tsaymi reykunata castigar nirqan:
15 “Akranqä runakunata ¡paqtä pillapis yataykunman!
Profëtäkunatapis ¡paqtä pillapis yataykunman!”†
16 Tayta Diosmi paykuna täyanqan nacioncho muchuy kananpä kamakätsirqan.
Tsaymi mikuyänanpä imapis karqantsu.†
17 Muchuypita salvananpämi paykunapa puntanta Egiptuman Joséta kacharqan.
Wätay kananpä wawqinkuna rantikuyaptinmi tsayman charqan.†
18 Egipto runakunami Josépa chakinta cadënawan watarätsiyarqan.
Kunkapitami fiërru cadënawan watarätsiyarqan.
19 Tsaychömi wichqararqan suëñunqankuna cumplinqanyaq.
Tsaynöpami rasun kaqta suëñunqanta Tayta Dios runakunata tantiyatsirqan.†
20 Tsaypitanami tsay nacionpa mandaqnin rey carcelpita jipitsimurqan.†
21 Jipiskatsirmi palaciunta y llapan imaykantapis shumaq rikananpä churarqan.†
22 Tsaynöpis churarqan mandashiqninkunata y mayor runakunata shumaq yätsinanpämi.
23 Tsaypitanami Israel runakuna Egiptuman aywakuyarqan.
Tsaynöpami Cam partichoa tsurinkunawan Jacob tarqan.†
24 Tayta Diospa bendicionninwanmi atskaqman mirayarqan.
Egipto runakunapitapis mas atskaqmi kayarqan.
25 Tsaymi Egipto runakunata yarpayta Tayta Dios qorqan Israel runakunapa contran shäriyänanpä.
Tsaynöpami Tayta Diosta sirviq runakunata ñakatsiyarqan.†
26 Tsaypitami Tayta Dios kacharqan sirviqnin Moisésta y akranqan Aarónta.†
27 Tayta Diospa munayninwanmi Cam particho mantsakaypä kaqkunata rurayarqan.
28 Tsaymi tsay nacioncho pasaypa tsakätsirqan.
Tsaynö kaptinpis Egipto runakunaqa Moisés ninqanta manami cäsukuyarqantsu.†
29 Yawarmanmi mayukunatapis Tayta Dios tikratsirqan.
Pescädukunapis chipyaqmi wanur ushakäyarqan.†
30 Entëru nacionmanmi säpukuna juntayarqan.
Reypa palaciunmanpis juntayarqanmi.†
31 Tayta Dios mandaptinmi upukurukunapis y chuspikunapis entëru Egiptuman juntarqan.†
32 Tamyapa trokinmi runtu tamyata tamyatsimurqan.
Tsay entëru nacionmanmi maqakuyta pashtatsimurqan.
33 Tsay runtu tamyami üva jachakunatapis hïgus yurakunatapis tullullantana dëjaykurqan.
Egiptucho llapan jachakunatami rapraynaqllatana dëjaykurqan.†
34 Tayta Dios mandaptinmi imaykaläya chukllushkunapis tsayman juntayarqan.
Yupaytapis mana atipaypämi tsaytsika kayarqan.
35 Llapan qewakunatapis ushayarqanmi.
Chakracho mikuynintapis chipyaqmi ushayarqan.†
36 Egipto runakunapa llapan mayor tsurinkunatapis Tayta Diosmi wanutsirqan.†
37 Atska qoriyuqta y atska qellayyuqtami kuyanqan runakunata jipimurqan.
Yarqayämuptin manami pipis tsapata churaparqantsu.
38 Egipto runakuna pasaypa mantsakashqa kaykarmi aywakuyaptin kushikuyarqan.†
39 Israel runakunata llantupänanpämi pukutayta Tayta Dios kamariparqan.†
Paqaspa atsikyapänanpämi lunyaykaq ninata kamariparqan.
40 Aytsata mañakuyaptinnami codornizkunata yuritsirqan.
Pacha junta mikuyänanpämi ciëlupita mikuytapis kamaripämurqan.†
41 Upuyänanpämi yakutapis qaqapita pashtatsimurqan.
Tsaymi tsunyaq jirkapa atska yaku aywarqan.†
42 Tsaynömi sirviqnin Abrahamta awninqanta cumplir Israel runakunata Tayta Dios yanaparqan.
43 Egiptupitami kuyanqan runakunata jipimurqan.
Jipimuptinmi pasaypa kushishqa yarqayämurqan.
44 Paykunatami jäpa runakunapa markankunata Tayta Dios rikatsirqan.
Jäpa runakunapa imaykantapis paykunatami qoykurqan.†
45 Tsaynö qoykurqan estatütunkunata y leyninkunata cäsukuyänanpämi.
¡Aleluya!