Salmo 106 (105)
Israel runakuna mana cäsukuq kayanqan
1 ¡Aleluya!
Allillata ruraq kanqanpita Tayta Diosta agradëcikuyay.
Kuyakuq kayninqa imaypis manami ushakantsu.†
2 Milagrukunata ruranqanpita willakurpis ¿pirä shumaq tantiyatsinman?
Mayjina alabarpis ¿pirä shumaq alabanman?
3 Kushishqami kawayanqa Tayta Dios munanqannö kawaqkuna.
Paykunaqa imaypis allillatami rurayan.
4 Tayta Dios, kuyanqayki Israel mayïkunata yanapar noqatapis yarpaykallämay.
Shamur noqatapis salvaykallämay.
5 Tsaynöpami akranqayki runakuna alli kawaykäyaqta rikashä.
Paykuna kushikuyanqannömi noqapis kushikushä.
Paykuna alabayäshunqaykinömi noqapis alabashayki.
6 Unay castäkunanöllami noqakunapis jutsata rurayashqä.
Paykunanöllami llutanta rurayashqä.
7 Unay castäkunaqa Egiptucho mantsakaypä ruranqaykita rikaykarpis manami cäsukuyäshurqaykitsu.
Kuyapar tsayjinanpa yanapanqaykitapis manami yarpäyarqantsu.
Tsaymi Puka Lamarman chaykur contrayki shäriyarqan.†
8 Kuyakuq karmi tsaynö kaykäyaptinpis paykunata salvarqayki.
Llapanpä munayyuq kanqaykita tantiyatsiyta munarmi tsaynö salvarqayki.†
9 Tsaymi ollqutupaskiptiki Puka Lamar tsakiskirqan.
Tsaypami tsakillapana päsatsirqayki.
10 Tsaynöpami contrankunapa y chikiqninkunapa makinpita salvarqayki.
11 Yaku tsapaptinmi llapan chikiqninkuna ushakäyarqan.
Manami ni jukllayllapis kawaykar quëdayarqantsu.
12 Salvaptikimi kuyanqayki runakuna awninqaykita criyiyarqan.†
Kushikuypita cantarmi alabayäshurqayki.†
13 Tsaynö mantsakaypä ruranqaykikunata yapaymi qonqaskiyarqan.
Tantiyatsinqaykitapis manami cäsukuyarqantsu.
14 Tsunyaq jirkachömi munayanqanta ruratsiyta munar tentayäshurqayki.
15 Tsaynö ajätsiyäshuptikipis munayanqantami kamariparqayki.
Wakintaqa pestiwanmi ushakätsirqayki.†
16 Campamentuchöpis Moiséspa contranmi shäriyarqan.
Akranqayki Aarónpa contranmi rikakuyarqan.
17 Tsaymi patsa kichakar Datánta ultaskirqan.
Abiramta y qatiraqninkunatapis patsami tsapaskirqan.
18 Lunyaypa lunyar nina tsarirmi wakin qatiraqninkunatapis usharqan.†
Tsay mana alli runakunatami nina rupar usharqan.
19 Horeb jirkachönami qorita fundirkur becërruta rurayarqan.
Qonqurikuykurmi tsay ïduluta adorayarqan.
20 Llapanpä munayyuq kanqaykita musyaykarmi qewa mikuq töru niraqta ruraykur adorayarqan.†
21 Tsaynö karmi Egiptucho mantsakaypä kaqkunata rurar salvaqnin kaykaptikipis qonqäyäshurqayki.
22 Qonqäyäshurqaykimi mana criyiypä kaqkunata Egiptucho ruraykaptikipis.
Qonqäyäshurqaykimi Puka Lamarcho mantsakaypä kaqkunata ruraykaptikipis.
23 Tsaynö kayaptinmi pasaypa ajar paykunata chipyaq ushakätsiyta munarqayki.
Qam ajaptikimi paykunapa janan shärir Moisés rugakushurqayki.
Tsaymi ajanayniki qallquptin paykunata ushakätsirqaykinatsu.†
24 Kuyayllapä nacionman pushaptikipis manami yaykuyta munayarqantsu.
Tsay nacionta rikatsinaykipä awninqaykitapis manami criyiyarqantsu.
25 Ninqaykita mana cäsukurmi toldunkuna rurincho contrayki parlayarqan.
26 Tsaymi jurar nirqayki tsunyaq jirkallacho wanur ushakäyänanpä kanqanta.†
27 Paykunapita aywaraqkunata juklä nacionkunaman qarqunaykipämi nirqayki.†
28 Tsaynöpis Baal-peor ïdulutami adorayarqan.
Mana rasunpa kaq dioskunapä sacrificiu ruranqantami mikuyarqan.
29 Tsaynö llutanta rurarmi pasaypa ajanätsiyäshurqayki.
Tsaymi pesti qeshyawan wakinta ushakätsirqayki.
30 Tsay junaqmi sacerdöti Finees aywar jutsayuq runata wanutsirqan.
Tsayrämi pesti qeshya illakarqan.
31 Tsaynö ruranqanpitami awnirqayki paypita aywaraqkuna imayyaqpis sacerdöti kayänanpä.†
32 Meriba yaku kaqchöpis ajanätsiyäshurqaykimi.
Paykuna achäquimi Moisésta nirqayki awninqayki nacionman mana yaykunanpä.
33 Tsay runakuna ajanätsiyaptinmi mana yarpachakuypa llutanta Moisés parlarqan.†
34 Awninqayki nacionman paykuna yaykur markakunata ushakätsiyänanpä niptikipis manami ushakätsiyarqantsu.
35 Ushakätsiyänanpa trokinmi tsaycho taq runakunawan takukar mana alli costumbrinkunata yachakuyarqan.
36 Tsaymi tsay runakunapa ïdulunkunata adorar sirviyarqan.
Tsaynö adorayanqanpitami pasaypa desgracia tsarirqan.†
37 Supaykunata adorarmi ollqu tsurinkunatapis y warmi tsurinkunatapis rupatsiyarqan.†
38 Jutsaynaq kaykäyaptinpis tsaynömi wanutsiyarqan.
Tsaynö wanutsiyarqan cananeo runakuna adorayanqan ïdulukunapä sacrificiuta rupatsirmi.
Tsaynöpami nacionnin maldicionashqa rikakurqan.†
39 Mana allikunata tsaynö rurarmi pasaypa melanaypä impüru rikakuyarqan.
40 Tsaymi kuyanqayki runakunapä pasaypa ajarqayki.
Paykunataqa rikaytapis manami munarqaykitsu.
41 Contran nacionkunapa makinmanmi kachariykurqayki.
Chikiqninkunaqa munayanqantami ruratsiyarqan.
42 Makincho kayaptinnami contrankunaqa penqakuyman churar ñakatsiyarqan.
43 Kuyanqayki runakunataqa atska kutimi salvarqayki.
Salvaykaptikimi contrayki shäriyarqan.
Jutsata rurarmi llutan rurayman churakäyarqan.
44 Tsaynö kaykäyaptinpis ñakayanqanta rikar y mañakuyäshunqaykita wiyarmi kuyaparqayki.
45 Paykunawan pactu ruranqaykitami yarpaskirqayki.
Pasaypa kuyakuq karmi castigarqaykinatsu.
46 Tsaymi chikiqninkuna kuyapäyänanpä tantiyatsirqayki.†
47 Tayta Diosllä, salvaykayällämay.
Karu nacionkunacho mashtakashqa kayanqäpita qoriykayällämay.
Tsaynöpami santu jutikita joqarir kushishqa alabayäshayki.
Pasaypa kushikurmi qamta alabayäshayki.
48 ¡Israel runakunata kuyaq Tayta Dios imayyaqpis alabashqa kaykullätsun!
Pïmay runakunapis “¡amén!” niyällätsun.
¡Aleluya!†