Libru 5
Salmo 107—150
Salmo 107 (106)
Ñakaykäyanqanpita Tayta Dios jipinqan
1 Allillata ruraq kanqanpita Tayta Diosta agradëcikuyay.
Kuyakuq kayninqa imaypis manami ushakantsu.†
2 Salvashqa kaqkuna, Tayta Dios salvanqanta willakuyätsun.
Chikiqninkunapa makinpita jipinqanta willakuyätsun.
3 Nortiläpitapis, surläpitapis, rupay yarqamunanläpitapis y rupay jeqananläpitapis Tayta Dios qorimunqankuna payta alabayätsun.
4 Wakinkunaqa markaman aywaq nänita mana tarirmi tsunyaq jirkacho oqrakashqa puriyarqan.
5 Pasaypa mallaqar y yakunarmi wanuytana rikaykäyarqan.
6 Llakikur Tayta Diosta mañakuyaptinmi ñakaykäyanqanpita salvarqan.
7 Alli nänipa pusharmi täyänanpä kaq markaman chätsirqan.
8 ¡Kuyapäkuq kanqanpita Tayta Diosta agradëcikuyätsun!
¡Noqantsik raykuq mantsakaypä kaqkunata ruranqanpita päkillä niyätsun!
9 Paymi pasaypa yakunaqkunata yakuta kamaripan.
Pasaypa mallaqaqkunatami mikuyta kamaripan.
10 Wakinkunaqa pasaypa llakikuychömi kawayarqan.
Carcelcho wichqaraykaqnömi kayarqan.
11 Poderyuq Tayta Dios ninqankunata mana cäsukuyanqanpitami tsaynö kayarqan.
Tayta Dios yätsinqantapis manami chaskikuyarqantsu.
12 Tsaymi Tayta Dios churarqan ñakar aruyänanpä.
Pasaypa ñakayaptinpis manami pipis yanaparqantsu.
13 Llakikur Tayta Diosta mañakuyaptinmi ñakaykäyanqanpita salvarqan.
14 Wanushqanö y cadinashqanö kaykäyaptinmi jipimurqan.
15 ¡Kuyapäkuq kanqanpita Tayta Diosta agradëcikuyätsun!
¡Noqantsik raykuq mantsakaypä kaqkunata ruranqanpita päkillä niyätsun!
16 Bronci punkukunatapis paymi pakir usharqan.
Fiërru trancakunatapis paymi ushakätsirqan.
17 Wakinkunaqa mana cäsukuq kayanqanpitami pasaypa ñakayarqan.
18 Mikuytapis shonqunkuna pasaypami melanarqan.
Wanuypis janankunachönami karqan.
19 Llakikur Tayta Diosta mañakuyaptinmi ñakaykäyanqanpita salvarqan.
20 Tayta Dios nimuptinmi paykuna alliyäyarqan.
Wanuyänanpä kaykäyaptinmi alliyätsirqan.
21 ¡Kuyapäkuq kanqanpita Tayta Diosta agradëcikuyätsun!
¡Noqantsik raykuq mantsakaypä kaqkunata ruranqanpita päkillä niyätsun!
22 Tayta Diosta agradëcikur sacrificiuta rupatsiyätsun.
Allikunata ruranqanpita kushishqa willakuyätsun.
23 Wakinkunaqa juklä nacionkunapami negociunkunata büquiwan apayaq.
24 Lamar chawpincho kaykarmi Tayta Dios mantsakaypä ruranqanta rikayarqan.
25 Tayta Dios mandaptinmi pasaypa shukukuy wayra qallaykurqan.
Lamarpis altutarämi shärirqan.
26 Altuyaq lamar pulchaqyaptinmi büquinkunapis jundikäyänanpäna kaykäyarqan.
Kawayänanpä kanqantapis manami criyiyarqannatsu.
27 Machashqanö karmi ichiytapis ni puriytapis kamäpakuyarqantsu.
Manijayta yachaq kanqanpis manakaqllapämi karqan.
28 Llakikur Tayta Diosta mañakuyaptinmi ñakaykäyanqanpita salvarqan.
29 Shukukuy wayrata Tayta Dios wiyätsiptinmi yakupis pulchaqyarqannatsu.
30 Yaku pulchaqyar wiyaskiptinnami kushikuyarqan.
Büquikuna chäyänanpä kanqanmanmi Tayta Dios chätsirqan.
31 ¡Kuyapäkuq kanqanpita Tayta Diosta agradëcikuyätsun!
¡Noqantsik raykuq mantsakaypä kaqkunata ruranqanpita päkillä niyätsun!
32 ¡Yärakuq mayinkunawan qorikaykur alabayätsun!
¡Mayor runakuna qorikäyanqanchöpis alabayätsun!
33 Tayta Diosmi mayukunatapis pukyukunatapis tsakitsin.
34 Runakuna jutsata rurayaptinmi alli chakrakunatapis qachpayätsin.
35 Tsunyaq jirkakunatapis sinigamanmi tikraratsin.
Tsaki chakrakunachöpis pukyukunatami pashtatsimun.†
36 Markankunata shäritsiyänanpämi tsay chakrakunaman muchuycho kaqkunata churan.
37 Chakrata kichaskirnami üvata plantayan.
Cosecharpis atskatami cosechayan.
38 Tayta Diospa bendicionninwanmi atskaman mirayan.
Uywankunapis atskamanmi mirayan.
39 Chikiqninkuna paykunata wanutsir wallkayätsiyaptinmi 40 tsay wanutsiqninkunata Tayta Dios castigan.
Castigaptinmi tsay contrankunaqa tsunyaq jirkapa oqrakashqa puriyan.†
41 Muchuqkunatami itsanqa mana llakikuyänanpä Tayta Dios yanapan.
Paykunapa tsurinkunapis atskaman mirayänanpämi bendicionninta churan.
Üsha atskaman mirayanqannömi paykunapis atskaman mirayan.
42 Bendicionninta churanqanta rikarmi alli runakuna kushikuyan.
Mana alli runakunami itsanqa ima niytapis kamäpakuyantsu.
43 Pipis tantiyakuq karqa tsaykunata tantiyakutsun.
Tsaynöpami cuentata qokuyanqa Tayta Dios kuyakuq kanqanta.