16
Tayta Diospa babulninta aparmi chätsiyarqan David ruratsinqan tolduman. Tsayman churaykurnami uywakunata David pishtaskatsir rupatsina sacrificiuta y alli päsakuy sacrificiutapis Tayta Diospa ñöpancho rupatsirqan.a 2 Rupatsiyta ushaskirmi Israel mayinkunapä Tayta Diosta mañakur Davidqa Diospa jutincho bendisarqan. 3 Nirkurmi ollqutapis warmitapis llapan Israel runakunata aypurqan juk tantata, pedäzu aytsata y päsasyuq juk biscöchutapis.4 Levitakunatami David churarqan Tayta Diospa babulnin kaqcho Israel runakunata kuyaq Tayta Diosta mañakuyänanpä, agradëcikuyänanpä y alabayänanpä. 5 Paykunapa mandaqnin Asafmi platïlluta tukaq karqan. Asafpa yanapaqninmi karqan Zacarías. Tsaypitanami kayarqan Jeiel, Semiramot, Jehiel, Matatías, Eliab, Benaía, Obed-edom y Jeiel. Paykunaqa salteriukunata y arpakunatami tukayaq. 6 Sacerdötikuna Benaía y Jahazielnami Tayta Diospa Pactu Babulnin ñöpacho cornëtakunata imaypis tukayaq.
Tayta Diosta agradëcikur David alabanqan
7 Babulta chätsiyanqan junaqmi Asafta y yanapaqninkunata David churarqan kay cantuta cantatsiyänanpä:
8 “¡Tayta Diosta agradëcikuyay!
¡Paypa jutinta joqariyay!
Llapan ruranqanta maytsay nacionchöpis willakuyay.
9 Salmukunata cantar alabayay.
Mantsakaypä ruranqankunata willakuyay.
10 “Tayta Diosta ashiqkuna, llapan shonquykikunawan payta alabayay.
Japallan santu Dios kanqanpita kushikuyay.
11 Munayyuq Tayta Diosta imaypis ashiyay.
Yanapashunaykipä payta imaypis mañakuyay.
12 Mantsakaypä ruranqan milagrukunata yarpäyay.
Paypa mandamientunkunata ama qonqäyaytsu.
13 Tayta Diosta sirviq Israelpita aywaraqkuna, tsaykunata yarparäyay.
Akranqan Jacobpita aywaraqkuna, llapan ruranqankunata ama qonqäyaytsu.
14 “Paymi noqantsikpa Tayta Diosnintsik.
Kay entëru patsachömi munanqanta ruran.
15 Payqa pactu ruranqanta manami imaypis qonqantsu.
Juk waranqa (1,000) generación päsaptinpis yarparaykanmi.
16 Tsay pactutaqa Abrahamwanmi rurarqan.†
Jurarmi Isaactapis awnirqan.†
17 Imaypis cumplinanpämi Jacobta y paypita aywaraq Israel runakunatapis awnirqan.
18 Awnirmi nirqan:
‘Canaántami rikatsiyäshayki herenciaykikuna kananpä’.†
19 “Tsay witsanqa Israel runakuna wallkaqllami kayarqan.
Jäpa nacioncho yupashqallami kayarqan.
20 Paykunami nacionnin nacionnin y markan markan puriyarqan.
21 Tsaynö puriyaptinpis pipis ñakatsinanta Tayta Dios manami munarqantsu.
Paykunata kuyarmi reykunatapis castigarqan.
22 Paykunatami nirqan:
‘Akranqä runakunata ¡paqtä pillapis yataykunman!
Profëtäkunatapis ¡paqtä pillapis yataykunman!’†
23 “Kay patsacho kaqkuna, Tayta Diosta llapayki alabayay.
Salvakuq kanqanpita qoyay qoyay willakuyay.
24 Munayyuq kanqanta maytsay nacionkunamanpis willakuyay.
Mantsakaypä kaqkunata ruranqankunatapis maytsay markakunacho willakuyay.
25 Tsaynö willakuyay Tayta Dios allillata ruraq kanqanpita.
Llapan runakunapis payta alabayänanpä willakuyay.
Payqa ima diospitapis mas mantsariypämi kaykan.
26 Wakin markakunapa diosninkunaqa ïdulukunallami kaykan.
Tayta Diosqa munayyuq karmi ciëlutapis kamashqa.
27 Almiraypä kaqkunata ruraptinmi ñöpancho pïmaypis alabayan.
Munayyuq kaptinmi templuncho kushishqa adorayan.
28 “Maytsay markacho taqkuna, Tayta Diosta alabayay.
Munayyuq kanqanpita payta adorayay.
29 Tayta Diospa jutinta joqarir adorayay.
Ofrendata apakurkur ñöpanman yaykuyay.
Munayyuq santu Tayta Diosta adorayay.†
30 Entëru patsacho taq runakuna ñöpancho tsuktsukyäyätsun.
Tayta Diosmi kay patsata kamashqa mana kuyukuqta.
31 Ciëlupis kay patsapis kushikuyätsun.
Maytsay nacionpita karpis llapayki niyay:
‘¡Tayta Diosmi mandamaqnintsik rey!’
32 Lamarpis y tsaycho kaqkunapis bunyaypa bunyar kushikuyätsun.
Chakrakunapis y tsaycho kaqkunapis kushikuyätsun.
33 Munticho kaq jachakunapis Tayta Diospa ñöpancho kushishqa cantayätsun.
Paymi shamuykan kay patsacho juzgananpä.
34 “Allillata ruraq kanqanpita Tayta Diosta agradëcikuyay.
Kuyakuq kayninqa imaypis manami ushakantsu.†
35 Payta mañakur niyay:
‘Tayta Dios, salvaykayällämay.
Qamllami salvamaqnï kaykanki.
Karu nacionkunacho mashtakashqa kayanqäpita qoriykayällämay.
Tsaynöpami santu jutikita joqarir kushishqa alabayäshayki.
Pasaypa kushikurmi qamta alabayäshayki’.
36 “¡Israel runakunata kuyaq Tayta Dios imayyaqpis alabashqa kaykullätsun!”
Tsaynö nir alabaptinmi llapan runakunapis “¡amén!” nir Tayta Diosta alabayarqan.
Tayta Diosta sirviyänanpä runakunata David churanqan
37 Tsaynömi Asafta y yanapaqninkunata David churarqan Tayta Diospa Pactu Babulnin kanqan kaqcho rurananpä kaqkunata qoyay qoyay rurayänanpä. 38 Babul churaranqan toldu punkuta täpayänanpämi David churarqan Jedutúnpa tsurin Obed-edomta, Hosata y soqta chunka puwaq (68) levita runakunatapis.
39 Gabaóncho kaykaq Sagrädu Tolducho Tayta Diosta sirviyänanpänami sacerdöti Sadocta y wakin sacerdötikunatapis David churarqan. 40 Paykunami Tayta Dios ninqannö tutapapis tardipapis tsaycho kaykaq altarcho rupatsina kaq sacrificiukunata rupatsiyarqan. Tayta Dios yachatsinqan leykunacho qellqaraykanqannöllami llapantapis rurayarqan.
41 Tayta Diosta tsay tolducho alabayänanpämi rey David churarqan Hemánta y Jedutúnta. Tsaynöllami paykunata yanapayänanpä churarqan wakin akranqan kaq levitakunatapis. Paykuna alabarmi niyarqan: “Imayyaqpis kuyamanqantsikpita Tayta Diosta agradëcikushun”.
42 Tayta Diosta alabarmi tukayarqan cornëtata, platïlluta y wakin instrumentukunatapis.
Jedutúnpa tsurinkunatami David churarqan punkuta täpayänanpä.
43 Tsaypitanami llapan runakuna wayinkunapa kutikuyarqan. Castankunata bendisananpämi Davidpis wayinpa kutikurqan.†