3 Tsaypitanami llapan Israel runakunata Jerusalénman David qayatsirqan Tayta Diospa babulninta ruratsinqan tolduman apayänanpä. 4 Jerusalénchömi qorikäyarqan Aarón casta sacerdötikuna y wakin casta levitakunapis. 5 Coat casta runakunami qorikäyarqan juk pachak ishkay chunka (120). Paykunapa mandaqninmi karqan Uriel. 6 Merari casta runakunami qorikäyarqan ishkay pachak ishkay chunka (220). Paykunapa mandaqninmi karqan Asaías. 7 Gersón casta runakunami qorikäyarqan juk pachak kimsa chunka (130). Paykunapa mandaqninmi karqan Joel. 8 Elizafán casta runakunami qorikäyarqan ishkay pachak (200). Paykunapa mandaqninmi karqan Semaías. 9 Hebrón casta runakunami qorikäyarqan puwaq chunka (80). Paykunapa mandaqninmi karqan Eliel. 10 Uziel casta runakunami qorikäyarqan juk pachak chunka ishkay (112). Paykunapa mandaqninmi karqan Aminadab.

11 Tsaypitanami David qayatsirqan Sadoc y Abiatar sacerdötikunata. Tsaynöllami qayatsirqan Uriel, Asaías, Joel, Semaías, Eliel y Aminadab levitakunata. 12 Paykunatami David nirqan: “Levitakunapa mandaqnin kaykarqa ruratsinqä tolduman Tayta Diospa babulninta apayämunaykipä levita mayikikunawan purificakuyay. 13 Ñöpataqa Tayta Diosnintsikta manami tapukurqantsiktsu babulninta imanö apamunantsikpä kanqantapis. Tsaymi levitakuna mana apayämuptin Tayta Dios ajanar Uzata wanutsishqa”.

14 Tsaynö niptinmi sacerdötikuna y levitakuna purificakuyarqan Israel runakunata kuyaq Tayta Diospa babulninta Jerusalénman apayämunanpä. 15 Moisésta Tayta Dios ninqannöllami ishkay largu qeruwan umrurkur apayarqan.^†

16 Tsaynöpis levita mayor runakunatami David nirqan cantaqkunata levita mayinkunapita akrayänanpä y tsay akrayanqan runakuna salteriukunata, arpakunata y platïllukunata tukaraykar kushishqa alabar aywayänanpä. 17 Tsaymi levita mayinkunapita akrayarqan Joelpa tsurin Hemánta, Berequíaspa tsurin Asafta y Cusaíaspa tsurin Etánta. Etánqa karqan Merari casta runami. 18 Yanapaqninkuna kayänanpämi churayarqan Zacaríasta, Jaazielta, Semiramotta, Jehielta, Unita, Eliabta, Benaíata, Maasíasta, Matatíasta, Elifelehuta y Micníasta. Tsaynöllami babul churaranqan toldu punkuta täpaqkunapita akrayarqan Obed-edomta y Jeielta.

19 Broncipita ruranqan platïllukunata tukar cantayänanpämi akrayarqan Hemánta, Asafta y Etánta. 20 Salteriuta tukayänanpämi akrayarqan Zacaríasta, Azielta, Semiramotta, Jehielta, Unita, Eliabta, Maasíasta y Benaíata. 21 Arpata tukayänanpämi akrayarqan Matatíasta, Elifelehuta, Micníasta, Obed-edomta, Jeielta y Azazíasta. 22 Levitakunapa mandaqnin Quenaníastanami cantayta yachaptin cantaqkunapa directornin kananpä churayarqan. 23 Tayta Diospa babulninta umruyänanpämi akrayarqan Berequíasta y Elcanata. 24 Babulpa ñöpanta cornëtata tukaraykar aywayänanpämi akrayarqan Sebaníasta, Josafatta, Natanaelta, Amasaita, Zacaríasta, Benaíata y Eliezerta. Paykunaqa sacerdötikunami kayarqan. Tsaynöllami Obed-edompis y Jehíaspis babulta umruyänanpä kayarqan.

25 Tsaypitanami David, Israel mayor runakuna y juk waranqa (1,000) soldädukunapa capitanninkuna Obed-edompa wayinman aywayarqan Tayta Diospa Pactu Babulninta Jerusalénman kushishqa apayänanpä. 26 Pactu Babulta apayänanpä Tayta Dios alli yanapaykanqanta tantiyaskirmi qanchis torïtukunata y qanchis carnërukunata pishtaskir altarcho rupatsiyarqan.

27 Davidnami aywarqan fïnu lïnupita rurashqa tünican jatishqa. Tsaynöllami jatikuyarqan babulta apaq levitakuna, cantaqkuna y cantaqkunapa directornin Quenaníaspis. Jatiranqan jananmanmi David jatikurqan lïnupita rurashqa efodta. 28 Üshapa waqranta, cornëtata, platïllukunata, salteriuta y arpakunata tukaraykarmi Tayta Diospa Pactu Babulninta Israel runakuna Jerusalénman kushishqa apayarqan.

29 Tayta Diospa Pactu Babulninta Davidpa Markanman^† yaykaykätsiyaptinmi Saúlpa tsurin Mical ventänanpita qawaykur tushuraykar David kushishqa aywaykaqta rikarqan. Rey kaykar saltaypa saltar tushuykaqta rikarmi shonqullancho Davidta jamurarqan.