Yanapaqninkunata Davidman Hiram kachanqan
14
Tsaypitanami Tiro markapa mandaqnin rey Hiram Davidman runakunata kacharqan imachöpis yanapanakuyänanpä. Paykunatawanmi carpintërukunata y rumi llaqllaqkunata kacharqan Davidpa palaciunta shäritsiyänanpä. Tsaynöllami cedru qerukunatapis apatsirqan. 2 Tsaymi David tantiyakurqan Israel runakunata Tayta Dios kuyar rey kananpä churanqanta.Davidpa tsurinkuna Jerusaléncho yuriyanqan
3 Jerusaléncho tarnami mas warmikunata David ashirqan. Tsay warminkunachömi ollqupis warmipis tsurinkuna yuriyarqan. 4 Tsay tsurinkunami kayarqan Samúa, Sobab, Natán, Salomón, 5 Ibhar, Elisúa, Elpelet, 6 Noga, Nefeg, Jafía, 7 Elisama, Beeliada y Elifelet.
Filisteo runakunata David vincinqan
8 Israel nacionpa mandaqnin rey David kanqanta musyaskirmi llapan filisteo runakuna wanutsiyänanpä ashiq aywayarqan. Tsayta musyaskirmi Davidqa paykunawan pelyananpä aywarqan. 9 Manarä chaptinmi filisteo runakuna Refaim pampaman chaykur tsaycho taqkunata atacar qallaykuyarqan. 10 Tsaymi Tayta Diosta mañakur David nirqan: “¿Filisteo runakunata atacanäpä aywämanku? ¿Paykunata vincinäpä yanapamankimanku?”
Tsaynö mañakuptinmi Tayta Dios nirqan: “Awmi, yanapashaykimi”.
11 Tsaymi soldädunkunawan Baal-perazimman David chaykur filisteo runakunata vincirqan. Tsaynö vincirmi David nirqan: “Juchua shamur imaykatapis apakunqannömi conträkunata vincinäpä Tayta Dios yanapamashqa”.
Tsaypitami tsay pampata jutitsirqan Baal-perazim jutin kananpä. 12 Tsaychömi filisteo runakuna ïdulunkunata jaqiriykur aywakuyarqan. Tsaykunata qoriskir kayayänanpämi soldädunkunata David kacharqan.
13 Tsaypita yapaymi filisteo runakuna Refaim pampaman kutir tsaycho taqkunata atacar qallaykuyarqan. 14 Tsaychöpis David yapay tapukuptinmi Tayta Dios nirqan: “Puntanpaqa ama atacayaytsu. Tsaypa trokinqa balsamu jachakuna kanqanpa tumar qepanpa aywayay. 15 Tsaycho pakakuykur shuyäyanki. Balsamu jachakuna puntankunapa puriqtanö wiyarmi musyayanki puntaykikunata filisteo runakunata vincinäpä aywaykanqäta. Tsaynö kaptin juklla yaykuyanki atacayänaykipä”.