Rey kananpä Davidta churayanqan
5
Tsaypitanami llapan trïbu Israel runakuna Hebrón markaman aywaykur Davidta niyarqan: “Noqakunaqa yawarniki karmi rey kanaykita munayä. 2 Rey Saúl mandaq kanqan witsanpis qammi Israel soldädukunata guërracho pelyayänanpä pusharqayki. Tsaynöpis rey kanaykipämi Tayta Dios kaynö nishushqayki: ‘Qamtami akrashqä kuyanqä Israel runakunapa mandaqnin rey kanaykipä. Tsaymi üsha mitsiqnö Israel runakunata shumaq rikanki’ ”.3 Tsaynö niyaptinmi Tayta Diospa ñöpancho Israel mayor runakunawan pactuta David rurarqan. Tsaychömi umanman aceitita wiñayarqan mandaqnin rey kananpä. 4 Kimsa chunka (30) watayuq kaykarmi David mandar qallaykurqan. Payqa Israel nacioncho chusku chunka (40) watami rey karqan. 5 Judá runakunapa mandaqnin rey karmi Hebróncho qanchis wata y soqta killa tarqan. Tsaypitanami Israel y Judá runakunapa mandaqnin rey kar Jerusaléncho kimsa chunka kimsa (33) wata tarqan.†
Jerusalén markata David qorinqan
6 Tsaypitanami soldädunkunawan rey David Jerusaléncho taq jebuseo runakunata† atacayänanpä aywarqan. Tsaymi jebuseo runakuna niyarqan: “Qamkunaqa manami imanöpapis kayman yaykamuyta kamäpakuyankitsu. Yaykamuyta munayaptikipis qaprakuna y weqrukunallami michäyäshunki”.
7 Tsaynö nikäyaptinpis Davidqa jebuseo runakunata vinciskirmi Sión jirkancho kaykaq murallashqa markata qechurqan. Tsaypita patsami kananyaqpis tsay markata Davidpa Markan niyan.
8 Manarä yaykurmi soldädunkunata David nirqan: “ ‘Qaprakuna y weqrukunallami michäyäshunki’ nimaqnintsikkunataqa pasaypami chikï. Paykunata atacanantsikpä yaku aywaq uchkullapa tsay markaman yaykushun”.
David tsaynö ninqanpitami pitapis chikir imaypis niyan: “Qaprakunapis ni weqrukunapis templuman manami yaykuyanqatsu”.
9 Jerusalénchöna David tarmi jutitsirqan Davidpa Markan nir. Tsaypitanami tumaypa murallatsirqan Milo patak pirqapita hasta palaciuyaq. 10 Llapanta mandaq Tayta Dios yanapaptinmi David mas munayyuq karqan.
Yanapaqninkunata Davidman Hiram kachanqan
11 Tsaypitanami Tiro markapa mandaqnin rey Hiram Davidman runakunata kacharqan imachöpis yanapanakuyänanpä. Paykunatawanmi carpintërukunata y rumi llaqllaqkunata kacharqan Davidpa palaciunta shäritsiyänanpä. Tsaynöllami cedru qerukunatapis apatsirqan. 12 Tsaymi David tantiyakurqan Tayta Dios Israel runakunata kuyar rey kananpä churanqanta.
Davidpa tsurinkuna Jerusaléncho yuriyanqan
13 Hebrón markapita aywakur Jerusaléncho tarnami warminkuna y concubïnankuna mas kayänanpä David ashirqan. Paykunachömi ollqupis warmipis tsurinkuna yuriyarqan. 14 Jerusaléncho yuriq ollqu tsurinkunapa jutinkunami karqan Samúa, Sobab, Natán, Salomón, 15 Ibhar, Elisúa, Nefeg, Jafía, 16 Elisama, Eliada y Elifelet.
Filisteo runakunata David vincinqan
17 Israel nacionpa mandaqnin rey David kanqanta musyaskirmi llapan filisteo runakuna wanutsiyänanpä ashiq aywayarqan. Tsayta musyaskirmi Davidqa pakaranqanman aywarqan. 18 Filisteo runakuna chaykurmi campamentunkunata Refaim pampacho shäritsiyarqan. 19 Tsaymi Tayta Diosta mañakur David nirqan: “¿Filisteo runakunata atacanäpä aywämanku? ¿Paykunata vincinäpä yanapamankimanku?”
Tsaynö mañakuptinmi Tayta Dios nirqan: “Awmi, yanapashaykimi”.
20 Tsaymi soldädunkunawan Baal-perazimman David chaykur filisteo runakunata vincirqan. Tsaynö vincirmi David nirqan: “Juchu shamur imaykatapis apakunqannömi conträkunata vincinäpä Tayta Dios yanapamashqa”.
Tsaypitami tsay pampata jutitsirqan Baal-perazim jutin kananpä. 21 Tsaychömi filisteo runakuna ïdulunkunata jaqiriykur aywakuyarqan. Tsaytanami soldädunkunawan David qoriskir rupatsiyarqan.
22 Tsaypitanami filisteo runakuna Davidta yapay atacayänanpä Refaim pampaman kutiyarqan. 23 Tsaychöpis David yapay tapukuptinmi Tayta Dios nirqan: “Puntanpaqa ama atacayaytsu. Tsaypa trokinqa balsamu jachakuna kanqanpa tumar qepanpa aywayay. 24 Tsaycho pakakuykur shuyäyanki. Balsamu jachakuna puntankunapa puriqtanö wiyarmi musyayanki puntaykikunata filisteo runakunata vincinäpä aywaykanqäta. Tsaynö kaptin juklla yaykuyanki atacayänaykipä”.
25 Tsaymi Tayta Dios mandanqannö rurar filisteo runakunata David vincirqan. Gabaón markapita Gezer markayaqmi qati qatiykur wanutsiyarqan.