Israel runakunapa mandaqnin rey David kanqan
11
Tsaypitanami llapan Israel runakuna Hebrón markaman qorikaskir Davidta niyarqan: “Noqakunaqa yawarniki karmi rey kanaykita munayä. 2 Rey Saúl mandaq kanqan witsanpis qammi Israel soldädukunata guërracho pelyayänanpä pusharqayki. Tsaynöpis rey kanaykipämi Tayta Dios kaynö nishushqayki: ‘Qamtami akrashqä kuyanqä Israel runakunapa mandaqnin rey kanaykipä. Tsaymi üsha mitsiqnö Israel runakunata shumaq rikanki’ ”.3 Tsaynö niyaptinmi mandaqnin rey kananpä Tayta Diospa ñöpancho Israel mayor runakunawan pactuta David rurarqan. Tsaychömi Samuelta Tayta Dios ninqannölla† Davidpa umanman aceitita wiñayarqan mandaqnin rey kananpä.
Jerusalén markata David qechunqan
4 Tsaypitanami llapan Israel soldädukunawan rey David aywarqan Jerusalén markata atacayänanpä. Jebuseo runakuna tsaycho täyaptinmi tsay markata Jebús jutiwan reqiyarqan. 5 Jebúsman chaykuyaptinmi tsaycho taq runakuna Davidta niyarqan: “Qamkunaqa manami imanöpapis kayman yaykamuyta kamäpakuyankitsu”.
Tsaynö nikäyaptinpis Davidqa jebuseo runakunata vinciskirmi Sión jirkancho kaykaq murallashqa Jerusalén markata qechurqan. Tsaypita patsami kananyaqpis tsay markata Davidpa Markan niyan.
6 Manarä atacarmi soldädunkunata rey David nirqan: “Mayqaykipis jebuseo runakunata atacaq puntata yaykuq kaqtami soldädükunapa capitannin kayänaykipä churayäshayki”.
Tsaynö niptinmi Sarviapa wawan Joab puntata yaykur jebuseo runakunata atacarqan. Tsaymi soldädukunapa capitannin kananpä rey David payta churarqan.
7 Tsaynö qechuskirmi Davidqa Siónpitana Israel runakunata mandarqan. Tsaymi runakuna niyan Davidpa Markan kanqanta. 8 Tsaypitanami wayikunata David ruratsirqan Milo patak pirqapita hasta marka ñöpanyaq. Joabnami tsay markacho wakin kaq wayikunata allitsatsir usharqan. 9 Llapanta mandaq Tayta Dios yanapaptinmi David mas munayyuq karqan.
Davidpa mas allinnin kimsa soldädunkuna
10 David rey kaykaptinmi soldädukunapa capitanninkuna alli chölullantä kayarqan. Paykunami Davidta imachöpis yanapayarqan. Profëtanwan Tayta Dios willakatsinqannöllami tsay capitankuna llapan Israel runakunawan rey kananpä payta churayarqan.
11 Davidpa mas allinnin kaq soldädunkunami kimsa kayarqan. Punta kaqmi karqan Hacmonipa tsurin Jasobeam. Paymi karqan tsay kimsa soldädukunapa capitannin. Juk kutichömi Jasobeamqa lanzanwan wanutsirqan kimsa pachak (300) soldädukunata.
12 Tsaypitanami karqan Dodupa tsurin Eleazar. Paymi tsay kimsa mas allinnin kaq soldäducho juknin karqan. Payqa karqan Ahohí markapitami. 13 Israel runakunawan guërrata rurayänanpä filisteo runakuna Pasdamimcho qorikäyaptinmi Eleazarpis tsaycho Davidwan kaykarqan. Cebäda chakracho pelyaykäyaptinmi filisteo runakunapita Israel runakuna qeshpir aywakuyarqan. 14 Tsaynö qeshpiyaptinpis cebäda chawpinman ichiykurmi Eleazarqa pelyarqan filisteo soldädukunata vincinqanyaq. Tsaynöpami Israel runakunata Tayta Dios yanaparqan filisteo runakunata vinciyänanpä.
15 Juk kutimi filisteo runakuna campamentunkuna ruraykur Refaim pampacho kaykäyarqan. Davidnami Adulam machaycho pakaraykarqan. Tsaymanmi Kimsa Chunka niyanqan soldädukunapita kimsa mas allinnin soldädukuna paywan tinkuyänanpä aywayarqan. 16 Beléncho juk grüpu filisteo soldädukuna kayaptinmi tsay machayman David pakakushqa karqan. 17 Kimsa allinnin kaq soldädunkuna chaykuyaptinmi David nirqan: “Belén marka punku yaykunacho kaykaq pukyupita yakuta ¡pillarä apapaykamanman upurkunäpä!”
18 Tsaynö niptinmi filisteo soldädukuna Beléncho kaykaptinpis tsay kimsa mas allinnin soldädukuna pakakuyllapa yaykuskir pukyupita yakuta apapäyämurqan David upunanpä. Yakuta chaykatsiyaptinmi Davidqa upuyta munarqantsu. Tsaypa trokinqa Tayta Diospä patsaman jicharmi David nirqan: 19 “Kay yakuta upurqa wanuytapis mana mantsariypa apamuq runakunapa yawarninta upuqnöchi kashä”.
Tsaynö nirmi David upurqantsu.a Tsay kimsa mas valienti kaq soldädukunami tsay yakutaqa Davidpä apapäyarqan.
Kimsa Chunka niyanqan allinnin kaq soldädukuna
20 Kimsa Chunka niyanqan allinnin kaq soldädukunapa capitanninmi karqan Joabpa wawqin Abisai. Juk kutichömi kimsa pachak (300) contran soldädukunawan pelyarnin lanzanwan llapanta Abisai wanutsirqan. Tsaynöpami kimsa allinnin kaq soldädukuna respitashqa kayanqannö Abisaipis respitashqa karqan. 21 Abisaiqa Kimsa Chunka niyanqan soldädukunapita mas reqishqa karmi paykunapa capitannin karqan. Tsaynö karpis manami tinkurqantsu kimsa allinnin kaq soldädukunamanqa.
22 Benaíapis allinnin soldädumi karqan. Payqa Cabseel markapita Joiadapa tsurinmi karqan. Allinnin soldädu karmi Moab nacionpita pelyayta alli yachaq ishkay soldädukunata wanutsirqan. Tsaynöpis juk junaq rashtaykaptinmi jatun pözuman yaykuskir leonta wanutsirqan. 23 Paymi ishkay metru pullan jatusaq Egipto runata wanutsirqan. Tsay runapa lanzanpis telarpa rodïllunnö rakumi karqan. Lanzanwan atacaykaqtami Benaíaqa qeruwan wiruykällar lanzanta qechurqan. Nirkurmi tsay lanzallanwan kikinta wanuskatsirqan. 24 Joiadapa tsurin Benaía tsaynö ruranqanpitami kimsa allinnin kaq soldädukuna respitashqa kayanqannö paypis respitashqa karqan. 25 Kimsa Chunka niyanqan soldädukunacho respitashqa karpis Benaíaqa manami tinkurqantsu kimsa allinnin kaq soldädukunamanqa. Paytami David churarqan cuidaqnin soldädunkunapa capitannin kananpä.
26 Kimsa Chunka niyanqan allinnin kaq soldädukunami kayarqan:
Joabpa wawqin Asael;
Belén markapita Dodupa tsurin Elhanán;
27 Harod markapita Samot;
Pelón markapita Heles;
28 Tecoa markapita Iquespa tsurin Ira;
Anatot markapita Abiezer;
29 Husa markapita Sibecai;
Ahohí markapita Ilai;
30 Netofa markapita Maharai;
Netofa markapita Baanapa tsurin Heleb;
31 Gabaa markapita Ribaipa tsurin Itai (Gabaaqa Benjamín trïbu runakuna täyanqanchömi kaykan);
Piratón markapita Benaía;
32 Gaas raqrapita Hurai;
Arba markapita Abiel;
33 Barhum markapita Azmavet;
Saalbón markapita Eliaba;
34 Gizón markapita Hasempa tsurinkuna;
Arar markapita Sagipa tsurin Jonatán;
35 Arar markapita Sacarpa tsurin Ahíam;
Urpa tsurin Elifal;
36 Mequera markapita Hefer;
Pelón markapita Ahías;
37 Carmel markapita Hezro;
Ezbaipa tsurin Naarai;
38 Natánpa wawqin Joel;
Hagraipa tsurin Mibhar;
39 Amón nacionpita Selec;
Beerot markapita Naharai (paymi Sarviapa wawan Joabpa armankunata puritsir yanaparqan);
40 Itri markapita Ira;
Itri markapita Gareb;
41 heteo runa Urías;
Ahlaipa tsurin Zabad;
42 Rubén trïbupita Sizapa tsurin Adina (payqa Rubén trïbuchömi mandaq karqan; paywanmi kimsa chunka (30) soldädukuna kayarqan);
43 Maacapa tsurin Hanán;
Mitni markapita Josafat;
44 Astarot markapita Uzías;
Aroer markapita Hotampa tsurin Sama y Jehiel;
45 Simripa tsurin Jediael;
Jediaelpa wawqin Joha (paykuna Tiz markapitami kayarqan);
46 Mahav markapita Eliel;
Elnaampa tsurinkuna Jerebai y Josavía;
Moab nacionpita Itma;
47 Eliel;
Obed;
Soba markapita Jaasiel.