Davidpa ultimu kaq salmun
23
Davidpa ultimu kaq salmun kaynömi kaykan:Isaípa tsurin Davidmi kay alabanzata qellqarqan.
Paytami Tayta Dios yanaparqan pïmaypis respitayänanpä.
Paytami Jacob yärakunqan Tayta Dios akrarqan rey kananpä.
Paymi Israel runakunapa shonqunpänö cantan.
2 “Tayta Diospa Espïritunmi imata parlanäpäpis tantiyatsiman.
Paypa palabranqa shimillächömi kaykan.
3 Israel runakunapa Diosninmi parlapämashqa.
Tsapämaqnï Diosnintsikmi kaynö nimashqa:
‘Runakunata alli arreglaq runaqa
y noqapita mantsapakur mandaq runaqa
4 patsa waraptin atsikyaqnömi kanqa,
chipikyaraykaqcho rupay yarqamuqnömi kanqa
y qewa wiñamunanpä tamyamuqnömi kanqa’.
5 Tsaymi noqapita aywaraqkunata Tayta Dios imaypis yanapanqa.
Tsaynö yanapananpämi noqawan pactuta rurashqa.
Pactu ruranqantaqa manami trukatsinqatsu.
Ninqankunata cumplirmi Tayta Dios imaypis salvaman.
Pay yanapamaptinmi llapan yarpanqäkunapis alli kanqa.
6 Mana alli ruraqkunaqa kashakunanö jitarishqa kayänanpämi kaykäyan.
Kashakuna ninacho rupar ushakanqannömi paykunapis ushakäyanqa”.
Davidpa mas allinnin kimsa soldädunkuna
8 Davidpa mas allinnin kaq soldädunkunami kimsa kayarqan. Punta kaqmi karqan Hacmonipa tsurin Joseb-basebet. Paymi karqan tsay kimsa soldädukunapa capitannin. Juk kutichömi Joseb-basebetqa lanzanwan wanutsirqan puwaq pachak (800) soldädukunata.
9 Tsaypitanami karqan Dodupa tsurin Eleazar. Payqa karqan Ahohí markapitami. Eleazarpis allinnin soldädumi karqan. Israel runakunawan guërrata rurayänanpä filisteo runakuna Pasdamimcho qorikäyaptinmi Eleazarpis tsaycho Davidwan kaykarqan. Llapan Israel soldädukuna qeshpir aywakuyaptinpis 10 Eleazarmi itsanqa mana mantsariypa makincho espädapis aptakashqa kanqanyaq filisteo soldädukunawan pelyarqan. Vincinqanta tantiyakurmi Israel soldädukuna Eleazar kaqman kutiykur wanushqa soldädukunapa imaykankunatapis apakuyarqan. Tayta Dios tsaynö yanapaptinmi filisteo runakunata pasaypa vinciyarqan.
11 Tsaynöllami Davidpa allinnin soldädun Agipa tsurin Sama karqan. Payqa Arar markapitami karqan. Juk kutimi filisteo runakuna Lehicho qorikarnin lentëjas chakra chawpincho Israel runakunata atacayarqan. Israel soldädukuna qeshpir aywakuyaptinpis 12 Samami itsanqa tsay chakra chawpincho filisteo soldädukunata vincirqan. Tsaynöpami Israel runakunata Tayta Dios yanaparqan filisteo runakunata vinciyänanpä.
13 Tsaynöllami Davidpa wakin allinnin soldädunkunapis kayarqan. Tsay soldädukunatami Kimsa Chunka jutiwan reqiyarqan. Davidpa kimsa allinnin soldädunkunapis Kimsa Chunka kaqchömi kayarqan.
Juk kutimi cosëcha witsan Adulam machaycho David pakaraykarqan. Filisteo runakunanami campamentunkuna ruraykur Refaim pampacho kaykäyarqan. Adulam machaymanmi Davidpa kimsa mas allinnin soldädunkuna paywan tinkuyänanpä aywayarqan. 14 Beléncho juk grüpu filisteo soldädukuna kayaptinmi tsay machayman David pakakushqa karqan. 15 Kimsa allinnin kaq soldädunkuna chaykuyaptinmi David nirqan: “Belén marka punku yaykunacho kaykaq pukyupita yakuta ¡pillarä apapaykamanman upurkunäpä!”
16 Tsaynö niptinmi filisteo soldädukuna Beléncho kaykaptinpis tsay kimsa mas allinnin soldädukuna pakakuyllapa yaykuskir pukyupita yakuta apapäyämurqan David upunanpä. Yakuta chaykatsiyaptinmi Davidqa upuyta munarqantsu. Tsaypa trokinqa Tayta Diospä patsaman jicharmi David nirqan: 17 “¡Tayta Dios! Kay yakuta upurqa wanuytapis mana mantsariypa apamuq runakunapa yawarninta upuqnöchi kashä”.
Tsaynö nirmi David upurqantsu.a Tsay kimsa mas valienti kaq soldädukunami tsay yakutaqa Davidpä apapäyarqan.
Kimsa Chunka niyanqan allinnin kaq soldädukuna
18 Kimsa Chunka niyanqan allinnin kaq soldädukunapa capitanninmi karqan Sarviapa wawan Joabpa wawqin Abisai. Juk kutichömi kimsa pachak (300) contran soldädukunawan pelyarnin lanzanwan llapanta Abisai wanutsirqan. Tsaynöpami kimsa allinnin kaq soldädukuna respitashqa kayanqannö Abisaipis respitashqa karqan. 19 Abisaiqa Kimsa Chunka niyanqan soldädukunapita mas reqishqa karmi paykunapa capitannin karqan. Tsaynö karpis manami tinkurqantsu kimsa allinnin kaq soldädukunamanqa.
20 Benaíapis allinnin soldädumi karqan. Payqa Cabseel markapita Joiadapa tsurinmi karqan. Allinnin soldädu karmi Moab nacionpita pelyayta alli yachaq ishkay soldädukunata wanutsirqan. Tsaynöpis juk junaq rashtaykaptinmi jatun pözuman yaykuskir leonta wanutsirqan. 21 Tsaynöllami Egiptupita jatunkaray runa lanzan aptashqa atacananpä kaykaptinpis Benaíaqa qeruwan wiruykällar lanzanta qechurqan. Nirkurmi tsay lanzallanwan kikinta wanuskatsirqan.
22 Joiadapa tsurin Benaía tsaynö ruranqanpitami kimsa allinnin kaq soldädukuna respitashqa kayanqannö paypis respitashqa karqan. 23 Kimsa Chunka niyanqan soldädukunacho respitashqa karpis Benaíaqa manami tinkurqantsu kimsa allinnin kaq soldädukunamanqa. Paytami David churarqan cuidaqnin soldädunkunapa capitannin kananpä.
24 Kimsa Chunka niyanqan allinnin kaq soldädukunami kayarqan:
Joabpa wawqin Asael;
Belén markapita Dodupa tsurin Elhanán;
25 Harod markapita Sama;
Elica (paypis Harod markapitami karqan);
26 Palti markapita Heles;
Tecoa markapita Iquespa tsurin Ira;
27 Anatot markapita Abiezer;
Husa markapita Sibecai;
28 Ahohí markapita Salmón;
Netofa markapita Maharai;
29 Baanapa tsurin Heleb (paypis Netofa markapitami karqan);
Gabaa markapita Ribaipa tsurin Itai (Gabaaqa Benjamín trïbu runakuna täyanqanchömi kaykan);
30 Piratón markapita Benaía;
Gaas raqrapita Hidai;
31 Arba markapita Abi-albón;
Bahurim markapita Azmavet;
32 Saalbón markapita Eliaba;
Jasénpa tsurin Jonatán;
33 Arar markapita Sama;
Sararpa tsurin Ahíam (paypis Arar markapitami karqan);
34 Maaca markapita Ahasbaipa tsurin Elifelet;
Gilo markapita Ahitofelpa tsurin Eliam;
35 Carmel markapita Hezrai;
Arab markapita Paarai;
36 Soba markapita Natánpa tsurin Igal;
Gat markapita Bani;
37 amonita runa Selec;
Beerot markapita Naharai (paymi Sarviapa wawan Joabpa armankunata puritsir yanaparqan);
38 Itri markapita Ira;
Gareb (paypis Itri markapitami karqan);
39 heteo runa Urías.
Llapan tsay runakunaqa kimsa chunka qanchismi (37) kayarqan.