Israel runakunata David censatsinqan
24
Tayta Dios yapay ajanarmi Israel runakunata castigayta munarqan. Tsaymi Davidpa yarpayninman churarqan Israel runakunata y Judá runakunata censananpä. 2 Tsaymi soldädunkunapa capitannin Joabta qayaykur rey David nirqan: “Llapan trïbu Israel runakuna täyanqanman aywar Danpita hasta Beersebayaq censayämuy ayka runakuna kayanqantapis musyanäpä”.3 Tsaynö niptinmi Joab nirqan: “Taytay, ¿imanirtä runakunata censayta munanki? Tayta Diosta mañakushqaqa kawanqaykiyaq juk pachak (100) kuti mastapis atskaman mirayänanpämi kamakätsinman”.†
4 Joab y capitankuna tsaynö niyaptinpis rey Davidqa manami cäsurqantsu. Tsaymi capitankunawan Joab aywayarqan Israel runakunata censayämunanpä. 5 Jordán mayuta tsimpaskirmi Aroer markacho taq runakunata y mayu kuchun markacho taq runakunatapis censar qallaykuyarqan. Tsaypitanami Gad trïbu runakuna täyanqan partipa censaraykar päsayarqan hasta Jazer markaman chäyanqanyaq. 6 Tsaypitanami Galaad partipa y heteo runakuna täyanqan Cades markapa censaraykar päsar Dan trïbu runakuna täyanqanman chaykur Sidón markapa tumayarqan. 7 Tsaynöllami shumaq murallashqa Tiro markapa päsar heveo runakuna y cananeo runakuna täyanqan markakunapa censaraykar päsayarqan. Tsaypitanami Judá trïbu runakuna täyanqan sur kaqläpa censaraykar päsayarqan hasta Beerseba markayaq. 8 Isqun killa ishkay chunka (20) junaq entërupa censayta ushaskirmi Jerusalénman kutikuyarqan. 9 Rey Davidman chaykurnami ayka runakunata censayämunqantapis Joab willarqan. Israelcho taq runakunataa censarmi tariyarqan puwaq pachak waranqa (800,000) runakunata. Judácho taq runakunata censarnami tariyarqan pitsqa pachak waranqa (500,000) runakunata. Llapan tsay censayanqan runakunaqa guërraman aywayänanpä kallpankunachönami kayarqan.
Censanqanpita Tayta Dios castiganqan
10 Runakunata censatsiyta ushaskirmi jutsata ruranqanta David tantiyaskir shonqunpis nanayparä llakikurqan. Tsaymi Tayta Diosta mañakur nirqan: “Runakunata censatsir pasaypa jutsatami rurashqä. Tayta Dios, kanan perdonaykallämay. Tsaytaqa imayka upanömi rurashqä”.
11 Tayta Dios imata ninqantapis musyananpämi profëta Gadta David imaypis tapukuq. Tsaymi waraynin tuta David shärikunqan höra profëta Gadta Tayta Dios nirqan: 12 “Davidman aywaykur willanki kimsa castïgupita mayqantapis jukta akrananpä. Akranqan castïguwanmi castigashä”.
13 Tsaynö niptinmi David kaqman aywaykur Gad nirqan: “Kimsa castïgupitashi mayqanta karpis jukta akranki. Jukshi kaykan qanchis wata kay nacioncho muchuy kananpä. Juknashi kaykan contraykikuna kimsa killa qatikachäyäshunaykipä. Y juknashi kaykan entëru Israel nacioncho kimsa junaq pesti qeshyawan qeshyayänanpä. Kachamaqnï Tayta Diosta willanäpä shumaq yarpachakuskir mayqantapis akraskir willamay”.
14 Tsaymi Gadta David nirqan: “¡Kayrächi kayllaqa! Kananqa manami mayqantapis akrayta kamäpakütsu. Imanö kaptinpis pasaypa kuyakuq kar Tayta Dios kikin castigamätsun. Conträ runakunapa munayninmanqa ama kachaykallämätsuntsu”.
15 Tsaymi tsay junaq tutapita qallaykur citanqan junaqyaq Danpita hasta Beersebayaq Israel runakunata pesti qeshyawan Tayta Dios castigarqan. Tsaynö castigaptinmi qanchis chunka waranqa (70,000) runakuna wanuyarqan. 16 Kachamunqan ángel Jerusaléncho taq runakunatapis wanutsinanpäna kaykaptinmi Tayta Dios pësakurqan runakunata tsaynö wanutsinqanpita. Tsaymi angelta nirqan: “Amana wanutsiynatsu”.
Tsay hörami jebuseo runa Araunapa ërancho Tayta Diospa angelnin kaykarqan.
17 Wanutsikuq angelta rikaykurmi Tayta Diosta David nirqan: “Taytay, manami Jerusalén runakunatsu jutsayuq kayan, sinöqa noqallami. Runakunata censatsir jutsata ruranqäpita noqata y castäkunata castigaykallämay”.
Tayta Diosta adorananpä altarta David ruranqan
18 Tsay junaqmi David kaqman aywaykur Gad nirqan: “Jebuseo runa Araunapa ëranman aywaykur Tayta Diosta adorayänaykipä altarta ruray”.
19 Tsaymi Tayta Dios ninqannölla David aywarqan. 20 Rey David yanapaqninkunawan aywaykäyanqanta rikaskirmi Arauna tinkupaykur ñöpanman qonqurikuykurqan urkunpis patsaman töpanqanyaq. 21 Nirkurmi nirqan: “Taytay, ¿imallatä kaykan watukamänaykipä?”
Tsaymi David nirqan: “Ëraykita rantikaykallämay Tayta Diospä altarta tsaycho ruranäpä. Tsay altarchömi sacrificiukunata rupatsishä pesti qeshyawan runakuna manana wanuyänanpä”.
22 Tsaymi Arauna nirqan: “Taytay, kaycho ërapis kaykanmi. Sacrificiuta rupatsinaykipä törükunapis kanmi. Yantata munaptikipis jurquitakuna y yügukunapis kanmi. 23 Tsaykunataqa llapantami qaraykushayki”.
Tsaypita mastami nirqan: “Rupatsinqayki sacrificiuta Tayta Dios chaskiykulläshuy”.
24 Tsaynö niptinmi rey David nirqan: “Päkillä, taytay. Allichi kanman. Imanö kaptinpis qaraykamänaykipa trokinqa rantikaykallämay. Qaraytukuyllawanqa manami Tayta Diosnïpä sacrificiuta rurämantsu”.
Tsaynö nirmi tsay ëratapis törukunatapis David rantirqan pitsqa chunka (50) siclo qellaywan.b 25 Tsaypitanami tsay ëracho altarta David ruraskatsir rupatsina sacrificiukunata y alli päsakuy sacrificiukunata rupatsirqan. Tsaymi runakuna mañakuyanqanta wiyar Tayta Dios pesti qeshyawan pitapis wanutsirqannatsu.