Israel runakunata David censatsinqan
21
Satanásmi† Israel runakunapa contran shärir Davidpa yarpayninman churarqan Israel runakunata censananpä. 2 Tsaymi Joabta y Israel runakunapa mandaqninkunata qayaykur rey David nirqan: “Llapan trïbu Israel runakuna täyanqanman aywar Beersebapita hasta Danyaq censayämuy ayka runakuna kayanqantapis musyanäpä”.3 Joabnami nirqan: “Taytay, llapäkunapis munaynikicho kaykäyaptïqa ¿imanirtä runakunata censayta munanki? Tayta Diosta mañakushqaqa kawanqaykiyaq juk pachak (100) kuti mastapis atskaman mirayänanpämi kamakätsinman. Mana wiyakuypa censaptikiqa Tayta Dios castigamäshunmi”.†
4 Tsaynö niptinpis rey Davidqa manami cäsurqantsu. Tsaymi entëru Israel nacionman runakunata censayämunanpä Joab aywarqan. Tsaypita Jerusalénman 5 kutiskirmi rey Davidta willarqan ayka runakunata censayämunqantapis. Israelcho taq runakunataa censarmi tariyarqan juk millón juk pachak waranqa (1,100,000) runakunata. Judácho taq runakunata censarnami tariyarqan chusku pachak qanchis chunka waranqa (470,000) runakunata. Llapan tsay censayanqan runakunaqa guërraman aywayänanpä kallpankunachönami kayarqan. 6 David censatsinqan mana alli kanqanta tantiyarmi Joab censarqantsu levita runakunata y Benjamín trïbu runakunata.
7 David censatsinqanpita ajanarmi Israel runakunata Tayta Dios castigar qallaykurqan. 8 Tsaymi jutsata ruranqanta tantiyar Tayta Diosta mañakur David nirqan: “Runakunata censatsir pasaypa jutsatami rurashqä. Tsayta ruranqäpita perdonaykallämay. Tsaytaqa imayka upanömi rurashqä”.
9 Tayta Dios imata ninqantapis musyananpämi profëta Gadta David imaypis tapukuq. Tsaymi Gadta Tayta Dios nirqan: 10 “Davidman aywaykur willanki kimsa castïgupita mayqantapis jukta akrananpä. Akranqan castïguwanmi castigashä”.
11 Tsaynö niptinmi David kaqman aywaykur Gad nirqan: “Tayta Diosmi nimashqa 12 kimsa castïgupita mayqantapis jukta akranaykipä. Jukshi kaykan kimsa wata kay nacioncho muchuy kaptin runakuna ñakayänanpä, jukshi kaykan contraykikuna kimsa killa qatikachäyäshunaykipä y juknashi kaykan entëru Israel nacioncho kimsa junaq mana alli qeshyawan Tayta Diospa angelnin runakunata wanutsinanpä. Kachamaqnï Tayta Diosta willanäpä shumaq yarpachakuskir mayqantapis akraskir willamay”.
13 Tsaymi Gadta David nirqan: “¡Kayrächi kayllaqa! Kananqa manami mayqantapis akrayta kamäpakütsu. Imanö kaptinpis pasaypa kuyakuq kar Tayta Dios kikin castigamätsun. Conträ runakunapa munayninmanqa ama kachaykallämätsuntsu”.
14 Tsaymi Israel runakunata pesti qeshyawan Tayta Dios castigarqan. Tsaynö castigaptinmi qanchis chunka waranqa (70,000) runakuna wanuyarqan. 15 Kachamunqan ángel Jerusaléncho taq runakunatapis wanutsinanpäna kaykaptinmi Tayta Dios pësakurqan runakunata tsaynö wanutsinqanpita. Tsaymi angelta nirqan: “Amana wanutsiynatsu”.
Tsay hörami Tayta Diospa angelnin jebuseo runa Ornánpa ërancho kaykarqan.
16 Ciëlupa rikachakunqanchömi David rikarqan Tayta Diospa angelnin espädan aptashqa kaykämuqta. Tsay espädantaqa Jerusalénmanmi toqiraykarqan. Tsaymi Davidpis mayor runakunapis pasaypa mantsakarnin qachqa latsapata jatikur patsaman lätakaykuyarqan. 17 Tayta Diosta mañakurmi David nirqan: “Tayta Diosllä, manami Jerusalén runakunatsu jutsayuq kayan, sinöqa noqallami. Runakunata censatsir jutsata ruranqäpita noqata y castäkunata castigaykallämay. Kuyanqayki Israel runakunataqa ama wanuykatsillaytsu”.
Tayta Diosta adorananpä altarta David ruranqan
18 Tsay junaqmi Tayta Diospa angelnin profëta Gadta nirqan: “David kaqman aywaykur willanki jebuseo runa Ornánpa ërancho Tayta Diosta adorakunan altarta rurananpä”.
19 Ángel ninqannölla Gad willaptinmi David aywarqan Tayta Dios ninqanta cumplinanpä.
20 Tsay hörami trïguta Ornán trillaykaptin chuskun tsurinkuna yanapaykäyarqan. Ornán aruykanqanpita tikraykurmi tsaycho ángel kaykaqta rikaskirqan. Tsurinkunapis tsayta rikaykurmi qeshpir pakakuskiyarqan.
21 Rey David chaykaqta rikaykurmi Ornán tinkupaykur ñöpanman qonqurikuykurqan urkunpis patsaman töpanqanyaq. 22 Tsaymi Ornánta David nirqan: “Ëraykita rantikaykallämay Tayta Diospä altarta tsaycho ruranäpä. Ayka chanin kaptinpis pägashaykimi. Tsay altarchömi sacrificiukunata rupatsishä pesti qeshyawan runakuna manana wanuyänanpä”.
23 Tsaymi Ornán nirqan: “Taytay, kaycho ërapis kaykanmi. Sacrificiuta rupatsinaykipä törükunapis kanmi. Yantata ministiptikipis jurquitakuna kanmi. Tsaki mikuy ofrendata rupatsinaykipä trïgupis kanmi. Tsaykunataqa llapantami qaraykushayki”.
24 Rey Davidnami nirqan: “Päkillä, taytay. Allichi kanman. Imanö kaptinpis qaraykamänaykipa trokinqa rantikaykallämay. Qaraytukuyllawanqa manami Tayta Diospä sacrificiuta rurämantsu. Qaraylla tarinqätaqa manami sacrificiuta rupatsïmantsu”.
25 Tsaynö nirmi tsay ërata David rantirqan soqta pachak (600) qori qellaywan. 26 Tsaypitanami tsay ëracho altarta David ruraskatsir rupatsina sacrificiukunata y alli päsakuy sacrificiukunata altarman churar Tayta Diosta mañakurqan. David mañakunqanta chaskirmi ninata ciëlupita Tayta Dios altarman kachamurqan. 27 Tsaypitanami angelninta Tayta Dios nirqan espädanta wiñakunanman churananpä.
28 Mañakunqanta Tayta Dios wiyanqanta rikarmi uywakunata pishtaskir tsay altarcho mas sacrificiukunata David rupatsirqan. Tsaykunata rupatsirqan jebuseo runa Ornánpa ëranchömi.
29 Tsay witsanmi Tayta Dioswan Tinkuna Toldu y sacrificiuta rupatsina altarpis Gabaón markallachörä kaykarqan. Tsay tolduta y altartaqa Moisés ruratsirqan tsunyaq jirkacho Israel runakuna kaykäyaptinllarämi. 30 Tsaynö kaptinpis espädan aptashqa angelta mantsarmi Tayta Diosta tapukuq Gabaónman David aywarqantsu.