Amonita runakunata David vincinqan
20
Cada watami tamya tiempu päsaskiptin reykuna pelyayänanpä aywayaq. Tsay witsanmi soldädukunata pushakurkur Joab aywarqan Amón nación runakunawan pelyayänanpä. Chaykurmi chakrankunata y markankunata chipyaq ushayarqan. Tsaymi Rabá markataa tumaypa atacar raqällatana kachaykuyarqan. Davidnami Jerusalénllacho quëdakurqan.†2 Tsaypitanami Rabá markaman aywaykur reypa corönanta David qechurqan. Tsay corönaqa kimsa arröba qoripita rurashqa y kuyayllapä rumikunawan adornashqami karqan. Tsay corönatami Davidta jatitsiyarqan. Tsaynöllami Rabá markapita atskata imaykatapis allinnin kaqta David apakurqan. 3 Markacho mana wanutsinqan runakunatami wakinta churarqan qeruta tseqtayänanpä, wakinta chakracho aruyänanpä y wakintana qeruta mutuyänanpä. Tsaynöllami wakin markakunacho taq amonita runakunatapis tsay aruykunaman churarqan. Tsaypitanami soldädunkunawan Jerusalénman David kutikurqan.
Jatusaq casta kimsa runakunata wanutsiyanqan
4 Tsaypitanami Gezer markacho filisteo runakunawan Israel runakuna guërrata rurayarqan. Tsaychömi jatusaq casta Sipai jutiyuq runata Sibecai wanutsirqan. Sibecaiqa Husa markapitami karqan. Tsaynöpami filisteo runakunata Israel runakuna vinciyarqan.
5 Tsaypita yapaymi filisteo runakunawan guërrata rurayarqan. Tsaychömi Jairpa tsurin Elhanán wanutsirqan Gat markapita Goliatpa wawqin Lahmita. Lahmipa lanzanpis telarpa rodïllunnö rakumi karqan.†
6 Gat markacho yapay guërra kaptinmi jatusaq casta filisteo runa yarqamurqan Israel runakunawan pelyayänanpä. Paypa cada makincho y cada chakincho soqta dëdunkuna kaptinmi ishkay chunka chusku (24) dëdunkuna karqan. 7 Tsay runa Israel runakunata wajupaykaptinmi Davidpa wawqin Simeapa tsurin Jonatán payta wanutsirqan.
8 Tsay filisteo runakunami Gat markapita jatusaq casta runakuna kayarqan. Paykunatami Davidwan soldädunkuna wanutsiyarqan.