Tsaynö nirmi Hanún kaqman willakuqkunata kacharqan taytan wanunqanpita consulayänanpä.

Kachanqan willakuqkuna chäyaptinmi 3 soldädunkunapa capitanninkuna Hanúnta niyarqan: “¿Criyinkiku taytayki wanunqanpita consulayäshunaykipä runakunata David kachamunqanta? ¿Manatsurä niq tumpalla markantsikta rikapakuq shäyämushqa kutiykamur ushakätsimänapä?”

4 Tsaynö niyaptinmi Hanúnqa David kachanqan runakunata prësu tsariskatsir shapranta ruturqan. Nirkurmi siki patakllanpa latsapanta rutupaskir qarqurirqan. 5 Tsaynö ruraptinmi tsay runakuna pasaypa penqakushqa kutikuyarqan. Hanún tsaynö ruranqanta musyaskirmi willakuqta David tsay runakunaman kacharqan paykunata niyänanpä: “Jericó markallachöshi täkuyanki shapraykikuna wiñanqanyaq. Tsaypitaräshi kutiyämunki”.

6 Davidta ajanätsinqanta tantiyaykurmi guërra carrëtakunata y cawallu muntaraq soldädukunata contratarnin pägakuyänanpä amonita runakuna kimsa chunka kimsa waranqa (33,000) kïlu qellayta apatsiyarqan Aram-naharaimman, Aram-maacaman y Sobaman. 7 Tsaynöllami minkakuyarqan Maaca markapa mandaqnin reyta, soldädunkunata y kimsa chunka ishkay waranqa (32,000) guërra carrëtakunata. Tsay soldädukuna aywarmi Medeba markapa tsimpancho campamentunta rurayarqan. Tsaymanmi amonita runakunapis aywayarqan guërracho yanapayänanpä.

8 Tsayta musyaskirmi llapan allinnin kaq soldädunkunatawan capitannin Joabta David kacharqan pelyaq aywayänanpä. 9 Tsaymi amonita soldädukuna kamarikuskir markapa punkunman churanakuyarqan Israel runakunawan pelyayänanpä. Siria nacionpita aywaq soldädunkunawan mandaq reykunanami pampaman churanakuyarqan Israel runakunawan pelyayänanpä.

10 Tsaymi puntanpa y qepanpa atacayänanpä kanqanta musyarnin allinnin kaq soldädunkunata Joab akrarqan Siria soldädukunawan pelyaq aywayänanpä. 11 Wakin soldädukunatanami wawqin Abisaitawan kacharqan amonita soldädukunawan pelyayänanpä. 12 Tsaymi Abisaita nirqan: “Siria soldädukuna vinciyämaqta rikarqa yanapayämänaykipä shäyämunki. Tsaynöllami amonita soldädukuna vinciyäshuqnikita rikarqa noqapis shayämushä soldädükunawan yanapayänäpä. 13 ¡Mana mantsariypa pelyashun! ¡Tayta Diosnintsik rikatsimanqantsik nacionnintsik y markantsikkuna raykuq pelyashun! ¡Tayta Dios munanqannö kaykullätsun!”

14 Tsaymi pelyananpä soldädunkunawan Joab aywaptin Siria soldädukuna qeshpir aywakuyarqan. 15 Siria soldädukuna qeshpiyanqanta rikaykurmi amonita soldädukunapis Joabpa wawqin Abisaipita qeshpir markaman yaykuskiyarqan. Tsaynö qeshpiskiyaptinmi Jerusalénpana soldädunkunawan Joab kutikurqan.

16 Israel runakuna tsaynö vinciyaptinmi Siria runakuna Éufrates mayu tsimpancho taq Siria mayinkunata minkakuyarqan yapay pelyayänanpä. Llapan soldädukunapa mandaqninmi Hadad-ezerpa capitannin Sofac karqan.

17 Pelyayänanpä qorikäyanqanta willayaptinmi Davidqa llapan Israel soldädukunata pushakurkur Jordán mayuta tsimpaskir pelyayänanpä churanakuyarqan. Tsaymi Siria soldädukuna atacayämurqan. 18 Davidpa soldädunkuna vinciyaptinmi pelyaykäyanqanpita Siria soldädukuna qeshpir aywakuyarqan. Tsaychömi Davidwan kaykaq soldädukuna wanutsiyarqan qanchis waranqa (7,000) carrëtawan puriq soldädukunata y chusku chunka waranqa (40,000) chakipa aywaq soldädukunata. Tsaynöllami Siria soldädukunapa capitannin Sofactapis wanutsiyarqan. 19 Tsaynö vinciyaptinmi Hadad-ezerta yanapaq reykuna rindikurnin Davidpa munayninchöna kawayarqan. Tsaypitaqa Siria soldädukuna amonita soldädukunata manami yanapayarqannatsu.