Tsaynö nirmi Hanún kaqman willakuqkunata kacharqan taytan wanunqanpita consulayänanpä.

Kachanqan willakuqkuna chäyaptinmi 3 soldädunkunapa capitanninkuna Hanúnta niyarqan: “¿Criyinkiku taytayki wanunqanpita consulayäshunaykipä runakunata David kachamunqanta? ¿Manatsurä niq tumpalla markantsikta rikapakuq shäyämushqa kutiykamur ushakätsimänapä?”

4 Tsaynö niyaptinmi Hanúnqa David kachanqan runakunata prësu tsariskatsir shapranta jukaq qaqllallanpita ruturqan. Nirkurmi siki patakllanpa latsapanta rutupaskir qarqurirqan. 5 Tsaynö ruraptinmi tsay runakuna pasaypa penqakushqa kutikuyarqan. Hanún tsaynö ruranqanta musyaskirmi willakuqta David tsay runakunaman kacharqan paykunata niyänanpä: “Jericó markallachöshi täkuyanki shapraykikuna wiñanqanyaq. Tsaypitaräshi kutiyämunki”.

6 Davidta ajanätsinqanta tantiyaykurmi amonita runakuna Siria nacionman aywaykur Bet-rehob y Soba markakunacho taq ishkay chunka waranqa (20,000) soldädukunata minkakuyarqan yanapayänanpä. Tsaynöpis Maaca runakunapa mandaqnin reytami juk waranqa (1,000) soldädukunawan yanapayänanpä minkakuyarqan. Tsaynöllami Is-tob partimanpis aywaykur chunka ishkay waranqa (12,000) soldädukuna yanapayänanpä minkakuyarqan.

7 Tsayta musyaskirmi llapan allinnin kaq soldädunkunatawan capitannin Joabta David kacharqan pelyaq aywayänanpä. 8 Tsaymi amonita soldädukuna kamarikuskir markapa punkunman churanakuyarqan Israel runakunawan pelyayänanpä. Siriapita, Is-tobpita y Maacapita aywaq soldädunkunanami pampaman churanakuyarqan Israel runakunawan pelyayänanpä.

9 Tsaymi puntanpa y qepanpa atacayänanpä kanqanta musyarnin allinnin kaq soldädunkunata Joab akrarqan Siria soldädukunawan pelyaq aywayänanpä. 10 Wakin soldädukunatanami wawqin Abisaitawan kacharqan amonita soldädukunawan pelyayänanpä. 11 Tsaymi Abisaita nirqan: “Siria soldädukuna vinciyämaqta rikarqa yanapayämänaykipä shäyämunki. Tsaynöllami amonita soldädukuna vinciyäshuqnikita rikarqa noqapis shayämushä soldädükunawan yanapayänäpä. 12 ¡Mana mantsariypa pelyashun! ¡Tayta Diosnintsik rikatsimanqantsik nacionnintsik y markantsikkuna raykuq pelyashun! ¡Tayta Dios munanqannö kaykullätsun!”

13 Tsaymi pelyananpä soldädunkunawan Joab aywaptin Siria soldädukuna qeshpir aywakuyarqan. 14 Siria soldädukuna qeshpiyanqanta rikaykurmi amonita soldädukunapis Abisaipita qeshpir markaman yaykuskiyarqan. Tsaynö qeshpiskiyaptinmi Jerusalénpana soldädunkunawan Joab kutikurqan.

15 Israel runakuna tsaynö vinciyaptinmi Siria runakuna yapay paykunawan pelyayänanpä qorikäyarqan. 16 Éufrates mayu tsimpancho taq Siria runakunatapis rey Hadad-ezer minkakuptinmi Helam markaman chäyarqan yanapayänanpä. Llapan soldädukunapa mandaqninmi Hadad-ezerpa capitannin Sobac karqan.

17 Pelyayänanpä qorikäyanqanta willayaptinmi Davidqa llapan Israel soldädukunata pushakurkur aywayarqan Jordán mayuta tsimpaskir Helam markayaq. Tsayman chäyaptinmi Siria soldädukuna atacayämurqan. 18 Davidpa soldädunkuna vinciyaptinmi pelyaykäyanqanpita Siria soldädukuna qeshpir aywakuyarqan. Tsaychömi Davidwan kaykaq soldädukuna wanutsiyarqan qanchis pachak (700) carrëtawan puriq soldädukunata y chusku chunka waranqa (40,000) cawallun muntashqa soldädukunata. Tsaynöllami Siria soldädukunapa capitannin Sobactapis wanutsiyarqan. 19 Tsaynö vinciyaptinmi Hadad-ezerta yanapaq reykuna rindikurnin Davidpa munayninchöna kawayarqan. Tsaypitaqa Siria soldädukuna amonita soldädukunata manami yanapayarqannatsu.