Mefi-bosetta David qorinqan
9
Juk kutimi paywan kaykaq runakunata David tapur nirqan: “¿Saúlpa castan pillapis kawaykanrätsurä Jonatán raykuq yanapanäpä?”†2 Tsaymi Saúlpa wätayninkunapa capataznin Sibata qayaykatsir David tapurqan: “¿Qamku Siba kanki?” nir.
Sibanami nirqan: “Awmi, taytay”.
3 Tsaymi Sibata David tapurqan: “Tayta Diospa jutincho yanapanäpä ¿Saúlpa castankuna mayqallanpis kawaykanräku?”
Tsaymi Siba nirqan: “Awmi taytay, Jonatánpa tsurin kawaykanrämi. Itsanqa ishkan chakinmi weqruyashqa kaykan”.†
4 Tsaynö niptinmi rey David nirqan: “¿Maychötä kaykan?”
Tsaymi Siba nirqan: “Lo-debar markacho Amielpa tsurin Maquirpa wayinchömi kaykan”.
5 Tsaynö niptinmi rey Davidqa Mefi-bosetta pay kaqman pushananpä kacharqan. 6 Saúlpa willkan y Jonatánpa tsurin Mefi-bosetta chaykatsiptinmi Davidpa ñöpanman qonqurikurqan urkunpis patsaman töpanqanyaq. Tsaymi David nirqan: “¿Qamku Mefi-boset kanki?”
Tsaynö niptinmi Mefi-boset nirqan: “Awmi, taytay”.
7 Tsaymi David nirqan: “Ama mantsamaytsu. Taytayki Jonatán raykuqmi yanapashayki. Tsaynöpis awiluyki Saúlpa chakrankunata kutitsiyäshunaykipämi mandashä. Qamqa noqa mikunqächömi imaypis mikunki”.
8 Tsaynö niptinmi Davidpa puntanman Mefi-boset yapay qonqurikuykur nirqan: “Mana väliq allqunö kaykaptïpis tsaynö kuyapämanqaykipita päkillä, taytay”.
9 Tsaymi Saúlpa wätaynin Sibata qayaykur David nirqan: “Saúlpa kaqtaqa llapantami imaykantapis willkan Mefi-bosetta entregashqä. 10 Qammi tsurikikunawan y wätaynikikunawan chakrankunacho arur mikuyninkunata churatsinki Mefi-bosetpa castankuna mikuyänanpä. Mefi-bosetmi itsanqa makïcho kar noqawan juntu mikunqa”.
(Sibapa tsurinkunaqa chunka pitsqami kayarqan. Wätayninkunapis ishkay chunkami (20) kayarqan.)
11 Tsaymi Davidta Siba nirqan: “Taytay, wätayniki kaykarqa llapantami mandamanqaykita rurashä”.
Mefi-bosetqa imayka tsurinnömi David mikunqan mësacho mikurqan.