Contrankunata David vincinqan
8
Tsaypitanami filisteo runakunata vinciskir Meteg-ama markata paykunapita David qechurqan. 2 Tsaynöllami Moab nación runakunatapis soldädunkunawan vincirqan. Nirkurmi moabita runakunata patsaman lätaykatsir jatun cordelwan tupuyarqan. Ishkay tuputa tupuskirmi tsaycho lätaraykaq runakunata llapanta wanutsirqan. Tsaypita juk tupuyta tupuskirmi tsaycho lätaraykaq runakunata kawaykaqta kachaykurqan. Mana wanutsinqan kaqkunami Davidpa munaynincho kar impuestuta imaypis pägayarqan.3 Tsaynöllami soldädunkunawan David vincirqan Rehobpa tsurin Hadad-ezertapis. Payqa Soba nacionpa mandaqnin reymi karqan. Tsaynö vincirqan Éufrates mayu ñöpancho kaykaq markakunata Hadad-ezer qoriq aywaptinmi. 4 Paykuna kaqpitami David prësu tsaritsimurqan juk waranqa qanchis pachak (1,700) cawallun muntashqa soldädukunata y ishkay chunka waranqa (20,000) chakillapa puriq soldädukunata. Juk pachak (100) carrëtata qarachäyänanpämi cawallukunatapis qorirqan. Wakin kaq cawallukunatami itsanqa ankunkunata kachätsirqan.
5 Davidwan pelyaptinmi Soba nacionpa mandaqnin rey Hadad-ezerta yanapayänanpä Siria nacionpita soldädukuna chäyarqan. Jinatami paykunatapis ishkay chunka ishkay waranqa (22,000) soldädukunata wanutsiyarqan. 6 Tsaypitanami Siria nación runakuna impuestuta pägayänanpä Damascuman soldädunkunata David churarqan. Tsaynöllami maypa aywaptinpis Davidta Tayta Dios yanaparqan contrankunata munaynincho tsararänanpä.
7 Hadad-ezerta vinciskirmi soldädunkunapa capitanninkuna puritsiyanqan qori escüdunkunata qoriskir Jerusalénman David apatsirqan. 8 Tsaynöllami Betawan Berotai markakunapita tsaytsika broncitapis apatsirqan. Betawan Berotai markakunaqa Hadad-ezerpa munayninchömi karqan.
9 Tsaypitanami Hamat markapa mandaqnin rey Toi wiyarqan Hadad-ezerpa soldädunkunata David vincinqanta. 10 Toiqa Hadad-ezerwan contra contrami rikanakuyarqan. Tsaymi kushikurnin tsurin Joramta kacharqan Davidta felicitananpä. Qoripita, qellaypita y broncipita rurashqa tukuyläya qaraykunata qaraptinmi 11 Tayta Diospä David churarqan. Tsaynöllami churarqan llapan vincinqan nacionkunapita qorinqan qorita, qellayta y broncita. 12 Tsay qorinqankunami karqan edomita runakunapita, moabita runakunapita, amonita runakunapita, filisteo runakunapita, amalecita runakunapita y Soba nacionpa mandaqnin rey Hadad-ezerpita.
13 Tsaynöpami David maytsay nacionchöpis reqishqa karqan. Siria nacionta vinciskir soldädunkunawan Jerusalénman kutirmi Kachi Pampa ninqancho pelyar chunka puwaq waranqa (18,000) edomita runakunata wanutsiyarqan.† 14 Tsaypitanami entëru Edom markakunacho soldädunkunata David churarqan tsaycho taqkuna paypa munaynincho kayänanpä. Davidtami Tayta Dios yanaparqan maychöpis pelyar vincinanpä.
Davidpa soldädunkunapa capitanninkuna mayqankuna kayanqan
15 Israel runakunapa mandaqnin rey kar llapantapis David allimi rikarqan tsaynöpis allimi juzgarqan. 16 Soldädunkunapa capitanninmi Sarviapa wawan Joab karqan. Ahiludpa tsurin Josafatmi Israelcho ima päsanqankunatapis qellqaq karqan. 17 Sacerdötikunami kayarqan Ahitobpa tsurin Sadoc y Abiatarpa tsurin Ahimelec. Davidpa secretariunmi Seraías karqan. 18 Tsaynöpis Joiadapa tsurin Benaía karqan cereteo soldädukunapa y peleteo soldädukunapa capitannin. Davidpa tsurinkunanami sacerdöti kayarqan.