3 Tsaynö niptinmi Natán nirqan: “Tayta Dios yanapaykäshuptikiqa allimi kanman yarpanqaykita ruraptiki”.

4 Tsay paqasmi Natánta Tayta Dios nirqan: 5 “David kaqman kutiykur niy: ‘Tayta Diosmi nin: Noqa täkunä wayitaqa manami qamtsu shäritsinki, sinöqa jukmi shäritsinqa. 6 Egiptupita Israel runakunata jipimunqä junaqpita patsa kananyaq manami wayichötsu tashqä, tsaypa trokinqa jukläman jukläman puritsikuna toldullachömi tashqä. 7 Kaytsika unayna kuyanqä Israel runakunawan purirpis churanqä autoridäninkunata manami imaypis mañakushqätsu cedru qerupita wayita rurapäyämänanpä’.

8 “Tsaymi sirvimaqnï Davidta ninki: ‘Llapanta mandaq Tayta Diosmi nin: Üshata mitsikur puriykaptikimi qamta akrashqä Israel runakunapa mandaqnin rey kanaykipä. 9 Tsaymi maypa aywaptikipis qamta yanapar contraykikunatapis llapanta ushakätsishqä. Tsaynöllami yanapashayki kay patsacho mas munayyuq runakuna kayanqannö qampis kanaykipä.

10 “ ‘Tsaynöllami kuyanqä Israel runakunatapis yanapashä nacionnincho pitapis mana mantsariypa añaw kawayänanpä. Tsaycho täyaptinmi contrankuna unaynöqa atacayanqanatsu ni qarquyanqanatsu. 11 Churanqä juezkuna mandayanqan witsanpita patsami kuyanqä Israel runakunata atacayarqan. Qamtami yanapashayki llapan chikishuqnikikuna achäquita mana ashipäyäshunaykipä.

“ ‘Mastami Tayta Dios nin: Kananmi qamta awnï qampita aywaraqkuna imaypis rey kayänanpä. 12 Tsaymi wanukur unay castaykikunawan tinkuq aywaptikipis juk tsurikita rey kananpä churashä. 13 Paymi noqapä wayita shäritsinqa. Paypita aywaraqkunami imaypis reykuna kayanqa. 14 Noqami paypa taytan kashä. Paynami noqapa tsurï kanqa. Imatapis llutanta ruraptinqa imayka taytan tsurinkunata castiganqannömi castigashä.^† 15 Tsaynö castigarpis paytaqa kuyapäshämi. Tsaymi rey kanqanpita Saúlta jipinqänöqa payta imaypis jipishätsu. 16 Qampita aywaraqkunaqa imayyaqpis reymi kayanqa’ ”.^†

17 Revelacioncho Tayta Dios tsaynö ninqanta wiyanqannöllami Davidman aywaykur llapanta Natán willarqan. 18 Willaptinmi Tayta Diospa ñöpanman aywaykur David nirqan: “Päkillä, Tayta Dios. Tsayläya yanapayämänaykipä manami noqapis ni castäkunapis merëciyätsu. 19 Tsaynöpis nimashqayki noqapita aywaraqkuna imaypis rey kayänanpä kanqantami. Tayta Dios, runakunapä yarpanqayki tsaynö kaptin pasaypami kushikü.

20 “Qamqa imanö kanqätapis musyankimi. Tayta Dios, ¿imatanarä masta mañaküman? 21 Kuyamarmi musyatsimashqayki llapan tsay awnimanqaykita cumplinaykipä kanqanta.

22 “Qamllami munayyuq Tayta Dios kanki. Manami qamnö munayyuqqa pipis kantsu. Tsaynöpis qampita masqa ima diospis manami kantsu. Japallayki Dios kanqaykitami unay castäkunapis willayämarqan. 23 Kuyanqayki Israel runakunatanöqa manami pitapis yanapashqaykitsu. Israel runakunata Egiptucho wätay kaykäyanqanpita jipimunqaykinöqa manami mayqan nación runakunatapis sirviyäshunaykipä jipimushqaykitsu. Kuyanqayki runakunata jipimurninmi llapanpä munayyuq kanqaykita musyatsishqayki. Tsaynöpis munayyuq karmi contran shäriq nacionkunata diosninkunatawan ushakätsishqayki. 24 Tayta Dios, Israel runakunatami akrashqayki kuyanqayki runakuna imayyaqpis kayänanpä. Tsaynöpis nishqayki paykunapa Diosnin imayyaqpis kanaykipämi.

25 “Tayta Dios, noqapä y noqapita aywaraqkunapä awnimanqaykikunata imaypis cumpliykullay. 26 Tsaynö cumpliptikimi runakuna imayyaqpis alabayäshurniki pïmaypis niyanqa: ‘Llapanta mandaq Tayta Diosmi Israel runakunapa Diosnin’. Tsaynömi noqapita aywaraqkuna qampa ñöpaykicho imaypis rey kayanqa.

27 “Llapanta mandaq Tayta Dios, qammi tantiyatsimashqayki noqapita aywaraqkuna imaypis reykuna kayänanpä kanqanta. Tsaynö kaptinmi sirviqniki kar tsay awnimanqaykita cumplinaykipä mana mantsariypa qamta mañakamü. 28 Tayta Dios, qampita mas juk Dios manami kantsu. Llapan ninqaykikunapis rasun kaqmi kaykan. Tsaymi musyä tsay awnimanqaykikunata cumplinaykipä kanqanta. 29 Sirviqniki kaptï noqapita aywaraqkuna imaypis sirviyäshunaykipä bendicionnikita churaykullay. Tayta Dios, bendicionnikita churanaykipämi awnimarqayki. Awnimanqaykita cumpliptikimi noqapita aywaraqkuna imaypis bendicionta chaskiyanqa”.