Davidpa contran Seba shärinqan
20
Tsaychömi kaykarqan Bicripa tsurin Seba. Sebaqa Benjamín trïbupita mana alli runami karqan. Paymi cornëtata tukarnin Davidpa contran shärir nirqan:“¡Israel runakuna, wayintsikkunapa kutikushun!
¡Davidqa manami mandamaqnintsik rey kanmantsu!
¡Isaípa tsurin Davidpitaqa manami imatapis chaskishuntsu!”†
2 Tsaynö niptinmi Israel runakuna Davidta jaqiskir Bicripa tsurin Sebapa qepanta aywakuyarqan. Judá runakunami itsanqa rey Davidwan Jordán mayupita Jerusalénman aywayarqan.
3 Jerusalénman David kutiykurmi palaciuta täpananpä jaqinqan chunka concubïna warminkunata† juk wayiman wichqatsirqan. Paykunata wätaykarpis manami paykunawan David punurqannatsu. Tsaymi tsay warmikunaqa wanuyanqanyaq imayka viüdanölla täkuyarqan.
4 Tsaypitanami Amasata rey David nirqan: “Kananpita kimsa junaqta Judá soldädukunata qoriskir paykunawan kayman kutimuy”.
5 Tsaymi soldädukunata qorimunanpä Amasa aywarqan. Kimsa junaqllacho qorimuyta mana kamäpakurmi rasllaqa kutimurqantsu. 6 Amasa mana kutiptinmi Abisaita David nirqan: “Absalónpita masmi problëmaman Seba churamäshun. Kaycho kaykaq soldädükunata pushakurkur wanutsinaykipä juklla qatipay. Manarä taripaptiki paqtä jinchi murallashqa markaman chaykur pakakunman”.
7 Tsaynö niptinmi cereteo soldädukunata, peleteo soldädukunata, tsaycho kaykaq allinnin kaq soldädukunata y Joabpa soldädunkunata pushakurkur Joabwan Abisai Bicripa tsurin Sebata qatipar Jerusalénpita aywayarqan. 8 Gabaóncho jatun rumi kaqman chaykäyaptinnami Amasa yarqamurqan paykunawan tinkunanpä. Joabqa pelyananpä latsapan jatishqa y tseqllanman cuchillun jatishqami purirqan. Amasawan tinkuq aywarmi tsay cuchilluta pakayllapa jipiskirqan. 9 Tinkuskirmi Joab nirqan: “¿Allillaku kaykanki, wawqi?”
Tsaynö nirmi derëcha kaq makinwan shapranpita tsariskirqan qaqllancho mutsananpä. 10 Jukaq makincho cuchillun aptashqa kanqanta Amasa manami tantiyarqantsu. Tsaymi Joabqa aqishninpis patsaman qotukaqpä pachanpa tuksiskirqan. Jinan höra wanuptinmi yapayqa tuksirqannatsu. Tsaypitanami Joab y wawqin Abisai Bicripa tsurin Sebata wanutsiyänanpä qatipar aywayarqan.
11 Wanushqa kaykaqpa ñöpanman ichiykurmi Joabpa juk soldädun nirqan: “¡Joabta y Davidta yanapayta munaqkunaqa Joabwan aywashun!”
12 Tsaynö niptinpis nänicho pasaypa yawarllana Amasa wanushqa jitaraptinmi tsaypa päsaq soldädukuna ichiykurrä rikapäyarqan. Tsaymi tsay soldäduqa nänipita jukläman apaykur cäpawan tsapaykurqan. 13 Jukläman witiskatsiptinmi Joabwan aywaq soldädukuna Bicripa tsurin Sebata qatiparnin aywayarqan.
14 Tsayyaqmi llapan trïbu Israel runakuna täyanqankunapa päsar Seba charqan Abel-bet-maaca markayaq. Bicripita aywaraq castankunawan tsaycho qorikaykurmi tsay markaman yaykuyarqan. 15 Joabnami soldädunkunawan Abel-bet-maacaman chäyarqan. Markaman yaykuna punku sigurashqa kaptinmi yaykuyta mana kamäpakurnin marka murälla waqtanman rumikunatawan allpata qotuyarqan. Tsaypa yarkuskirnami llapan soldädukuna murällata juchutsir qallaykuyarqan. 16 Tsaynö rurayanqanta rikaykurmi juk astüta warmi qayakurqan: “¡Wiyayämay, taytakuna! ¡Tayta Joabta niykuyällay kayman shamunanpä! Paywan parlaytami munä”.
17 Joab chaykuptinmi warmi tapurqan: “¿Qamku Joab kanki?”
Tsaymi Joab nirqan: “Awmi, noqami kä”.
Tsaynö niptinmi warmi nirqan: “Taytay, ninqäkunata shumaq wiyaykallämay”.
Tsaymi Joab nirqan: “¿Imatä kaykan nimänaykipä?”
18 Tsay warminami nirqan: “Unay runakunami niyaq: ‘Yätsikuqta tariyta munarqa Abel markapaa aywatsun’. Tsay ninqannöllami kay markachöqa alli yätsikuqta pipis tarin. 19 Tsaynöllami kay markacho pïmaywanpis alli kawayä. Rey ninqantami imaypis rurayä. Kay markanö alli markaqa juk ishkayllami Israel nacioncho kaykan. Tayta Diospa herencian kay marka kaykaptinqa ¿imanirtä juchuykätsiyanki?”
20 Tsaynö niptinmi Joab nirqan: “¡Tsaytaqa ama yarpaytsu! Manami kay markata ushakätsiyänäpätsu shayämushqä. 21 Tsaypa trokinqa Efraín jallqakunacho taq Bicripa tsurin Sebata wanutsiyänäpä ashirmi shayämushqä. Payqa rey Davidpa contran shärinqanpitami kaycho pakaraykan. Tsay runata wanuskatsirqa kay markapita aywakuyäshämi”.
Tsaynö niptinmi warmi nirqan: “Tsaynö kaptinqa Sebapa umanta marka murälla jananpa jitapäyämushayki”.
22 Tsaynö nirmi tsay warmiqa Sebata wanutsiyänanpä marka mayin runakunawan willanakuyarqan. Tsaymi Sebapa umanta roquskir marka murälla jananpa jitaskayämurqan. Jitaskayämuptinnami cornëtata Joab tukatsirqan soldädunkuna markata manana atacayänanpä. Tsaymi llapan soldädukuna wayinkunapana kutikuyarqan. Joabnami Jerusaléncho rey David kaqman kutikurqan.
Davidpa yanapaqninkuna mayqankuna kayanqanpis
23 Joabmi Israel nacioncho llapan soldädukunapa capitannin karqan. Joiadapa tsurin Benaíanami cereteo soldädukunapa y peleteo soldädukunapa capitannin karqan. 24 Adorammi rey Davidpa aruqninkunapa capataznin karqan. Ahiludpa tsurin Josafatmi Israelcho ima päsanqankunatapis qellqaq karqan. 25 Sevanami Davidpa secretariun karqan. Sadocwan Abiatarmi sacerdötikuna kayarqan. 26 Jairpita aywaraq Irapis Davidpa sacerdötinmi karqan.