Gabaón runakuna Saúlpa castankunata wanutsiyanqan
21
David rey kanqan witsanmi kimsa wata muchuy karqan. Muchuy imanir kanqanta musyananpä David mañakuptinmi Tayta Dios nirqan: “Kay muchuyqa kaykan Saúl y castankuna Gabaón runakunata mana kuyapaypa wanutsiyanqanpitami”.2 Tsaymi Gabaón runakunata rey David qayatsirqan paykunawan parlananpä. Paykunaqa manami Israel runakunatsu kayarqan, sinöqa amorreo runakunapita aywaraq runakunami. Paykunapa unay castankunatami Israel runakuna awniyarqan Gabaón runakunata mana wanutsiyänanpä.† Tsaynö kaptinpis Gabaón runakuna täyanqan markakuna Israel runakunapa y Judá runakunapa kananta munarmi tsaycho taq atska runakunata Saúl wanutsirqan.
3 Tsaypitanami Gabaón runakunata David tapurqan: “Castaykikunata Saúl wanutsinqanpita ¿imatatä ruräman? Tsaynöpis ¿imatatä ruräman noqakunapä Tayta Diosta mañakuyänaykipä?”
4 Gabaón runakunami niyarqan: “Saúlpa castankunawan arreglayänäpä manami qellaytatsu ni qoritatsu munayä. Tsaynöpis manami munayyuqtsu kaykäyä kikïkunallapita Israel runata wanutsiyänäpä”.
Tsaynö niyaptinmi David nirqan: “Tsaynö kaykaptinqa ¿imata ruranätatä munayanki?”
5 Paykunanami niyarqan: “Saúlmi Israel nacioncho täyänäta mana munar llapäkunata ushakätsiyämayta munarqan. 6 Tsaynö rurayämanqanpita Saúlpa qanchis tsurinkunata o willkankunata karpis wanutsiyänäpä entregayämay. Paykunatami Tayta Diospa ñöpanchoa wanuskatsir qerukunapa puntanman warkuyäshä. Tsaynö wanutsiyäshä Tayta Dios akranqan Saúlpa markan Gabaachömi”.
Tsaynö niptinmi rey David nirqan: “Tsaynö kaptinqa entregayäshayki”.
7 Tayta Diospa jutincho Jonatánwan pactu ruranqanta† cumplirmi Jonatánpa tsurin y Saúlpa willkan Mefi-bosetta Gabaón runakuna wanutsiyänanta David munarqantsu. 8 Saúlpa tsurin kaq Mefi-bosetta y wawqin Armonitami itsanqa wanutsiyänanpä entregarqan. Paykunapa mamanqa Ajapa tsurin Rizpami karqan. Tsaynöllami entregarqan Saúlpa warmi tsurin Merabpa† pitsqa wamrankunata wanutsiyänanpä. Paykunapa taytanqa Barzilaipa tsurin Adrielmi karqan. Adrielqa Mehola markapitami karqan. 9 Tsay qanchis runakunata Gabaón runakunaman entregaptinmi Tayta Diosta adorakuna jirkancho wanuskatsir qerukunapa puntancho warkurätsiyarqan. Tsaynöpami cebäda cosëcha qallanqan witsan qanchisnintin runakunata wanutsiyarqan.
10 Tsaymi ayakuna warkaraykäyanqanman Ajapa tsurin Rizpa aywaykur jatun rumi jananman qachqa tëlata mashtarqan. Tsayman jamaykurmi wiskurkuna y munti uywakuna mana mikuyänanpä paqaspa junaqpa täparqan. Tsaynö täparqan cebäda cosëcha qallaykunqanpita hasta tamya killa chämunqanyaqmi.
11 Saúlpa concubïna warmin Rizpa tsaynö täpaykanqanta Davidta willayaptinmi 12 Galaad particho kaykaq Jabes markaman aywar Saúlpa y tsurin Jonatánpa tullunkunata qorimurqan.
Ñöpatami filisteo runakuna Saúlta y Jonatánta Gilboacho wanuskatsir Bet-sán pläzacho ayankunata warkuyarqan. Tsaypitami Jabes runakuna suwaskir markanman pampayänanpä apayarqan.† 13 Nirkurmi Saúlpa y tsurin Jonatánpa tullunkunata Jabes markapita David qoritsimurqan. Tsaynöllami Gabaón runakuna wanutsiyanqan qanchis runakunapa tullunkunatapis qoritsimurqan. 14 Qoriskatsimurmi Saúlpa taytan Cispa tullunkuna churaranqan sepultüraman Saúlpa y tsurin Jonatánpa tullunkunatapis churayarqan. Tsay sepultüraqa Benjamín trïbu runakuna täyanqan Zela markachömi karqan. Rey David ninqannölla llapanta rurayaptinmi Israel runakunata Tayta Dios yanaparqan mikuyninkuna allina wayunanpä.
Chuskuq jatusaq runakunata wanutsiyanqan
15 Filisteo runakuna Israel runakunata yapay atacayämuptinmi pelyayänanpä soldädunkunawan David aywarqan. Pelyaykanqancho David pasaypa utikaskiptinmi 16 Isbi-benob jatusaq casta runa Davidta wanutsiyta munar qatiparqan. Tsay runapa lanzanmi kimsa kïlupita mas lasarqan. Espädanpis mushuqllami karqan. 17 Davidta tsarinanpäna kaykaptinmi Sarviapa wawan Abisai cörrilla aywaykur tsay filisteo runata wanutsirqan. Nirkurmi soldädunkuna Davidta niyarqan: “Taytay, kananpitaqa noqakunawan guërraman ama aywaynatsu. Pelyacho wanutsiyäshuptikiqa aktsiynaqnöchi Israel nación rikakuyäshä”.
18 Tsaypitanami Gob particho filisteo runakunawan yapay guërrata rurayarqan. Tsaychömi jatusaq casta Saf jutiyuq runata Sibecai wanutsirqan. Sibecaiqa Husa markapitami karqan.
19 Tsaypita yapaymi Gobcho filisteo runakunawan guërrata rurayarqan. Tsaychömi Belénpita Jaare-oregimpa tsurin Elhanán Gat markapita Goliatta wanutsirqan. Goliatpa lanzanpis telarpa rodïllunnö rakumi karqan.
20 Gat markacho yapay guërra kaptinmi jatusaq casta filisteo runa yarqamurqan Israel runakunawan pelyayänanpä. Paypa cada makincho y cada chakincho soqta dëdunkuna kaptinmi ishkay chunka chusku (24) dëdunkuna karqan. 21 Tsay runa Israel runakunata wajupaykaptinmi Davidpa wawqin Simeapab tsurin Jonatán payta wanutsirqan.
22 Tsay chusku jatusaq filisteo runakunami Gat markapita Refa castakuna kayarqan. Paykunatami Davidwan soldädunkuna wanutsiyarqan.