Contrankunata David vincinqan
18
Tsaypitanami filisteo runakunata vinciskir Gat markata y ñöpankunacho kaykaq markakunatapis David qechurqan. 2 Tsaynöllami Moab nación runakunatapis soldädunkunawan vincirqan. Mana wanutsinqan moabita runakunami Davidpa munaynincho kar impuestuta imaypis pägayarqan.3 Tsaynöllami Soba nacionpa mandaqnin rey Hadad-ezerta soldäduntinta Hamat particho David vincirqan. Tsaynö vincirqan Éufrates mayu ñöpancho kaykaq markakunata Hadad-ezer qoriq aywaptinmi. 4 Paykuna kaqpitami David prësu tsaritsimurqan qanchis waranqa (7,000) cawallun muntashqa soldädukunata y ishkay chunka waranqa (20,000) chakillapa puriq soldädukunata. Juk waranqa (1,000) carrëtakunata y juk pachak (100) carrëtata qarachäyänanpämi cawallukunatapis qorirqan. Wakin kaq cawallukunatami itsanqa ankunkunata kachätsirqan.
5 Davidwan pelyaptinmi Soba nacionpa mandaqnin rey Hadad-ezerta yanapayänanpä Siria nacionpita soldädukuna chäyarqan. Jinatami paykunatapis ishkay chunka ishkay waranqa (22,000) soldädukunata wanutsiyarqan. 6 Tsaypitanami Siria nación runakuna impuestuta pägayänanpä Damascuman soldädunkunata David churarqan. Tsaynöllami maypa aywaptinpis Davidta Tayta Dios yanaparqan contrankunata munaynincho tsararänanpä.
7 Hadad-ezerta vinciskirmi soldädunkunapa capitanninkuna puritsiyanqan qori escüdunkunata qoriskir Jerusalénman David apatsirqan. 8 Tsaynöllami Tibhat y Cun markakunapita tsaytsika broncitapis apatsirqan. Tibhat y Cun markakunaqa Hadad-ezerpa munayninchömi karqan. Tsay broncipitami Salomónqa templupä ruratsirqan lamar niyanqan jatun lavatoriuta, paradorkunata y manëjukunata.†
9 Tsaypitanami Hamat markapa mandaqnin rey Toi wiyarqan Sobapa mandaqnin rey Hadad-ezerpa soldädunkunata David vincinqanta. 10 Toiqa Hadad-ezerwan contra contrami kayarqan. Tsaymi kushikurnin tsurin Adoramta kacharqan Davidta felicitananpä. Qoripita, qellaypita y broncipita rurashqa tukuyläya qaraykunata qaraptinmi 11 Tayta Diospä David churarqan. Tsaynöllami churarqan llapan vincinqan nacionkunapita qorinqan qorita, yuraq qellayta y broncita. Tsay qorinqankunami karqan edomita runakunapita, moabita runakunapita, amonita runakunapita, filisteo runakunapita y amalecita runakunapita.
12 Tsaynöpis Kachi Pampa ninqancho pelyarmi Sarviapa wawan Abisai soldädunkunawan wanutsiyarqan chunka puwaq waranqa (18,000) edomita runakunata. 13 Tsaypitanami entëru Edom markakunacho soldädunkunata David churarqan tsaycho taqkuna paypa munaynincho kayänanpä. Davidtami Tayta Dios yanaparqan maychöpis pelyar vincinanpä.
Davidpa soldädunkunapa capitanninkuna mayqankuna kayanqanpis
14 Israel runakunapa mandaqnin rey kar llapantapis David allimi rikarqan tsaynöpis allimi juzgarqan. 15 Soldädunkunapa capitanninmi Sarviapa wawan Joab karqan. Ahiludpa tsurin Josafatmi Israelcho ima päsanqankunatapis qellqaq karqan. 16 Sacerdötikunami kayarqan Ahitobpa tsurin Sadoc y Abiatarpa tsurin Ahimelec. Davidpa secretariunmi Seraías karqan. 17 Tsaynöpis Joiadapa tsurin Benaía karqan cereteo soldädukunapa y peleteo soldädukunapa capitannin. Davidpa tsurinkunami mandashiqninkuna kayarqan.