Betsabéwan jutsata David rurayanqan
11
Cada watami tamya tiempu päsaskiptin reykuna pelyayänanpä aywayaq. Tsay witsanmi capitannin Joabta David kacharqan soldädukunata pushakurkur amonita runakunawan pelyayänanpä. Chaykurmi amonita runakunapa chakrankunata y markankunata chipyaq ushakätsiyarqan. Tsaynöllami Rabá markacho taq runakunata tumaypa tsapaskiyarqan. Davidnami Jerusalénllacho quëdakurqan.†2 Juk tardimi David pununqanpita shärikuskir palaciun janancho puriykar kuyayllapä warmi bäñakuykaqta rikarqan. 3 Tsayta rikaykurmi juk wätayninta David kacharqan pï kanqantapis musyamunanpä. Kutiykurmi willarqan heteo casta Uríaspa warmin Betsabé kanqanta. Betsabéqa Eliampa tsurinmi karqan. 4 Payqa killa qeshyanwan qeshyanqanpitami purificakur bäñakuykarqan. Betsabé kanqanta willaptinmi palaciunman pushaykatsir paywan David punurqan. Nirkurnami Betsabéqa wayinpa kutikurqan.
5 Tsaypitanami qeshyaq rikakunqanta tantiyaskir juklla Davidta musyatsirqan. 6 Tsayta musyaskirmi wätayninta capitán Joabman David kacharqan: “Heteo casta Uríasta empëñu kachaykallämuy” ninanpä.
Tsaynö niptinmi Joabqa David kaqman Uríasta juklla kacharqan. 7 Urías chaykuptinmi David tapurqan Joab y soldädunkuna imanö kaykäyanqanta y guërra imanö kanqantapis. 8 Nirkurnami Uríasta nirqan: “Kananqa wayikiman aywar chakikita mayllakurniki jamapay”.
Palaciupita yarquskiptinnami allinnin kaq mikuyta David apatsirqan. 9 Wayinman aywananpa rantinmi Uríasqa palaciu punkullacho täpaq soldädukunawan juntu punurqan.
10 Wayinpa mana aywanqanta willayaptinmi Uríasta qayaykur David nirqan: “Tsayrä karupita chaykämurqa ¿imanirtä wayikiman aywashqaykitsu?”
11 Tsaynö niptinmi Urías nirqan: “Israelpa y Judápa soldädunkuna guërraman aywar toldukunallachömi punuykäyan. Capitán Joab y capitán mayinkunapis tsaynöllami punuykäyan. Paykunawanmi Tayta Diospa babulninpis kaykan. Tsaynö kaykaptinqa ¿imanöpatä wayïman aywäman mikunäpä, upunäpä, warmïwan pununäpäpis? ¡Taytay, tsaytaqa manami imaypis rurashätsu!”
12 Tsaymi David nirqan: “Tsaynö kaykaptinqa kanan junaq kayllacho quëdakuy. Waraynami kutinki”.
Tsaynö niptinmi Jerusaléncho Urías quëdakurqan. 13 Tsay junaqmi Uríasta David mikutsirqan y upyatsirqan machanqanyaq. Machashqa kaykarpis Urías wayinman aywananpa trokinmi palaciuta täpaq soldädukuna punuyanqan kaqllacho yapay punurqan.
14 Tsaypita waraynin tutanami juk cartata David qellqaskir Joabman Uríaswan apatsirqan. 15 Tsay cartachömi nirqan: “Guërracho pelyar Uríasta puntaman churanki. Tsaycho kikillanta jaqiskir witikuyanki wanutsiyänanpä”.
16 Cartacho David tsaynö niptinmi Joabqa Rabá markata atacar mas geniuyuq soldädukunawan pelyananpä Uríasta churarqan. 17 Atacayaptinmi Rabá soldädukunaqa markapita yarquskir Joabpa soldädunkunawan pelyayarqan. Tsay pelyachömi Davidpa juk ishkay capitanninkunata wanutsir heteo casta Uríastapis wanutsiyarqan.
18 Tsaypitanami Joabqa Davidman willakatsirqan guërracho ima päsanqankunatapis. 19 Willakuqta kacharmi nirqan: “Guërracho ima päsamanqantsiktapis willaptiki 20 capazchi rey David ajanar nishunki: ‘¡Imanirtä marka murälla chakinyaq alläpa yaykuyarqayki! ¿Manaku musyayanki jananpita flëchayämunanpä kanqanta?’ 21 Tsaynöpis capazchi David yarpätsishunki Tebes markacho ima päsanqantapis. Tsaychömi murälla jananpita tuñaywan warmi saqmamur Jerobaalpa tsurin Abimelecta wanutsirqan.† David tsaynö ollqutupäshuptiki ninki: ‘Taytay, heteo casta Uríaspis wanushqami’ ”.
22 Tsaynö yätsiskiptinmi tsay kachanqan runa Davidman aywar willarqan Joab ninqannölla. 23 Willarmi nirqan: “Noqakunawan pelyayänanpä yarqamuq soldädukuna puntataqa vinciykäyämarqanmi. Jinatami tikrapur paykunata vinciyaptï markaman qeshpiyashqa. 24 Marka punkucho pelyayaptïmi murällapita flëchakunawan flëchayämunqancho wakin soldäduykikunata wanutsiyashqa. Tsaychömi Uríastapis wanutsiyashqa”.
25 Tsaynö niptinmi David nirqan: “Tsaypita Joab ama llakikutsuntsu. Guërrachöqa mana yarpaypami pitapis wanutsiyan. Tsaynö kaptinpis payta shakyätsinki tsay runakuna rindikuyanqanyaq atacayänanpä”.