Davidta yanapayänanpä soldädukuna aywayanqan
12
Davidmi Cispa tsurin Saúlpita qeshpir Siclag markaman aywakurqan. Tsaycho taykaptinmi puëdiq soldädukuna tsayman aywayarqan payta yanapayänanpä. 2 Tsay runakunaqa ishkan makinpami warakakuyta y flëchaytapis yachayaq. Paykunaqa Benjamín trïbu runakuna karmi Saúlwan tsay trïbulla kayarqan.Tsay runakunami kayarqan:
3 Semaapa tsurin capitán Ahiezer,
Ahiezerpa wawqin Joás (Ahiezerwan Joásqa Gabaa markapitami kayarqan),
Azmavetpa tsurinkuna Jezielwan Pelet,
Anatot markapita Beracawan Jehú,
4a Gabaón markapita Ismaías (payqa Kimsa Chunka niyanqan allinnin kaq soldädukunapa mandaqninmi karqan),
4b (5) Jeremías,
Jahaziel,
Johanán,
Gedera markapita Jozabad,
5 (6) Eluzai,
Jerimot,
Bealías,
Semarías,
Haruf markapita Sefatías,
6 (7) Elcana,
Isías,
Azareel,
Joezer,
Jasobeam (tsay pitsqa ultimu kaq runakunaqa Corépa castankunami kayarqan),
7 (8) Joela y Zebadías (Joela y Zebadíasqa kayarqan Gedor markapita Jerohampa tsurinkunami).
8 (9) Tsaynöllami tsunyaq jirkacho kaykaq machaycho David pakaraykaptin Gad trïbu runakunapis pay kaqman aywayarqan yanapayänanpä. Paykunaqa escüdutapis lanzatapis allimi manijayta yachayarqan. Leonnöpis pasaypa mantsaypämi kayarqan y lluytsunöpis pasaypa cörriqmi kayarqan. 9 (10) Punta kaq soldädumi karqan Ezer, ishkay kaqmi karqan Obadías, kimsa kaqmi karqan Eliab, 10 (11) chusku kaqnami karqan Mismana, pitsqa kaqnami karqan Jeremías, 11 (12) soqta kaqnami karqan Atai, qanchis kaqnami karqan Eliel, 12 (13) puwaq kaqnami karqan Johanán, isqun kaqnami karqan Elzabad, 13 (14) chunka kaqnami karqan Jeremías y chunka juk kaqnami karqan Macbanai. 14 (15) Paykunami Gad trïbu soldädukunapa capitanninkuna kayarqan. Mas kallpayuq kaqpaqa juk waranqa (1,000) soldädukunapa kallpannömi kallpan karqan. Wallka kallpayuq kaqpapis juk pachak (100) soldädukunapa kallpannömi kallpan karqan. 15 (16) Tsay soldädukunami wata qallaykunan killacho Jordán mayuta tsimpayarqan pasaypa jakashqa kaykaptin. Paykunata rikaykurmi ishkan frentin pampakunacho taq runakunapis qeshpir aywakuyarqan.
16 (17) Tsaynöllami Benjamín trïbu runakunapis y Judá trïbu runakunapis Davidta yanapayänanpä pakaraykanqan machayman aywayarqan. 17 (18) Tsayman chaykuyaptinmi machaypita yarqaskamur David nirqan: “Yanapayämänaykipä shamushqa kayaptikiqa llapan shonqüwanmi chaskï. Jutsaynaq kaykaptïpis conträkunapa makinman entregayämänaykipä shamushqa kayaptikiqa unay castantsikkuna yärakuyanqan Tayta Diosmi juzgayäshunki”.
18 (19) Tsaychömi Kimsa Chunka niyanqan allinnin kaq soldädukunapa capitannin Amasai kaykarqan. Espíritu Santu parlatsiptinmi Amasai nirqan:
“¡Isaípa tsurin David!
¡Qampa makiki y chakikichömi kaykäyä!
¡Qamwanmi imaypis kaykäyäshä!
¡Tayta Dios yanapaykäshuptikiqa qampäpis y qamta yanapashuqnikikunapäpis alli kaway kaykullätsun!”
Amasai tsaynö niptinmi paykunata David churarqan soldädunkunapa capitannin kayänanpä.
19 (20) Tsaynöllami Manasés trïbu soldädukunapis David kaqman aywayarqan payta yanapayänanpä. Tsay hörami Davidqa filisteo soldädukunata yanapar Saúlpa contran pelyaq yarqunanpäna kaykarqan. Itsanqa David mana yanapananpämi filisteo runakunapa mandaqninkuna willanakuskir niyarqan: “Kay runaqa wanuskatsimarnintsikmi umantsikta apakurkur patronnin Saúlman kutinqa”.
20 (21) Siclagman David kutiptin Manasés trïbu soldädukuna aywaqkunami kayarqan Adnas, Jozabad, Jediael, Micael, Jozabad, Eliú y Ziletai. Paykunami kayarqan Manasés trïbupita juk waranqa (1,000) soldädukunapa capitanninkuna. 21 (22) Contrankunata vincinanpämi paykuna Davidta yanapayarqan. Tsaymi paykunata alli chölu kayaptin soldädunkunapa capitanninkuna kayänanpä churarqan.
22 (23) Warayllanta warayllantami runakuna chäyarqan Davidpa soldädun kayänanpä. Tsaytsika karmi Tayta Diospa soldädunkunanörä kayarqan.
Rey kananpä Davidta Hebróncho churayanqan
23 (24) Hebróncho David kaykaptinmi atska soldädukuna aywayarqan Saúlpa trokin rey kayman payta churayänanpä. Tsaynöpami Tayta Dios ninqannölla David rey karqan.
24 (25) Judá trïbupitami kayarqan soqta waranqa puwaq pachak (6,800) soldädukuna. Paykunami escüdunkunawan y lanzankunawan guërracho pelyayänanpä kamarikushqa aywayarqan.
25 (26) Simeón trïbupitami kayarqan qanchis waranqa juk pachak (7,100) soldädukuna. Paykunapis guërracho pelyayänanpämi kamarikushqa kayarqan.
26 (27) Leví trïbupitami kayarqan chusku waranqa soqta pachak (4,600) soldädukuna. 27 (28) Tsaynöllami kimsa waranqa qanchis pachak (3,700) soldädukunawan karqan Aarón castapita Joiada 28 (29) y ishkay chunka ishkay (22) castankunawan puëdiq chölu Sadocpis. Sadocwan kaykaq runakunaqa castankunapa mandaqninkunami kayarqan.
29 (30) Benjamín trïbupitapis Saúlpa trïbu mayinkuna kimsa waranqa (3,000) soldädukunami kayarqan. David manarä rey kaptinmi paykunaqa Saúlpa soldädunkuna kayarqan.
30 (31) Efraín trïbupitami kayarqan ishkay chunka waranqa puwaq pachak (20,800) geniu soldädukuna. Paykunaqa kayarqan trïbuncho mas respitashqa runakunami.
31 (32) Tsaynöllami pullan kaq Manasés trïbupita kayarqan chunka puwaq pachak waranqa (18,000) soldädukuna. Paykunatami kachayarqan Davidta rey kayman churayänanpä.
32 (33) Isacar trïbupitami kayarqan ishkay pachak (200) mandaqkuna. Paykunaqa yachaq runakuna karmi Israel runakunata imata rurayänanpäpis shumaq yätsiyarqan. Tsaymi paykuna niyanqanta Israel mayinkuna rurayaq.
33 (34) Zabulón trïbupitami kayarqan pitsqa chunka waranqa (50,000) soldädukuna. Paykunapis tukuy niraq armakunawan Davidpa janan sharkur pelyayänanpämi kamarikushqa kayarqan.
34 (35) Neftalí trïbupitami kayarqan juk waranqa (1,000) capitankuna. Paykunawanmi kayarqan kimsa chunka qanchis waranqa (37,000) soldädukuna escüdunkuna y lanzankuna kamarikushqa.
35 (36) Dan trïbupitami kayarqan ishkay chunka puwaq waranqa soqta pachak (28,600) soldädukuna pelyayänanpä kamarikushqa.
36 (37) Aser trïbupitami kayarqan chusku pachak waranqa (40,000) soldädukuna pelyayänanpä kamarikushqa.
37 (38) Jordán mayu wak tsimpapitami kayarqan juk pachak ishkay chunka waranqa (120,000) soldädukuna. Paykunami kayarqan Rubén trïbupita, Gad trïbupita y pullan Manasés trïbupita. Paykunapis tukuy niraq armankunawan guërracho pelyayänanpä kamarikushqami kayarqan.
38 (39) Tsay soldädukunaqa armankuna aptashqami Hebrónman aywayarqan Davidta rey churayänanpä. Tsaynöllami wakin kaq Israel runakunapis David rey kananta munayarqan. 39 (40) Castankuna kamaripäyanqan mikuyta mikurmi paykunaqa Davidwan tsaycho kimsa junaq mikur upur qoyäyarqan. 40 (41) Tsaynöllami Isacar trïbu, Zabulón trïbu y Neftalí trïbu runakunapis tsay fiestacho mikuyänanpä apayarqan jarinata, hïgus tantakunataa, päsaskunata, vïnukunata, aceitita, törukunata, üshakunata y cabrakunatapis. Tsay mikuykunatami apayarqan ashnukunawan, camëllukunawan, mulakunawan y törukunawanpis. Davidta rey kananpä churarmi entëru Israel nacioncho runakuna pasaypa kushikuyarqan.