Pactu Babulta Jerusalénman apayänanpä David willanakunqan
13
Davidmi Tayta Diospa babulninta Jerusalénman apayänanpä willanakurqan juk waranqa (1,000) soldädukunapa capitanninkunawan, juk pachak (100) soldädukunapa capitanninkunawan y wakin capitankunawanpis. 2 Nirkurmi llapan Israel autoridäkunata David nirqan: “Tayta Diosnintsik kamakätsiptin y qamkuna munayaptikiqa maytsaycho taq Israel mayintsikkunata willakatsishun shamur yanapamänantsikpä. Tsaynöpis markakunacho y jallqakunacho taq sacerdötikunaman y levita runakunaman willakatsishun shamur yanapamänantsikpä. 3 Paykuna shäyämuptinmi Tayta Diosnintsikpa babulninta apamushun. Saúl mandaq kanqan witsanpita patsami kananyaq mana qorimuypa kachariykushqantsik”.4 David ninqankuna alli kanqanta tantiyarmi llapan runakuna awniyarqan qoriyämunanpä.
Babulta Jerusalénman David apayta munanqan
5 Tsaypitanami Tayta Diospa babulninta Quiriat-jearimpita apayänanpä Davidqa llapan Israel runakunata qayatsirqan Egipto kuchuncho kaykaq Sihor partipita hasta Hamat partiman yaykunayaq.† 6 Nirkurnami llapan Israel runakunawan Quiriat-jearimman David aywarqan Tayta Dios babulninta qoriyämunanpä. Quiriat-jearimpa jukaq jutinmi Judácho kaq Baala karqan. Babul janancho ishkay querubín chawpinchömi Tayta Diospa trönun kaykan.†
7 Mushuq carrëtaman babulta churaskirmi Abinadabpa wayinpita apar qallaykuyarqan. Tsaynö apayaptinmi Uza y Ahío sacerdötikuna puntankunata aywayarqan. 8 Davidwan llapan Israel runakuna Tayta Diospa puntallantaa tushuraykar aywarmi llapan shonqunwan kushishqa alabayarqan arpankunawan, salteriunkunawan, panderëtankunawan, platïllunkunawan y cornëtankunawanpis. 9 Quidón Ëra niyanqanman chaykur törukuna llutskayaptinmi Uzaqa babul mana ishkinanpä tsarirkurqan. 10 Tsaynö tsariptinmi Tayta Dios pasaypa ajanar Uzata jinan höra wanuskatsirqan. Tsaymi Diospa ñöpancho wanuskirqan.
11 Uzata Tayta Dios wanutsiptinmi David pasaypa ajanarqan. Tsaypitami tsay ërata jutitsirqan Pérez-uzab jutin kananpä. Tsay jutillami kananyaqpis kaykan. 12 Tsay junaqmi Tayta Diosta mantsar David nirqan: “¡Kakullätsun! Tayta Diospa babulninta ¡imapätä apashäpis!”