Saúlwan tsurinkuna guërracho wanuyanqan
10
Gilboa jirkacho filisteo runakuna atacayaptinmi Israel runakuna qeshpir aywakuyarqan. Tsaynö qeshpiykäyaptinmi filisteo runakuna atskaqta wanutsiyarqan. 2 Tsaynöllami Saúlta y tsurinkunatapis qatikachäyarqan. Tsaychömi Saúlpa tsurinkuna Jonatánta, Abinadabta y Malquisúata wanutsiyarqan.3 Tsaypitanami filisteo runakuna Saúlta flëchaskiyarqan. Tsaymi qeshpiyta mana kamäpakur 4 armanta puritsir yanapaqnin soldäduta Saúl nirqan: “Espädaykiwan wanuskatsimay. Manami munätsu Diosman mana criyiq filisteo runakuna wanuskatsimar kushikuyänanta”.
Tsaynö niptinpis yanapaqnin soldädu pasaypa mantsarirmi wanutsiyta munarqantsu. Mana munaptinmi espädanta tukmarkur puntanman Saúl ishkir kikin tuksikurqan. 5 Saúl wanunqanta rikaykurmi yanapaqnin soldädupis tsaynölla tuksikuskirqan. 6 Tsaynöpami Saúl, kimsan tsurinkuna y paywan kaykaq llapan castankuna wanuyarqan. 7 Israel soldädukuna qeshpiyanqanta y tsurinkunawan Saúl wanuyanqanta musyaskirmi Jezreel pampacho taq Israel runakuna markankunapita qeshpir aywakuyarqan. Tsaymi filisteo runakunana tsay markakunacho täyarqan.
8 Saúl wanunqanpita waraynin junaqnami wanushqakunapa imaykankunatapis apakuyänanpä filisteo runakuna aywayarqan. Tsaychömi Saúlta y tsurinkunata Gilboa jirkacho wanushqa jitaraykaqta tariyarqan. 9 Tsaymi Saúlpa umanta roquskir espädanta y pelyananpä kaq latsapanta qoriyarqan. Nirkurmi entëru markakunaman y diosninkunapa templunkunaman willakuqkunata kachayarqan Saúl wanunqanta willakuyänanpä. 10 Saúlpa espädanta y pelyananpä kaq latsapantanami churayarqan diosninkunapa templunman y umantanami warkuyarqan Dagón diosninpa templunman.
11 Saúlta tsaynö rurayanqanta Galaad particho kaykaq Jabes markacho taq Israel runakuna musyaskirmi 12 allinnin kaq soldädukuna willanakuskir Saúlpa y tsurinkunapa ayankunata qoriyarqan. Tsaypitanami Jabesman apaykur encina munti chakinman pampaskir qanchis junaqyaq ayunayarqan.