3 Tsaypitanami filisteo runakuna Saúlta flëchaskiyarqan. Tsaymi qeshpiyta mana kamäpakur 4 armanta puritsir yanapaqnin soldäduta Saúl nirqan: “Espädaykiwan wanuskatsimay. Manami munätsu Diosman mana criyiq filisteo runakuna wanuskatsimar kushikuyänanta”.

Tsaynö niptinpis yanapaqnin soldädu pasaypa mantsarirmi wanutsiyta munarqantsu. Mana munaptinmi espädanta tukmarkur puntanman Saúl ishkir kikin tuksikurqan. 5 Saúl wanunqanta rikaykurmi yanapaqnin soldädupis tsaynölla tuksikuskirqan. Tsaynöpami paypis Saúl wanunqan kaqllacho wanurqan. 6 Tsaynöpami Saúl, kimsan tsurinkuna, yanapaqnin soldädu y llapan soldädunkunapis wanuyarqan.

7 Saúlta y tsurinkunata filisteo runakuna wanutsiyanqanta y soldädukunapis qeshpir aywakuyanqanta musyaskirmi Jezreel pampa tsimpacho y Jordán mayu tsimpacho taq Israel runakuna markankunapita qeshpir aywakuyarqan. Tsaymi filisteo runakunana tsay markakunacho täyarqan.

8 Saúl wanunqanpita waraynin junaqnami wanushqakunapa imaykankunatapis apakuyänanpä filisteo runakuna aywayarqan. Tsaychömi Saúlta y kimsa tsurinkunata Gilboa jirkacho wanushqa jitaraykaqta tariyarqan. 9 Tsaymi Saúlpa umanta roquskir espädanta y pelyananpä kaq latsapanta qoriyarqan. Nirkurmi entëru markakunaman y diosninkunapa templunkunaman willakuqkunata kachayarqan Saúl wanunqanta willakuyänanpä. 10 Saúlpa espädanta y pelyananpä kaq latsapantanami churayarqan Astarot diösapa templunman. Saúlpa cuerpuntanami warkuyarqan Bet-sán markapa murällanman.

11 Saúlta tsaynö rurayanqanta Galaad particho kaykaq Jabes markacho taq Israel runakuna musyaskirmi 12 allinnin kaq soldädukuna willanakuskir tsay paqas aywayarqan Bet-sán markayaq. Chaykurmi Saúlpa y tsurinkunapa cuerpunkuna warkaraykaqta jipiskir apakuyarqan. Jabesman chaykatsirnami ayankunata rupatsiyarqan. 13 Tullunkunata juk jacha chakinman pampaskirmi qanchis junaqyaq ayunayarqan.