3 Wayinkuna rupashqa kaykaqta tariykur y warminkunata y wamrankunata mana tariykurmi 4 yanapaqninkunawan David ikikyäyanqanyaq pasaypa waqayarqan. 5 Tsaynöllami Davidpa ishkan warminkunatapis amalecita runakuna prësu apashqa kayarqan. Jukaq warminmi karqan Jezreel markapita Ahinoam y jukaq warminnami karqan Carmelpita Abigail. Abigailqa Nabalpa viüdanmi karqan.^† 6 Tsurinkunata amalecita runakuna prësu apayashqa kaptinmi yanapaqnin runakuna pasaypa ajanarnin Davidta saqmayta munayarqan. Tsaynö ajanäyaptinmi David pasaypa llakikur Tayta Diosta mañakurqan.

7 Tsaymi Ahimelecpa tsurin sacerdöti Abiatarta^† David nirqan: “Efodta makyaykallämay”.

Efodta makyaykuptinmi 8 Tayta Diosta David mañakurqan: “¿Tsay suwakunapa qepanta aywämanku? Juklla aywar ¿paykunata taripämantsurä?” nir.

Tsaynö mañakuptinmi Tayta Dios nirqan: “Taripänaykipä ras ayway. Llapan apayanqankunatami kutitsimunki”.

9 Tsaynö niptinmi Davidqa soqta pachak (600) yanapaqnin runakunata pushakurkur Besor raqraman chäyarqan. 10 Pasaypa pishipashqa karmi tsay mayuta tsimpayta mana kamäpakur ishkay pachak (200) runakuna tsaycho quëdakuyarqan. Chusku pachak (400) runakunami itsanqa amalecita runakunata qatipar Davidwan aywayarqan.

11 Aywaykäyanqanchömi Egiptupita juk runa aywapakashqa jitaraykaqta tariyarqan. Tsay runatami David kaqman apaykur tantatawan yakuta qarayarqan. 12 Tsaynöpis qarayarqan juk hïgus tantata y ishkay päsas tantata.^a Tsaykunata mikuskiptinmi kallpan yuriskirqan. Tsay runaqa manashi kimsa paqas ni kimsa junaq imatapis mikushqatsu kanä. 13 Tsaypitanami David tapurqan: “¿Pipa wätaynintä kanki y maypitatä shamushqayki?”

Tsay runanami nirqan: “Amalecita runapa wätayninmi kä. Qäyantinnami pasaypa qeshyaptï patronnïpis jaqiskamar aywakushqa. 14 Noqakunami asaltayämushqä Neguevcho taq cereteo runakunata, Judá runakuna täyanqan wakin markakunata y Calebpita aywaraq runakuna täyanqan markakunatapis. Tsaypita kutimurmi Siclag markatapis rupatsiyashqä”.

15 Davidnami nirqan: “¿Pushamankimanku tsay runakuna kaykäyanqanman?”

Niptinmi tsay Egipto runa nirqan: “Mana wanutsimänaykipä ni patronnïman mana entregamänaykipä Tayta Diospa jutincho juraptikiqa pushashaykimi”.

16 Tsay runa pushaptin chäyänanpämi amalecita runakuna maynin tsayläman mashtakaykur mikur upur fiestata ruraykäyänä. Tsaynö fiestata ruraykäyarqan Judácho y Filisteacho taq runakunata asaltar imaykatapis qoriyanqanpita kushikurmi. 17 Tsaynö kaykaqta tariskirmi Davidqa yanapaqninkunawan tsay runakunata qoyaypa waraynin tardiyaq wanutsiyarqan. Chusku pachak (400) chölukunallami camëllunkunata muntakurkur qeshpiyarqan.

18 Tsaynöpami amalecita runakuna llapan apayanqankunata David qechuskir ishkan warminkunatapis kutitsimurqan. 19 Paykunata qorimuptin manami faltarqantsu ni jatunpis ni takshapis ni ollqu wamrapis ni warmi wamrapis. Apayanqan kaqkunataqa llapantami imaykankunatapis David qorimurqan. 20 Tsaynöllami apayanqan üshankunata y wäkankunata llapanta David qorimurqan. Qorimunqan uywakunata kutitsirmi qatiqkuna niyarqan: “¡Kay uywakunaqa Davidpänami kanqa!”

21 Besor raqraman chaykuyaptinmi tsaycho quëdaq ishkay pachak (200) runakuna yarqur taripäyarqan Davidta y paywan aywaykaq runakunata. Tsay runakunaqa pasaypa pishipashqa karmi amalecita runakunata qatipayta mana kamäpakur Besor raqracho quëdakuyarqan. Paykunawan tinkuskirmi David kushikurnin winchikurqan. 22 Davidwan aywaq wakin mana alli yarpayyuq runakunanami Davidta niyarqan: “Noqantsikwan mana aywaq runakunaqa imatapis manami merëciyanmantsu. Warminkunata y wamrankunata aparkur aywakuyätsun”.

23 Tsaymi David nirqan: “Wawqikuna, ama tsaynöqa rurashuntsu. Tayta Diosmi qorimunantsikpä yanapamashqantsik. Tsaynöpis salvamarnintsikmi suwakunata vincinantsikpä yanapamashqantsik. 24 Qamkunaqa llutantami yarpaykäyanki. Rakipänakunqantsik höraqa iwal iwalmi rakipänakushun qepita täpar quëdaqkunawanpis y pelyaman aywaqkunawanpis”.

25 Tsay junaqpitami kananyaqpis Israel runakuna guërrapita apayämunqan kaqtaqa imatapis iwal iwal rakipänakuyan.

26 Siclag markaman David chaykurnami qechuyanqan kaqkunapita rakiskir Judáman mayor runakunapä apatsir nirqan: “Tayta Diospa contran runakunata qechuyämunqätami qamkunapä apaykätsimü”.

27 Tsaynöllami apatsirqan Bet-elman, Neguev Ramotman, Jatirman, 28 Aroerman, Sifmotman, Estemoaman, 29 Racalman, Jerameel runakuna täyanqan markakunaman, ceneo runakuna täyanqan markakunaman, 30 Hormaman, Corasánman, Atacman 31 y Hebrónmanpis. Yanapaqninkunawan puntata chäyanqan markakunamanqa llapanmanmi David apatsirqan.