Filisteo runakuna Davidman mana yärakuyanqan
29
Tsaypitanami llapan filisteo soldädukuna Afecman qorikäyarqan. Israel runakunanami Jezreelcho kaykaq pukyu lädunman qorikäyarqan. 2 Filisteo runakunami waranqa waranqa (1,000) soldädukunawan y pachak pachak (100) soldädukunawan grüpu grüpurä Afecman aywayarqan. Paykunapa qepantami Davidpis y yanapaqninkunapis rey Aquiswan aywayarqan. 3 Tsaymi filisteo runakunapa mandaqnin rey Aquista tapur niyarqan: “Kay hebreo runakunaqa ¿imanirtä noqantsikwan kaykäyan?”Rey Aquisnami nirqan: “Payqa Davidmi, Israel runakunapa mandaqnin rey Saúlpa sirviqninmi. Juk ishkay watanami payqa noqawan juntu kaykan. Chämunqanpita patsa manami imatapis llutanta rurashqatsu”.
4 Tsaymi filisteo runakunapa mandaqninkuna pasaypa ajanar Aquista niyarqan: “Tsay runaqa rikatsinqayki markaman ras kutikutsun. Noqantsikwan aywarqa guërracho kaykashqapis contrantsikmi shärinqa. Payqa rey Saúlwan amistayta munar wanuratsimarnintsikmi umantsiktapis roquskir apanqa. 5 Tsay runapä ¿manaku cantar niyarqan: ‘Saúlmi wanutsishqa juk waranqa (1,000) runakunata y Davidnami wanutsishqa chunka waranqa (10,000) runakunata’?”†
6 Tsaymi Davidta qayaskir Aquis nirqan: “Musyämi alli runa kanqaykita. Tayta Diospis tsayta musyanmi. Tsaynöpis noqaman shamunqaykipita patsami alli runa kanqaykita rikashqä. Tsaymi guërracho yanapamänaykita munashqä. Tsaynö kaptinpis filisteo rey mayïkunaqa manami qamman yärakuyantsu. 7 Tsaynö kaykaptinqa mana ajanayllapa rikatsinqä markaman kutikuy”.
8 Davidnami nirqan: “Taytay, qammi mandamaqnï rey kaykanki. ¿Imanirtä michämanki contrayki runakunawan pelyaq aywanäta? Makikiman chämunqäpita patsa hasta kananyaq ¿imatatä mana allita rurashqä?”
9 Aquisnami nirqan: “Musyämi Tayta Diospa angelninnö alli runa kanqaykita. Tsaynö kaykaptikipis filisteo rey mayïkuna manami munayantsu noqakunawan guërraman aywanaykita. 10 Llapanpis tsaynö nikäyaptinqa waray tuta tsaka tsakalla yanapashuqniki runakunawan kutikuyay”.
11 Tsaynö niptinmi yanapaqnin runakunawan waraynin tuta rikatsinqan markaman David kutikurqan. Filisteo runakunanami Israel runakunawan pelyayänanpä Jezreelman aywayarqan.