2 Davidnami nirqan: “Taytay, aywashun. Kananmi rikamanki imanö pelyanqätapis”.

Tsaymi Aquis nirqan: “Tsaynö kaptinqa noqata cuidamänaykipämi churashayki”.

3 Tsay witsan Samuel wanushqanami karqan. Israel runakuna waqarmi markan Ramácho pampayarqan.^† Tsaynöpis wanushqakunapa almanwan parlaqkunatapis brüjukunatapis Israel nacionpita rey Saúl qarqushqami karqan.^†

4 Israel runakunawan pelyayänanpämi filisteo runakuna campamentunkunata Sunem markacho rurayarqan. Saúlnami Israel runakunawan Gilboa jirkacho campamentunkunata rurayarqan. 5 Filisteo soldädukuna qorikashqa kaykäyaqta rikaykurmi Saúlqa pasaypa mantsarir llakikurqan. 6 Tsaymi imata rurananpäpis Tayta Diosta mañakuptin ni suëñuyninchöpis, ni Urim rumiwanpis ni profëtakunawanpis imatapis nirqantsu. 7 Tsaymi yanapaqninkunata Saúl nirqan: “Aywar ashiyämuy wanushqakunapa almanwan parlaq warmita rikatsikuq aywanäpä”.

Tsaynö niptinmi niyarqan: “Endor markachömi wanushqakunapa almanwan parlaq warmi kan”.

8 Tsaymi Saúlqa juk niraq latsapata jatikuskir ishkay yanapaqninkunawan paqaspa tsay warmi kaqman aywayarqan. Chaykurmi rugakur nirqan: “Mamïta, imanö kanäpä kanqantapis musyanäpä wanushqa runapa almanta yuritsipaykallämay”.

9 Tsaynö niptinmi warmi nirqan: “Qam musyankimi kay nacionpita rey Saúl llapan brüjukunata y wanushqakunapa almanwan parlaqkunata qarqunqanta. Tsaynö kaykaptinqa ¿imanirtä wanushqa runapa almanta qayamunäta munanki? Tsayta ruraptïqa noqatapis wanuymanmi jitarpamanki”.

10 Tsaynö niptinmi Saúl nirqan: “Tayta Diospa jutinchömi qamta awnï imapis mana päsashunaykipä”.

11 Tsaymi warmi nirqan: “¿Pipa almanta yuritsimunätatä munanki?”

Saúlnami nirqan: “Samuelpa almanta yuritsimunaykitami munä”.

12 Samuelpa almanta rikaykurmi warmi qayarar nirqan: “¡Qamqa kikin rey Saúlchä kanki! Taytay, ¡imanirtä llullapämashqayki!”

13 Tsaymi rey Saúl nirqan: “Ama mantsariytsu. ¿Imatatä rikaykanki?”

Warminami nirqan: “Patsa rurinpita alma yarqaykämuqtami rikaykä”.

14 Tsaymi Saúl tapurqan: “¿Pï niraqtä tsay yarqaykämuq alma?”

Warminami nirqan: “Tünican jatishqa awkin runami yarqaykämun”.

Samuel yarqaykämuqta tantiyaskirmi Saúlqa qonquriykurqan urkunpis patsaman töpanqanyaq.

15 Samuel yuripaykurmi Saúlta nirqan: “¿Imapätä ajanätsimar kayman qayatsimashqayki?”

Niptinmi Saúl nirqan: “Filisteo runakuna conträ pelyayänanpä shayämuptinmi pasaypa llakishqa kaykä. Tayta Diospis mañakuptï manami cäsumannatsu. Suëñuynïchöpis ni profëtakunawanpis manami parlapämantsu. Tsaymi qamta qayatsimushqä imata ruranäpä kaqtapis tantiyatsimänaykipä”.

16 Tsaymi Samuel nirqan: “Tayta Dios kacharishurniki contrayki kaykaptinqa ¿imapänatä imatapis tapukamanki? 17 Tayta Dios nimanqanta willanqänöllami llapanpis päsaykäshunki. Tsaymi rey kanqaykipita jipiskishurniki Davidtana churashqa Israel runakunapa mandaqnin rey kananpä.^† 18 Tsaynö jipishushqayki amalecita runakunata ushakätsinaykipä kachashuptiki mana cäsukunqaykipitami.^† 19 Tsaymi Israel soldädukunata filisteo runakunapa makinman Tayta Dios churanqa. Qamtapis tsurikikunatapis wanutsiyäshuptikimi waray junaq noqa kaykanqäman chäyämunki”.

20 Tsaynö niptinmi Saúl pasaypa mantsakar patsaman ishkiskirqan. Juk junaq y juk paqas imatapis mana mikushqa karmi kallpaynaq karqan. 21 Pasaypa mantsakashqa kaykaqta rikarmi tsay warmi witiykur nirqan: “Taytay, wanunäpä kanqanta mantsariykarpis rugakamanqaykinömi Samuelpa almanta yuritsimushqä. 22 Sirviqniki kaykaptïqa kanan ninqäta wiyaykallämay. Kallpayki yurirkunanpä mikukurkuyrä. Mikuskirnami päsakunki”.

23 Tsaynö niptinpis Saúlqa manami mikuyta munarqantsu. Yanapaqninkunapis tsay warmipis mikunanpä kutin kutin rugayaptinrämi patsapita shärirkur bancaman jamaskirqan. 24 Tsay warmi yarquskirnami wera kaq torïtunta pishtaskir levadüraynaq tantata masararqan. 25 Tsaypitanami Saúlta y yanapaqninkunata kusinakunqan mikuyta qararqan. Tsayta mikuskirnami tsay paqas despidikuskir aywakuyarqan.