2 Tsaynö yarpachakuskirmi Davidqa soqta pachak (600) yanapaqnin runakunawan Gat markaman aywakuyarqan. Tsay markacho Maocpa tsurin Aquismi rey kaykarqan.

3 Gat markachömi Davidpa yanapaqninkuna warminwan y tsurinkunawan täyarqan. Tsaychömi Davidpis ishkan warminkunawan täyarqan. Jukaq warminpa jutinmi karqan Ahinoam. Payqa Jezreel markapitami karqan. Jukaq warminpa jutinmi karqan Abigail. Payqa Carmel markapita Nabalpa viüdanmi karqan. 4 Gat markaman David aywakunqanta musyaskirmi Saúlqa ashiq aywarqannatsu.

5 Davidnami rey Aquista nirqan: “Taytay, rasunpa chaskimarqa mayqan markallatapis rikaykatsillämay tsaycho täyänäpä. Manami allitsu kanman täkunqayki markacho täyaptï”.

6 Tsaynö mañakuptinmi tsay junaqlla Siclag markata rikatsirqan. Tsaynöpami Siclag markaqa Judá nacionpa mandaqnin reykunapana kaykan. 7 Filisteo runakuna täyanqanchömi David tarqan juk wata y chusku killa.

8 Tsaycho tarninmi Davidqa yanapaqnin runakunawan gesurita, gezrita y amalecita runakuna täyanqan markakunaman asaltaq aywayaq. Tsay runakunaqa täyarqan Telaim partipita Shur niyanqan partiyaqmi. Tsayqa Egiptuläpami karqan. 9 Tsay markakunaman chaykurmi warmitapis ollqutapis llapanta wanuskatsir üshankunata, cabrankunata, wäkankunata, ashnunkunata, camëllunkunata y latsapankunatapis apakurkur rey Aquis kaqman kutiyaq. 10 Atska kuti tsaynö kutiyaptinmi Aquis tapuq: “¿Kananqa mayqan markatanatä asaltayämushqayki?”

Tsaynö tapuptinmi David llullaparnin Judá partiman aywar Neguevcho taq runakunata asaltayämunqanta niq. Höratanami niq tsaylächo taq Jerameel runakunata asaltayämunqanta. Aybësisnami niq tsaylächo taq ceneo runakunata asaltayämunqanta.

11 Aquisman aywar rasun kaqta pipis mana willakunanpämi Davidqa ollqutapis warmitapis chipyaq wanutsiq. Filisteo runakunapa markancho tanqan witsanmi tsaynölla imaypis David ruraq. 12 David ninqanta criyirmi rey Aquis yarparqan: “Tsaynö ruraptinqa Israel mayinkuna Davidta chikiyaptin munayllächömi imaypis kanqa”.