2 Tsaycho pakaraykanqanta musyaskirmi kimsa waranqa (3,000) allinnin soldädukunata pushakurkur Zif tsunyaq jirkaman Davidta ashiyänanpä Saúl aywarqan. 3 Haquila jirkaman chaykurmi näni kuchuncho campamentunta Saúl shäritsirqan. Davidnami paykunapa frentin tsunyaq jirkacho pakaraykarqan. Tsaymanpis Saúl qatipaykanqanta musyaskirmi 4 runakunata David kacharqan chäyanqanta o mana chäyanqantapis musyayämunanpä.

5 Tsay runakuna kutiykayämuptinmi Davidpis Saúlpa campamentunman aywarqan. Chaykurmi Nerpa tsurin capitán Abner y Saúl maynincho pununqanta rikarqan. Tsaynöllami rikarqan Saúlpa soldädunkuna jiruruypa läduncho punuykäyaqta. 6 Rikaykurmi Davidqa heteo runa Ahimelecta y Sarviapa wawan Abisaita nirqan: “¿Mayqaykitä Saúl kaqman aywaptï wallkimayta munayanki?”

(Abisaiqa Joabpa wawqinmi karqan.)

Tsaynö niptinmi Abisai nirqan: “Taytay, noqa wallkishayki”.

7 Tsaymi tsay paqas Davidwan Abisai Saúl kaykanqan kaqman chäyarqan. Yaykurmi Saúlta tariyarqan jawnan lädunman lanzanta jawiykur wanuyparä punukashqa kaykaqta. Tsaynöllami Abnerpis y soldädunkunapis lädunkunacho wanuyparä punukashqa kaykäyarqan. 8 Tsaynö punukashqa kaykaqta rikaykurmi Davidta Abisai nirqan: “Tayta Diosmi contrayki runata makikiman churamushqa. Kachapaykamay kikinpa lanzanwan juk tuksiylla wanuskatsinäpä”.

9 Tsaynö niptinmi David nirqan: “¡Ama wanutsiytsu! Tayta Dios akranqantaqa manami wanutsishwantsu. 10 Tayta Dios destinanqan hörarämi awkinyaypa o guërracho karpis wanunqa. 11 Saúlta mana wanutsinäpä Tayta Dios tsapaykamätsun. Tsaypa rantinqa ras aywakunantsikpä jawnan läduncho jawiraykaq lanzanta y yaku puritsikunanta jipimuy”.

12 Tsaynöpami Saúlpa lanzanta y yaku puritsikunanta apakurkur aywakuyarqan. Tayta Dios paykunata pasaypa punukätsishqa kaptinmi ni mayqanpis mayayarqantsu. 13 Tsaypitanami Davidqa paykunapita karuman aywaykur wak tsimpa jirkanman witsarqan. 14 Tsaypitanami Abnerta y soldädunkunata qayar nimurqan: “¡Abner! ¡Rikchay!”

Abnernami nirqan: “¡Pitä qam kanki reyman tsaynö qayakamunaykipä!”

15 Davidnami nirqan: “¿Manaku qamqa alli chölu kanki? Israel nacionchöqa manami pipis qamnö alli chölu kantsu. Tsaynö kaykarqa ¿imanirtä reyta cuidashqaykitsu? ¿Manaku mayashqayki payta wanutsinanpä juk runa yaykamunqanta? 16 Cuidanaykipa rantin ¿imanirtä punukushqayki? Tayta Dios akranqanta mana cuidayanqaykipitami llapayki wanutsishqa kayankiman. ¡Mä ashiy jawnancho lanzanta y yaku puritsikunanta!”

17 David kanqanta tantiyaskirmi Saúl nirqan: “David, ¿qamku qayakaykämunki?”

Davidnami nirqan: “Awmi taytay, noqami kaykällä. 18 Sirviqniki kaykaptï ¿imanirtä wanutsimänaykipä qatikachaykämanki? ¿Imatatä llutanta rurashqä? 19 Taytay, kanan ninqäta wiyaykallämay. Conträ kanaykipä Tayta Dios yarpayta qoshushqayki kaptinqa sacrificiutami altarcho paypä rupatsishä. Conträ kanaykipä runakunalla willapäshushqayki kaptinqa Tayta Dios paykunata maldicionatsun. Paykuna jananmi Tayta Dios qaramanqantsik nacionpita qarqushqa kar jäpa markakunapa puriykä. Tsay runakunami munaykäyan tsay markakunacho adorayanqan mana reqinqantsik dioskunata adoranäta. 20 Tsaynö munayaptinpis Tayta Diospa ñöpanpita karu markacho ¿imanirtä wanüman? ¡Pulgata ashiqnömi ashimar shamushqayki! ¡Tsakwatanömi jallqakunapa qatikachaykämanki!”

21 Tsaymi Saúl nirqan: “Hïju, qampa contrayki shärir jutsayuqmi rikakuykä. Kutikamuyna. Manami wanutsishaykitsu. Upanö llutanta ruraykaptïpis qamqa kuyapämar manami wanutsimashqaykitsu”.

22 Davidnami nirqan: “Kaychömi lanzaykita tsararaykä. Qorinanpä juk sirvishuqnikita kachamuy. 23 Allita o mana allita ruranqantsikpita Tayta Diosmi juzgamäshun. Tsaymi Tayta Dios akrashunqaykita musyar makïman churamushuptikipis wanutsishqätsu. 24 Kanan qamta respitar mana wanutsinqänölla noqatapis Tayta Dios tsapaykamätsun pipis mana wanutsimänanpä. Tsaynölla ima ñakaypitapis jipiykamätsun”.

25 Saúlnami nirqan: “¡Hïju David! Tayta Dios llapanchöpis allillata ruranaykipä yanapaykulläshuy”.

Tsaypitanami David aywakuptin Saúlpis wayinpana kutikurqan.