2 Maón partichömi Nabal jutiyuq rïcu runa tarqan. Paypami kimsa waranqa (3,000) üshankuna y juk waranqa (1,000) cabrankuna karqan. Carmel markaläpa majädan kaptinmi millwata rututsinanpä tsayman aywarqan. 3 Nabalqa Caleb castami karqan. Payqa mana tantiyakuq y mana alli runami karqan. Warmin Abigailmi itsanqa kuyayllapä y tantiyakuq karqan.

4 Carmelcho üshankunata Nabal rutuykätsinqanta musyaskirmi 5 chunka yanapaqninkunata qayaykur David nirqan: “Carmelman aywaykur Nabalta jutïcho winchikur 6 niyanki: ‘Castaykita y qamtapis Tayta Dios yanapaykuyälläshuy. Tsaynöpis llapan aruynikikunacho yanapaykulläshuy. 7 Tayta Nabal, üshaykita rutuykätsinqaykitami David musyashqa. Carmel particho üsha mitsiqnikikuna noqakunawan kayanqan witsan manami paykunapa imantapis yatapäyarqätsu ni ajanätsiyarqätsu. 8 Wätaynikikunata tapuptikipis niyanqänöllami niyäshunki. Davidqa kuyay tsurikinöshi kaykan. Tsaymi fiestacho kaykäyanqaykita musyar rugakushurniki kachayämashqa voluntänikipita imallatapis apatsiyämänaykipä’ ”.

9 David tsaynö yätsiskiptinmi yanapaqninkuna Nabal kaqman chaykur ninqannölla willayarqan. Tsaypitanami imata ninantapis shuyaräyarqan. 10 Tsaymi Nabal nirqan: “¿Pitä tsay Davidqa? ¿Pitä Isaípa^b tsurinqa? Payqa patronninpita qeshpiykurmi tsaynö puriykan. Kanan witsanqa wätaykuna atskaqmi tsaynö puriyan. 11 Üsha rutuqnïkunallapämi tantata ruratsishqä, yakuta kamaripashqä y aytsata kusinakatsishqä. Mana reqinqä purikuq runakunataqa imatapis manami qarämantsu”.

12 Tsaynö niptinmi Davidpa yanapaqninkuna jinaylla kutikuyarqan. Chaykurnami Nabal imata ninqankunatapis willayarqan. 13 Tsaymi David pasaypa ajanarnin espädanta kamarikuskir paywan kaykaq runakunata nirqan: “¡Llapaykikuna espädaykikunata kamarikuyay!”

Tsaypitanami chusku pachak (400) runakunawan Nabal kaqman David aywarqan. Ishkay pachak (200) runakunanami campamentuta täpar quëdayarqan.

14 Tsayman aywaykäyanqanta musyaskirmi Abigailta Nabalpa juk wätaynin nirqan: “Tsunyaq jirkapitami willakuqninkunata David kachamushqa patronnïta winchikuyänanpä. Paykunatami pasaypa ajashqa patronnï ollqutupashqa. 15 Mitsikur puriyaptï paykunaqa allimi yanapayämashqa. Manami ajanätsiyämashqatsu ni imäkunatapis qechuyämashqatsu. 16 Tsaypa rantinqa junaqpa paqaspapis imapis mana päsayämänanpämi noqakunata y üshäkunata cuidayämashqa. 17 Capazchi patronnïtapis noqantsiktapis David ushakätsimäshun. Runaykiqa malgeniu karmi imata nishqapis cäsumäshuntsu. Kananqa shumaq yarpachakuy imata ruranaykipäpis”.

18 Tsaynö willaptinmi Abigailqa ras kamarirqan ishkay pachak (200) tantata, ishkay uyllu vïnuta, pitsqa kankashqa üsha aytsata, kimsa arröba pullan trïgu kamtsata, juk pachak (100) päsas tantata y ishkay pachak (200) hïgus tantata.^c Tsaynö kamariskirmi ashnukunaman chaqnakurqan. 19 Nirkurmi wätayninkunata nirqan: “Cargakunata qatikurkur puntayay. Jikpallaykikunatami shamushä”.

Tsaykunataqa runan Nabalta mana willayllapami rurarqan. 20 Ashnun muntashqa pakayllapa jallqapita uraykämunqanchömi Abigail rikarqan runakunata pushashqa David shamuykaqta. 21 Davidnami yarpachakur aywaykarqan: “Manakaqllapächi tsunyaq jirkacho Nabalpa imaykantapis mana yataypa täpashqä. Nabalqa malgeniu karmi tsaynö yanapaykaptïpis yanapamayta munantsu. 22 ¡Nabalwan kaykaq llapan runakunata waray tuta mana wanutsiptïqa Tayta Dios pasaypa castigamätsun!”

23 Davidwan tinkuskirnami Abigailqa ashnunpita yarpuskir urkunpis patsaman töpanqanyaq Davidpa puntanman qonqurikuykurqan. 24 Tsaynö qonqurikuykurmi nirqan: “Taytay, runä mana yarpachakuypa llutanta parlanqanpita perdonaykallämay. Kanan rugakunqäta wiyaykallämay. 25 Nabalqa jutinmanmi malgeniu.^d Payqa imaypis llutankunatami parlan. Taytay, payta ama cäsupaytsu. Noqaqa kachamunqayki runakunata manami rikashqätsu.

26 “Tayta Dios manami munashqatsu llapäkunata wanutsiyämänaykita. Nabalta castigananpä kanqannölla llapan chikishuqnikikunatapis Tayta Dios castigaykullätsun. 27 Taytay, kay apamunqä mikuyta compañashuqniki runakunawan mikurkuyällay. 28 Noqatapis perdonaykallämay. Tayta Dios raykuq pelyar purinqaykipitami Israel runakunapa mandaqnin rey kanki. Qampita aywaraqkunapis reymi kayanqa. Kawanqaykiyaqqa manami pipis yatayllapis yatashunkitsu. 29 Pipis wanutsishunaykipä qatikachäshuptikiqa Tayta Diosmi tsapäshunki. Warakawan rumita warakaqnömi chikishuqniki runakunata jukläman qarqunqa. 30 Tayta Dios awnishunqaykita cumplirmi Israel runakunapa mandaqnin rey kanaykipä churashunki.

31 “Kanan noqakunata wanutsiyämarqa rey kayman yaykurmi pësakur ninki: ‘¿Imanirtä tsay runakunata wanutsishqä? ¿Imanirtä shuyashqätsu kikin Tayta Dios paykunata juzgananpä?’ Taytay, rey kanaykipä Tayta Dios churashuptiki noqallätapis yarparkallämanki”.

32 Davidnami nirqan: “¡Israel runakunapa Tayta Diosnin alabashqa kaykullätsun! Paymi kanan tinkunantsikpä kachamushushqayki. 33 Runakunata mana wanutsinäpämi kanan junaq tsapämashqayki. Tayta Diospa makinman kachaykunäpa rantin runakunata wanutsirqa llutantami ruräman karqan. Alli yarpayyuq kanqaykipita Tayta Dios yanapaykulläshuy. 34 Ras mana shamuptikiqa Nabalpa castan kaqta llapantami wanushqata warätsimüman karqan. Tayta Diosmi kachamushushqayki qamkunata mana wanutsiyänäpä”.

35 Abigail apanqankunata chaskiskirmi David nirqan: “Kananqa mana llakikuypana wayikipa kutikuy. Runaykita manami wanutsishänatsu”.

36 Tsaypita Abigail wayinman kutinanpämi alli allillata kusinaskatsir reynörä fiestata Nabal ruraykänä. Pasaypa machashqa kaptinmi Abigail waraynin tutayaq imatapis willarqantsu. 37 Waraynin tuta machanqanpita kachakaskiptinnami ima päsanqantapis willarqan. Tsayta willaykuptinmi Nabalta atäqui tsariskirqan. 38 Tsaypita chunka junaqllatanami Tayta Diospa castïgunwan wanukurqan.

39 Nabal wanunqanta musyaskirmi David nirqan: “¡Tayta Dios alabashqa kaykullätsun! Paymi tsapämashqa Nabalta wanutsir jutsata ruranäpä kanqanpita. Manakaqman churamanqanpitami kikin Tayta Dios wanutsishqa”.

Tsaypitanami Abigailta warminpä qoriyta munar yanapaqninkunata David kacharqan yarpanqanta willayänanpä. 40 Carmel partiman chaykurmi Abigailta niyarqan: “Davidmi warmin kanaykipä qorikushuynikita munan”.

41 Tsaynö willayaptinmi urkunpis patsaman chanqanyaq Abigail qonqurikuykur nirqan: “Tayta David tsaynö niptinqa sirviqninkunapa chakin mayllaqllanpis kashächi”.

42 Tsaynö nir ras kamarikuskirmi ashnunta muntakurkur y pitsqa sirviqnin jipashkunata pushakurkur Davidpa yanapaqninkunawan Abigail aywarqan. Tsaynöpami Davidpa warminna karqan.

43 Tsaynöllami Jezreel markapita Ahinoam warmiwanpis David tarqan. 44 Davidpa warmin Micaltanami taytan Saúl tätsirqan Laispa tsurin Paltiwan. Paltiqa Galim markapitami karqan.