Saúlta David mana wanutsinqan
24
(2) Filisteo runakunata vinciskir Saúl kutiykaptinmi willayarqan En-gadi tsunyaq jirkacho David kaykanqanta. 2 (3) Tsaymi Israel runakunapita kimsa waranqa (3,000) allinnin kaq soldädukunawan munti cabrakuna purikuyänan qaqakunaläpa Davidta ashirnin Saúl aywarqan. 3 (4) Aywaykäyanqanchömi üsha qenchakuna ñöpancho jatun machayman chäyarqan. Tsay machaychömi yanapaqnin runakunawan David pakaraykäyarqan. Machaycho David kaykanqanta mana musyarmi ishpakuq Saúl yaykurqan.4 (5) Saúlta rikaykurmi Davidwan kaykaq runakuna niyarqan: “Kanan junaqmi Tayta Dios cumplishqa contraykita makikiman churamunanpä ninqanta. Tsaynö kaykaptinqa yarpanqaykinö imatapis ruray”.
Tsaymi yachayllapa David aywaykur Saúl ishpakuykaptin tünicanpa kuchunta mana mayatsiyllapa roquskirqan.
5 (6) Tsayta ruraskirmi llutanta ruranqanta tantiyar David pasaypa llakikurqan. 6 (7) Tsaymi yanapaqnin runakunata nirqan: “Qamkuna yätsiyämanqaykita ruranäpä Tayta Dios ama munaykutsuntsu. Kikin Tayta Dios Saúlta rey kananpä akraykaptinqa noqapapis mandamaqnïmi kaykan. Tsaymi paytaqa yatayllapis yatashätsu”.
7 (8) Tsaynö nirmi yanapaqnin runakunata David micharqan Saúlta mana wanutsiyänanpä. Saúlnami ishpakuskir machaypita aywakurqan.
8 (9) Karu qepallanta machaypita David yarquskirmi qayakur nirqan: “¡Rey Saúl!”
Saúl tikraykur rikaskiptinmi urkunpis patsaman töpanqanyaq David qonqurikuykur 9 (10) nirqan: “Contrayki shärinqäta runakuna niyäshuptiki ¿imanirtä criyinki? 10 (11) Kananqa Tayta Diosmi ñöpäman pushamushushqayki. Contrayki rasunpaypa karqa kay machayllachönami wanutsïman karqan. Yanapamaqnï runakuna qamta wanutsinäpä nimaptinpis manami wanutsishqätsu. Tsaypa rantinqa rey kanaykipä Tayta Dios akrashunqaykipitami imaypis yatashaykitsu. Tsaytaqa kikikimi rikaykanki.
11 (12) “Taytay, kay tsaraykanqä ratashta rikay. Kay ratashqa ¿manaku tünicaykipa kuchun? Wanutsiyta munarqa tünicaykipa kuchunta roquqnöllami wanuskatsïman karqan. Tsaynö kaykaptinqa tantiyakuy wanutsiyta mana yarpanqäta ni contrayki mana kanqäta. Tsaynö kaykaptïpis ¿imanirtä wanutsimayta munar qatikachaykämanki? 12 (13) Mayqantsikpis jutsayuq kashqaqa Tayta Dios castigamäshun. Noqaqa manami imaypis wanutsishaykitsu.
13 (14) “Unay runakunami niyaq: ‘Mana alli runapitami mana allikuna kaykan’. Tsaymi noqaqa ni imaypis wanutsishaykitsu. 14 (15) Pulganö y allqunö mana väliq kaykaptïqa ¿imanirtä qatikachaykämanki? 15 (16) Mayqantsikpis jutsayuq kashqaqa Tayta Diosmi juzgamäshun. Payqa musyanmi imata yarpanqätapis. Paymi makikipita salvamanqa”.
16 (17) David parlayta ushaskiptinmi Saúl nirqan: “¡David! ¿Rasunpaku qam kaykanki?”
Tsaynö nirmi qayarayparä waqar 17 (18) nirqan: “Pasaypa chikiykaptïpis alli runa karmi kuyapämashqayki. 18 (19) Tayta Dios qampa makikiman churaykämaptinpis manami wanutsimashqaykitsu. Tsaymi kanan musyä kuyamanqaykita. 19 (20) Manami pï runapis contranta tariykurqa kawaykaqta kachaykuntsu. Tsaynö kaptinpis qamqa kuyamarmi wanutsimashqaykitsu. Mana wanutsimanqaykipita Tayta Dios imaykachöpis yanapaykulläshuy.
20 (21) “Kananmi itsanqa tantiyakü rey kanaykipä kanqanta. Rey kaptiki Israel runakuna allimi kawayanqa. 21 (22) Tayta Dios wiyaykämashqa kanan awnimay rey kar castäkunata mana wanutsinaykipä ni jutïtapis mana ushakätsinaykipä”.
22 (23) Tsaynö niptinmi Davidqa Saúlta awnirqan castankunata mana wanutsinanpä. Tsaypitanami Saúl kutikurqan palaciunman y Davidpis kutikurqan pakaranqanman.