Keila markata David salvanqan
23
Tsaypitanami David musyarqan filisteo runakuna Keila markata atacar tsayrä trillayanqan trïguta qechur apayanqanta. 2 Tsaymi Tayta Diosta tapukur nirqan: “¿Taytay, filisteo runakunawan pelyaq aywayämanku?”Tsaymi Tayta Dios nirqan: “Aywayay filisteo runakunata atacar Keila markata salvayänaykipä”.
3 Tsaynö ninqanta willaptinmi Davidta yanapaq runakuna aywayta mana munar niyarqan: “Kay Judácho mantsariykarqa ¡masrächi mantsarishun Keila markaman aywar filisteo runakunapa soldädunkunawan pelyayta!”
4 Tsaymi David yapay Tayta Diosta mañakur tapuptin nirqan: “Keila markaman aywayay. Filisteo runakunata vinciyänaykipä noqami yanapayäshayki”.
5 Tsaynö niptinmi yanapaqnin runakunawan Keila markaman David aywarqan. Tsaychömi filisteo runakunata vincir Keila markacho taq runakunata David salvarqan. Tsaynöllami filisteo runakunapa uywankunatapis apakuyarqan.
6 Ahimelecpa tsurin Abiatarmi efodta apakurkur Keila markacho David kaqman Saúlpita qeshpir aywakurqan. 7 Keila markacho David kaykanqanta musyaskirmi Saúl kushikur nirqan: “Davidqa corralashqa markacho kar manami maypapis qeshpinqatsu. Tsaynöpami makïman Tayta Dios churamushqa”.
8 Tsaymi jinan höra Saúl kacharqan llapan soldädunkunata Keila markaman aywaykur yanapaqninkunatawan Davidta corralaskir prësu tsariyänanpä. 9 Soldädunkunata Saúl kachanqanta willaptinmi sacerdöti Abiatarta David nirqan: “Efodta apamuy”.
10 Apapaykuptinmi Tayta Diosta David tapukur nirqan: “Israel runakunata kuyaq Tayta Dios, wiyashqämi Saúl shamur kay markata ushakätsinanpä kanqanta. Kaycho kanqäta musyarmi tsaynö yarpan. 11 ¿Rasunpaypatsurä willayämanqannö kay markaman Saúl shamunqa? ¿Kaycho taq runakuna makinmantsurä entregayämanqa? Tayta Dios, imanö kananpä kaqtapis willaykallämay”.
Tsaymi Tayta Dios nirqan: “Rasunpami Saúl shamunqa”.
12 Tsaynö niptinmi yapay David tapukurqan: “¿Yanapamaq runakunatawantsurä Keila marka runakuna Saúlpa munayninman entregayämanqa?”
Tsaynö niptinmi Tayta Dios nirqan: “Awmi, entregayäshunkimi”.
13 Tsaynö niptinmi yanapaqnin runakunawan tsay markapita David aywakur jallqan jallqan puriyarqan. Yanapaqnin runakunaqa soqta pachakmi (600) kayarqan. Aywakuyanqanta musyaskirmi Saúlqa Keila markaman aywarqannatsu.
Tsunyaq jirkacho David pakaranqan
14 Tsaynöpami Zif niyanqan tsunyaq jirkaman chaykur yanapaqninkunawan qaqakunacho y machaykunacho David täkurqan. Tayta Dios tsapaptinmi qoyay qoyay ashirpis Saúl tarirqantsu.
15 Zif tsunyaq jirka Horescho kaykaptinmi Davidta willayarqan wanutsinanpä Saúl aywaykanqanta. 16 Saúlpa tsurin Jonatánnami David kaqman aywaykur shakyätsirqan Tayta Diosman imaypis yärakunanpä. 17 Tsaymi nirqan: “Ama mantsariytsu. Mayjina ashishurnikipis taytä manami tarishunkitsu. Israel runakunapa mandaqnin rey kaptiki noqami yanapashayki. Tsaytaqa taytäpis musyanmi”.
18 Tsay junaqmi Tayta Diospa jutincho pactuta yapay rurayarqan imaypis yanapanakuyänanpä.† Nirkurmi Jonatánqa wayinpa kutikurqan y Davidnami Horescho quëdakurqan.
19 Tsaypitanami Zifcho taq runakuna Gabaa markaman aywaykur Saúlta willar niyarqan: “Haquila jirkacho Hores qaqakunachömi David pakaraykan.† Tsayqa tsunyaq jirkapita sur kaqläpami kaykan. 20 Taytay, munanqayki höra soldäduykikunawan shayämuy. Shayämuptikiqa tsay runata tsarishiyäshaykimi”.
21 Tsaymi Saúl nirqan: “Kuyapäyämanqaykipita Tayta Dios yanapaykuyälläshuy. 22 Tsay runa alläpa astütu kanqantami niyämashqa. Tsaynö kaptinqa aywayay pï rikanqanta y maynincho pakaranqanta shumaq musyayämunaykipä. 23 Maynincho pakaranqantapis shumaq rikapakaskamur willayämaptikimi qamkunawan tsarimunäpä aywashä. Judá particho rasunpa kaptinqa kuchu kuchumi tarinqäyaq ashishä”.
24 Tsaypitanami Zifcho taq runakuna Saúl kaqpita markankunaman kutikuyarqan. Davidnami yanapaqnin runakunawan kaykäyarqan Maón tsunyaq jirkapita sur kaqlächo. Tsayqa Arabá pampachömi kaykan. 25 Yanapaqnin runakunawan Saúl aywaykäyanqanta musyaskirmi Maón tsunyaq jirkacho kaykaq jatun qaqaman pakakunanpä David aywarqan. Tsayta musyaskirmi Saúlpis Davidta qatipar tsayman aywarqan. 26 Tsaymi jirka washa waqtanpa Saúl aywaptin Davidqa yanapaqninkunawan kay waqtanpa qeshpiyarqan. Saúlnami soldädunkunawan Davidta tsariyänanpäna jiruruypa tsapaskiyarqan. 27 Tsayman juk willakuq chaykurmi Saúlta nirqan: “¡Taytay, ras kutiy! ¡Filisteo runakunami nacionnintsikman yaykayämushqa!”