Adulam machaycho David pakakunqan
22
Tsaypita aywakurmi Adulam machayman David pakakurqan.† Tsaycho kaykanqanta wawqinkuna y wakin castankunapis musyaykurmi pay kaqman aywayarqan. 2 Tsaynöllami payman takukäyarqan muchuqkuna, jaqa tukuqkuna y qallayashqa runakunapis. Tsaynöpami Davidpa munaynincho chusku pachak (400) runakuna kayarqan.3 Tsaypita Moab nacioncho Mizpa markaman David aywakurmi tsay markapa mandaqnin reyta rugakur nirqan: “Tayta Dios imanö kanäpäpis musyatsimanqanyaq taytäwan mamä markaykicho taykäyällätsun”.
4 Rugakunqanta awniptinmi machayllacho David pakaranqanyaq Moab nacionpa mandaqnin reypa makincho mamanwan taytan täyarqan. 5 Tsaypitanami Tayta Diospa profëtan Gad Davidta nirqan: “Kayllachöqa manami pakarankimantsu. Judá partiman kutikuy”.
Tsaynö niptinmi Haretcho kaykaq muntiman David aywakurqan.
Nob markacho taq sacerdötikunata Saúl wanutsinqan
6 Tsaypitanami Judácho David kaykanqanta Saúl musyarqan. Tsay junaqmi Gabaacho jirkanman Saúl aywaykur tamarisco jacha chakincho lanzan aptashqa jamaykarqan. Paywanmi soldädunkunapa llapan capitanninkunapis kaykäyarqan. 7 Paykunatami Saúl nirqan: “¡Benjamín trïbu runakuna, shumaq wiyayämay! ¿Üva plantashqa chakrakunata y wakin chakrakunatapis Isaípa tsurina qoyäshunaykipä kanqantaku criyiyanki? ¿Tsaynöpis juk waranqa (1,000) soldädunkunapa o juk pachak (100) soldädunkunapa mandaqninkuna churayäshunaykipä kanqantaku criyiyanki? 8 ¡Tsaynö kaptinpis qamkunaqa llapaykimi conträ shäriyashqayki! Tsaymi mayqaykipis willayämashqaykitsu Isaípa tsurinwan tsurï Jonatán imaypis yanapanakuyänanpä pactuta rurayanqanta. Manami mayqaykipis willayämashqaykitsu wätaynïb conträ shärinanpä kikïpa tsurï yanapaykanqanta. Tsaymi kananqa wanutsimänanpä ashiykäman”.
9 Edom nacionpita Doeg runapis Saúlpa capitanninkunawanmi tsaycho kaykarqan. Paymi nirqan: “Isaípa tsurintaqa Nob markachömi Ahitobpa tsurin Ahimelecwan parlaykaqta rikashqä. 10 Imata rurananpä kanqanta David musyayta munaptinmi Tayta Diosta Ahimelec mañakuskir mikuytapis y Goliatpa espädantapis kamaripashqa”.†
11 Tsaynö niptinmi Ahimelecta y llapan sacerdöti mayinkunatapis Nob markapita Saúl qayatsimurqan. Paykunaqa tsay castallami llapan kayarqan. Chaykuyaptinmi 12 Saúl ajashqa nirqan: “¡Ahitobpa tsurin, shumaq wiyamay!”
Niptinmi Ahimelec nirqan: “Taytay, qampa makikichömi kaykä”.
13 Tsaymi Saúl nirqan: “¡Imanirtä conträ shärinanpä Isaípa tsurinwan parlashqayki! ¿Mikuytawan espädatapis allimi kamaripashqayki, aw? Tsaynöpis Tayta Diostami mañakushqayki payta yanapananpä. Tsaymi kananqa wanutsimänanpä ashiykäman”.
14 Ahimelecnami nirqan: “¿Imanirtä contrayki shärinqanta yarpanki? ¿Manaku llapan capitannikikunapitapis Davidqa mandanqaykikunata cumplin? Payqa mashaykimi kaykan. Tsaynöpis cuidashuqniki soldädukunapa capitannin kaptinmi pïmaypis palaciuykicho payta respitayan. 15 Taytay, manami kananrätsu paypä Tayta Diosta mañakü. David contrayki shärinqantapis manami musyashqätsu. Mana musyaykaptïqa noqata ni castäkunatapis ama tumpayämaytsu”.
16 Tsaymi pasaypa ajarnin Saúl nirqan: “¡Ahimelec, kananmi itsanqa llapan castaykikunawan wanuyänaykipä hörayki chämushqa!”
17 Tsaynö nirmi rey Saúlqa cuidaqnin soldädukunata nirqan: “¡Tayta Diosta sirviq sacerdötikunata wanutsiyay! Paykunapis Davidpa favorninmi kaykäyan. David qeshpinqanta musyaykarpis paykunaqa manami willayämashqatsu”.
Tsaynö niptinpis sacerdötikunata manami wanutsiyta valurayarqantsu. 18 Tsaymi rey Saúlqa Edom casta Doegta nirqan: “¡Qam wanutsiy!”
Tsaynö niptinmi puwaq chunka pitsqa (85) sacerdötikunata wanutsirqan. Tsay sacerdötikunaqa llapanmi lïnupita rurashqa efodnin jatishqa kayarqan. 19 Tsaypitanami Nob markaman aywaykur Doegqa sacerdötikunapa castankunata ollqutapis, warmitapis, wamratapis y llullukunatapis espädanwan wanutsirqan. Tsaynöllami tsay sacerdötikunapa wäkankunata, ashnunkunata y üshankunatapis wanutsirqan.
20 Ahimelecpa tsurin Abiatarmi itsanqa qeshpir David kaqman aywarqan. 21 Chaykurmi willarqan Saúl mandaptin Tayta Diosta sirviq sacerdötikunata wanutsiyanqanta. 22 Tsaynö willaptinmi David nirqan: “Edom casta Doegta Nobcho rikar maliciarqämi Saúlta willananpä kanqanta. Castaykikunata wanutsiyänanpä noqami jutsayuq kä. 23 Ama mantsariytsu. Kananqa kaycho noqakunawan quëdakuy. Noqawan kaykaptikiqa manami pipis wanutsishunkitsu. Ishkantsiktami wanutsirqa wanutsimäshun”.