Saúlpita David qeshpir aywakunqan
21
(2) Tsaypitanami Nob markaman aywar Ahimelec sacerdöti kaqman David charqan.† Chaykuptinmi Davidta rikaykur Ahimelec mantsakarnin nirqan: “¿Imatä kashqa? ¿Imanirtä japallayki shamushqayki?”2 (3) Davidnami nirqan: “Rey Saúlmi kachamashqa pitapis mana willayllapa yarpanqankunata ruranäpä. Yanapamaq runakunawanqa juklächo tinkuyänäpämi jitapänakuyashqä. 3 (4) Taytay, ¿imallaykipis mikurkunäpä kanku? Pitsqa tantallatapis o imallatapis qaraykallämay”.
4 (5) Tsaynö niptinmi sacerdöti Ahimelecqa nirqan: “Tsararanqä tantaqa manami común tantatsu, sinöqa Tayta Diospä churanqä tantallami kaykan.a Shuyäshunaykipä jitapanqayki runakuna warminkunawan mana punushqa kayaptinqa tsay tantata kamaripäshayki”.b
5 (6) Davidnami nirqan: “Imaypis guërraman aywayänäpä kaptinqa manami warmiwan punuyätsu. Kananpis manami warmiwan punuyashqätsu. Tsaymi yanapamaq runakunapis püru kaykäyan”.
6 (7) Tsaynö niptinmi común tanta mana kaptin Tayta Diospä churanqan tantakunata sacerdöti entregarqan.† Tsay kamaripanqan tantakunataqa tsay junaqrämi trukatsishqa karqan tsayrä masarashqa tantakunawan.
7 (8) Tsaychömi Edom nacionpita Doeg jutiyuq runa Diosta mañakur kaykarqan. Payqa Saúlpa üsha mitsiqninkunapa capatazninmi karqan.
8 (9) Davidnami Ahimelecta nirqan: “¿Lanzayki o espädayki mañamänaykipä kanku? Rey Saúl ras kachamaptinmi tiempü kashqanatsu espädata o ima armatapis apamunäpä”.
9 (10) Tsaynö niptinmi sacerdöti nirqan: “Ela pampacho filisteo runata wanutsinqayki Goliatpa espädallanmi kaycho kaykan.† Tsayqa efodpa qepancho capötïwan pitushqami churaraykan. Ministirqa tsayta apay. Tsaypita mastaqa manami ima armatapis tsararätsu”.
Davidnami nirqan: “Taytay, tsayta qoykallämay. Tsaymanqa manami ni ima espädapis tinkuntsu”.
10 (11) Tsay junaqmi Saúlpita qeshpir Gat markapa mandaqnin rey Aquisman David aywakurqan.c 11 (12) Tsayman chaykuptinmi Aquispa capitanninkuna Davidta niyarqan: “¡Payqa Israel runakunapa mandaqnin rey Davidmi! ¿Manaku paypä kushikurnin cantar niyarqan: ‘Juk waranqa (1,000) runakunatami Saúl wanutsishqa. Davidmi itsanqa chunka waranqa (10,000) runakunata wanutsishqa’ nir?”†
12 (13) Tsaynö parlayanqanta musyaskirmi Gat markapa mandaqnin rey Aquista David mantsarqan.† 13 (14) Tsaymi pasaypa löcu tukur† wayipa punkunkunachöpis imaykata llutalla raspar qellqarqan. Tsaynöpis shapran jananpami lawsantapis jututsirqan.