Davidta Jonatán yanapanqan
20
Tsaypitanami Ramá cercan Naiot markapita David qeshpir Jonatán kaqman chaykur nirqan: “¿Ima jutsatatä rurashqä? ¿Imachötä taytaykita ajanätsishqä wanutsimayta munananpä?”2 Jonatánnami nirqan: “¡Manami wanutsishunkitsu! Taytäqa imata rurananpä kaqtapis willamanrämi. Wanutsishuynikita munarqa ¿imanirrä willamashqatsu? Payqa manami wanutsishunkitsu”.
3 Davidnami nirqan: “Kuyanakunqantsikta musyarmi llakikunaykita mana munar taytayki willashushqaykitsu. Tayta Diospis musyanmi awja puntallapana qeshpimunqäta”.
4 Tsaynö niptinmi Jonatán nirqan: “Tsaynö kaptinqa qamta yanapanäpä ¿imatatä ruräman?”
5 Tsaymi David nirqan: “Waraymi llullu killa fiesta kanqa.† Tsay fiestachöqa imaypis taytaykiwanmi mësacho jamakuq kä. Warayqa manami fiestaman aywashätsu. Tsaypa trokinqa chakraman aywaykurmi warantin tardiyaq pakaräshä. 6 Fiestacho taytayki noqapä tapushuptikiqa ninki: ‘Belénchöshi castankuna cada wata fiestata rurar sacrificiuta rupatsiyan. Tsayman aywananpämi permïsuta mañakamashqa’. 7 ‘Allimi aywashqa’ nishuptikiqa manami mantsarishänatsu. Ajaptinmi itsanqa qampis musyanki rasunpa wanutsimayta munanqanta”.
8 Mastami David nirqan: “Imaypis yanapanakunapämi Tayta Diospa ñöpancho pactuta rurashqantsik. Tsaymi kanan rugä jutsata rurashqa kaptïqa kikiki wanutsimänaykipä. Ama taytaykimanqa apamaytsu”.
9 Jonatánnami nirqan: “¡Tsaykunata ama yarpaytsu! Taytä wanutsishunaykipä yarpanqanta musyarqa imanöpapis willashaykimi”.
10 Tsaymi David nirqan: “¿Pirä willamanqa taytayki imatapis ajar nishunqaykita?”
11 Jonatánnami nirqan: “Aku chakrapa aywashun”.
Tsaynö nirmi ishkan aywayarqan. 12 Chakraman chaykurnami Jonatán nirqan: “Yärakunqantsik Tayta Diospa jutinchömi awnï taytä imata yarpanqantapis waray o warantin kaynö höra qamta musyatsinäpä. Qampä mana ajanaptinqa jukllami willatsimushayki. 13 Tsaynöpis ajar contrayki parlaptinqa ayqikunaykipämi willatsimushayki. Mana willakatsimuptïqa Tayta Dios castigamätsun. Taytäta yanapanqannölla qamtapis Tayta Dios yanapaykulläshuy”.
14 Mastami Jonatán nirqan: “Kawaykaptïräqa Tayta Dios kuyapäshunqaykinö noqatapis kuyapaykallämanki. 15 Tayta Dios contraykikunata ushakätsiptinpis castäkunata kuyapaykullanki. 16 Llapan contrayki kaqtaqa Tayta Dios juzgar chipyaq ushakätsitsun”.
Tsaynö nirmi Davidwan Jonatán pactuta rurayarqan awninakuyanqanta imaypis cumpliyänanpä.† 17 Tsaypitami Davidta pasaypa kuyarnin imaypis mana jaqinakuyänanpä yapay awninakuyarqan.
18 Tsaymi Jonatán nirqan: “Waray junaq llullu killa fiestacho mikuy höra jamakunqaykicho mana kaptikimi taytä watukashunki. 19 Warantin junaqna puntata pakakunqaykiman aywar Ezel rumi waqtallanman pakakunki. 20 Tsayman shamuykurmi yachakuq tumpalla kimsa kuti flëchamushä pakaraykanqayki kaqläman. 21 Tsaypitanami pushamunqä sirvimaqnïta tsay flëchamunqäkunata qorimunanpä nishä. ‘Flëchakuna kaylächömi kaykan; tsayta qorimuy’ niptïqa mana mantsariypa yarqamunki. Tayta Diospa jutinchömi awnï imapis mana päsashunaykipä kanqanta. 22 ‘Mas washalächömi flëcha kaykan’ niptïqa musyanki aywakunaykipä Tayta Dios munanqanta. 23 Kanan parlanqantsikta cumplinantsikpämi Tayta Dios testïgu kaykan”.
24 Tsaymi willanakuyanqannölla David aywar pakakurqan. Waraynin junaq llullu killa kaptinmi fiestata rurar rey Saúl mikunanpä jamakurqan. 25 Costumbrin kanqannömi Saúlqa pirqa kaqläpa jamakurqan. Jonatánnami jamakurqan Saúlpa frentinman. Abnernami jamakurqan Saúlpa lädunman. David jamakunan kaqmi itsanqa jäkurqan. 26 Tsay junaqmi Saúl yarpayllancho nirqan: “Davidtaqa imallapis päsashqami kanqa. Tsaychi impüru kar shamunrätsu”.†
27 Waraynin junaqpis Davidta mana rikarmi Jonatánta tapur nirqan: “¿Imanirtä qäyanpis ni kananpis Isaípaa tsurin mikuq shamushqatsu?”
28 Jonatánnami nirqan: “Belénman aywananpämi permïsuta mañakamashqa. 29 Tsaychöshi castankuna sacrificiuta rupatsir fiestata ruraykäyan. Tsay fiestacho kananpäshi wawqin qayatsishqa. Tsaynöpis nimashqa tsayman aywaqnölla castankunata watukananpä kanqantami. Tayta, tsaynöpami mikuq shamushqatsu”.
30 Tsaynö niptinmi Saúl pasaypa ajarnin nirqan: “¡Supaypa wachaynin! Isaípa tsurinwan pasaypa kuyanakuyanqaykita ¿mana tantiyanqätaku yarpanki? Tsaynö karqa penqakuypämi kaykanki. Mamaykitapis penqakuymanmi churaykanki. 31 David kawanqanyaqqa manami imaypis rey kankitsu. ¡Maypitapis wanutsinäpä ras apamuy!”
32 Tsaymi Jonatán nirqan: “¿Ima jutsatatä rurashqa wanutsinaykipä?”
33 Tsaynö niptinmi pasaypa ajarnin tsurin Jonatán jananpa lanzanta Saúl jitaskirqan. Tsaynö ruraptinmi Jonatán tantiyarqan rasunpaypa Davidta wanutsiyta munanqanta. 34 Tsaymi pasaypa ajarnin mikuytapis jaqiriykur mësapita shäriskir aywakurqan. Davidpä tsaynö juraptinmi pasaypa llakikurqan.
35 Waraynin tutanami willanakuyanqannölla David pakaraykanqan kaqman Jonatán aywarqan. Tsayman aywarmi juk sirviqnin jövinta pusharqan. 36 Tsaymi tsay sirviqninta nirqan: “Ayway flëchanqä flëchakunata qorimunaykipä”.
Tsaynö niptinmi tsay sirviqnin cörrirqan qorimunanpä. Tsaymi jövin jananpa flëcharqan mas washaqläman chänanpä. 37 Flëcha jitanqan kaqman chaykaptinnami Jonatán qayakur nirqan: “¡Mas washachörämi flëcha kaykan!”
38 Tsaypitanami Jonatán yapay nirqan: “¡Mana ichiypa juklla cörrir ayway!”
Niptinmi wätaynin qoriskamur flëchakunata Jonatánman aparqan. 39 Tsay sirviqninqa imanir tsaynö ninqantapis manami tantiyarqantsu. Tsaytaqa Jonatánwan Davidllami musyayarqan.
40 Tsaypitanami sirviqnin jövinta flëchankunata aptarkatsir markapa kutikunanpä kacharqan. 41 Sirviqnin aywaskiptinnami pakaraykanqanpita David yarqaskamur Jonatánpa ñöpanman kimsa kuti qonqurikurqan urkunpis patsaman töpanqanyaq. Tsaypitami ishkan makallanakurkur waqayarqan. Davidmi Jonatánpitapis mas waqarqan. 42 Tsaymi Davidta Jonatán nirqan: “Ama llakikuytsu. Imaypis kuyanakunantsikpämi Tayta Diospa jutincho awninakushqantsik. Noqantsikpis wamrantsikkunapis mana cumplishqaqa Tayta Diosmi juzgamäshun”.
(21.1) Tsaynö willanakurnin despidinakuskirmi David aywakurqan y Jonatánpis markaman kutikurqan.