4 Tsay ninqannöllami waränin tuta Jonatánqa Davidpa janan shärir taytanta nirqan: “Tayta, ¿imanirtä yanapashuqniki Davidta wanutsiyta munaykanki? Payqa manami imaypis contrayki shärishqatsu. Tsaypa trokinqa llapanchöpis yanapaykäshunkimi. 5 Wanuytapis mana mantsaypa Goliatta wanutsiptinmi filisteo runakunapita Israel runakunata Tayta Dios salvashqa. Goliatta vinciskiptinmi kikikipis kushikurqayki. Jutsaynaq kaykaptinqa ¿imanirtä Davidta wanutsiyta yarpanki?”

6 Jonatán ninqankunata tantiyakurmi Saúl nirqan: “Rasunpapis Davidta manami wanutsïmantsu. Payta mana wanutsinäpä Tayta Diospa jutinchömi jurä”.

7 Tsaypitanami Jonatánqa Davidta qayaykatsir taytan ninqankunata willarqan. Nirkurnami taytan kaqman pushaptin ñöpata yanapanqannö Saúlta yapay David yanaparqan.

8 Yapay guërra kaptinmi soldädunkunata pushakurkur filisteo runakunawan pelyaq David aywarqan. Tsaycho mantsariypä atacayaptinmi filisteo runakuna qeshpir aywakuyarqan.

9 Tsaypita juk junaqnami wayincho lanzan aptashqa Saúl kaykaptin Tayta Dios kachanqan supay yapay löcuyätsirqan. Tsaymi David arpata tukaykaptin 10 wanutsiyta munar lanzanta Saúl jitaykurqan. David witiskiptinmi lanza päsar pirqaman jatikaskirqan. Tsaymi jinan höra David qeshpir aywakurqan.

11 Tsaymi soldädunkunata Davidpa wayinman kachar Saúl nirqan: “Wayinpita mana qeshpinanpä ras aywar täpayay. Patsa waraskiptin wayinpita yarqaykämuqta ras wanutsiyanki”.^†

Taytan tsaynö ninqanta musyaskirmi Davidta warmin Mical nirqan: “Kanan paqas mana qeshpiptikiqa waray junaq wanutsishunkimi”.

12 Tsaynö nir waskawan warkuypa ventänapa yarpuskatsiptinmi Davidqa qeshpir aywakurqan. 13 Micalnami wayincho kaykaq juk ïduluta Davidpa cämanman punuykatsirqan. Cabra aqtsapita awashqa jawnata ïdulupa umanman churapaskirmi qatarkurqan. 14 Tsaymi Saúl kachanqan soldädukuna Davidpa wayinman chäyaptin Mical nirqan: “Davidqa qeshyaykanmi”.

15 Kutiykur David qeshyaykanqanta willayaptinmi Saúl yapay kachar nirqan: “¡Cämancho kaykaqta jipiskir wanutsinäpä kayman apayämuy!”

16 Tsaynö niptinmi soldädukuna aywar Davidpa cämancho tariyarqan cabra aqtsapita awashqa jawnan jawnakushqa ïdulu jitaraykaqta. 17 Tsaynö tariyanqanta willayaptinmi Micalta qayaykatsir Saúl nirqan: “Conträta qeshpiskatsir ¿imanirtä llullapämashqayki?”

Tsaymi Mical nirqan: “ ‘Wanuskatsishaykimi’ nimaptinmi qeshpinanpä kachashqä”.

18 David qeshpirmi Ramá markaman aywar Samuel kaqman charqan. Tsaychömi llapan ima päsanqantapis Samuelta willarqan. Tsaymi Naiot markacho täyänanpä ishkan aywakuyarqan. 19 Ramá markapa cercan Naiotcho David kaykanqanta willayaptinmi 20 soldädunkunata Saúl kacharqan prësu tsariyämunanpä. Naiotman chaykurmi soldädukuna tariyarqan Samuelwan wakin profëtakunapis Diospa willakuyninta willakuykäyaqta. Tsaymi Tayta Diospa Espïritun parlatsiptin tsay soldädukunapis Diospa willakuyninta willakur qallaykuyarqan.

21 Tsaynö päsanqanta musyaskirmi wakin soldädukunatana Saúl kacharqan. Tsaymi paykunapis wakinkunanölla willakur qallaykuyarqan. Soldädunkunata kimsa kutina Saúl kachaptinpis tsaynöllami päsarqan. 22 Tsaymi kikin Saúlna Ramáman aywarqan. Secú ninqancho jatun pözuman chaykurmi runakunata tapukurqan Samuelpä y Davidpä. Tapukuptinmi willayarqan Ramá cercan Naiot markacho kaykäyanqanta. 23 Naiotman aywaykaptinmi Tayta Diospa Espïritun Saúltapis parlatsirqan. Tsaymi Naiotman chanqanyaq Diospa willakuyninta willakuraykar aywarqan. 24 Chaykurmi Tayta Diospa willakuyninta willakurnin latsapanta llushtikuskir tsay junaq y tsay paqas Samuelpa ñöpancho qallapächulla jitararqan. Tsaypita patsami runakuna niyan: “¿Saúlpis Tayta Diospa profëtannaku?”^a