Jonatánwan David jurarnin amistäta rurayanqan
18
Saúlwan parlayta ushaskirmi Davidqa Saúlpa tsurin Jonatánwan reqinakuyarqan. Amïguta ruraskirmi selläma kuyanakuyarqan. 2 Tsay junaqpitami Davidta yanapaqnin kananpä Saúl churarqan. Tsaymi munarqantsu taytan kaqpa kutinanta. 3 Jonatánwan Davidqa alläpa kuyanakurmi imaypis mana dëjanakuyänanpä jurarnin amistäta rurayarqan. 4 Nirkurnami Jonatánqa jatiranqan cäpanta, tünicanta, espädanta, flëchanta y cinturonnintapis Davidta qararqan.5 Imatapis rurananpä mandanqanta David ruraptinmi soldädukunapa capitannin kananpä Saúl churarqan. Tsaymi llapan soldädukuna y Saúlpa yanapaqninkunapis pasaypa kushikuyarqan.
Davidta Saúl chikinqan
6 Goliatta David wanutsinqanpita soldädukuna kutiyaptinmi Israel markakunapita warmikuna tamburninkunata y panderëtankunata tukarnin cantaraykar y tushuraykar rey Saúlta chaskiyänanpä kushishqa yarquyarqan. 7 Warmikunami tushurnin cantar niyarqan: “Saúlmi wanutsishqa juk waranqa (1,000) runakunata. Davidnami chunka waranqa (10,000) runakunata wanutsishqa”.†
8 Tsaynö cantayanqanta wiyarmi pasaypa ajanar Saúl nirqan: “Davidpämi chunka waranqa runakunata wanutsinqanta niyan y noqapänami juk waranqallata wanutsinqäta niyan. ¡Kananqa rey kananpä churayänallannami pishin!”
9 Tsay junaqpitami Saúlqa Davidta chikir qallaykurqan.
10 Tsaypita waraynin junaqnami palaciucho David imaypis arpata tukanqannö tukapaykaptin Tayta Dios kachanqan supay Saúlta pasaypa löcuyätsirqan. Tsaymi aptaraykanqan lanzawan 11 Davidta wanutsiyta munar jitapuykurqan. Cada jitaycho David kinkishaykuptinmi ishkay kuti lanzanta jitarpis chätsirqantsu.
12 Saúlta yanapananpa rantin Davidtana Tayta Dios yanapaptinmi Saúlqa Davidta pasaypa mantsarqan. 13 Tsaymi läduncho kananta manana munarnin juk waranqa (1,000) soldädukunapa capitannin kananpä Davidta churarqan. Tsaymi Davidqa maypapis pelyananpä aywar soldädukunata pusharqan. 14 Pelyaq maypa aywaptinpis Tayta Diosmi Davidta yanapaq. 15 Tsayta musyaskirmi Saúlqa Davidta masrä chikirqan. 16 Israel y Judá soldädukunami itsanqa Davidta kuyayarqan maypa aywarpis alli pusharaptin.
Tsurinwan Davidta Saúl tätsinqan
17 Juk junaqmi Davidta Saúl nirqan: “Mayor tsurï Merabwanmi qamta tätsiyta munaykä. Alli chölu kanqaykita musyanäpä filisteo runakunawanrä mana mantsariypa pelyay”.
Saúlqa yarparqan kikin wanutsinanpa rantin filisteo runakuna wanutsiyänanta munarmi.
18 Tsaynö niptinmi David nirqan: “Taytay, imaynaq runapa tsurin kaykarqa ¡imanöpatä qampa mashayki käman!”
19 Mashan kayta mana munaptinmi David majatsakänanpä kaq tiempu chämuptin Mehola markapita Adriel ninqan runawan tsurin Merabta Saúl tätsirqan. 20 Tsaypitanami Saúlpa jukaq tsurin Micalna Davidta kuyakurkurqan. Tsayta musyaykurmi Saúl kushikurnin 21 yarparqan tsurinwan tätsiq tumpalla filisteo runakunapa makinman Davidta entregananpä kanqanta. Tsaymi Davidta nirqan: “Kananmi itsanqa rasunpa mashä kanki”.
22 Tsaynöpis yanapaqninkunatami Saúl nirqan: “Kikillanta qayaykur Davidta niyay: ‘Rey Saúlqa kuyashunkimi. Tsaynöllami noqakunapis qamta kuyayä. Tsaynö kaykaptinqa mashan kanaykipä juklla yaykuy’ ”.
23 Tsaymi Davidman aywaykur yachatsinqannölla Saúlpa yanapaqninkuna niyarqan. Davidnami nirqan: “¿Imanirtä qamkuna tsaynö yarpäyanki? Imaynaq kaykarqa reypa mashan manami kämantsu”.
24 Tsaynö niptinmi Saúlpa yanapaqninkuna kutiykur David ninqankunata willayarqan. 25 Tsaymi filisteo runakuna Davidta imanöpapis wanutsiyänanta munar yanapaqninkunata Saúl nirqan: “Davidta niyay: ‘Tsurinwan tänaykipä Saúlqa manami päganaykita munantsu, tsaypa rantinqa juk pachak (100) filisteo runakunata wanuskatsir penqayninkunapa puntanpa jana qaranta roquskir apamunaykitami munan’ ”.
26 Tsay ninqankunata Saúlpa yanapaqninkuna Davidta niyaptinmi awnirqan reypa mashan kayta. Tsaymi jitapanqan junaq manarä chaptin 27 yanapaqnin runakunawan David aywaykur ishkay pachak (200) filisteo runakunata wanutsiyarqan. Mashan kananpä awnishqa karmi tsay runakunapa penqayninpa jana qaranta roquskir rey Saúlman aparqan. Tsaynöpami Davidta tsurin Micalwan Saúl tätsirqan.
28 Tayta Dios yanapanqanta tantiyar y tsurin Micalpis Davidta pasaypa kuyanqanta musyarmi 29 Saúlqa masrä mantsarqan. Tsaymi wanunqanyaqpis Davidta pasaypa chikirqan. 30 Filisteo runakuna pelyaq shayämuptinmi wakin mandaq soldädukuna wanutsiyanqanpitapis mas atskata David wanutsiq. Tsaymi pïmaypis payta alli rikayaq.