Israel runakunata Goliat wajupanqan
17
Tsaypitanami filisteo soldädukuna Soco markacho Israel runakunawan pelyayänanpä qorikäyarqan. Tsaymi Efes-damimcho campamentunkunata rurayarqan. Efes-damimqa Soco y Azeca markakunapa lindërunchömi karqan. Socuqa Judá trïbu runakuna täyanqan kaqchömi karqan. 2 Rey Saúlnami Israel nación soldädukunawan Ela pampaman qorikäyarqan filisteo runakunawan pelyayänanpä. 3 Filisteo runakunapa campamentunkunami wak tsimpa jirkacho karqan. Y Israel runakunapa campamentunnami kay tsimpa jirkacho karqan. Ishkan jirkakunapa chawpinchömi juk pampa karqan.4 Filisteo soldädukunapa campamentunpitami juk soldädu cäsi kimsa metru tamäñu yarqamurqan. Jutinmi karqan Goliat. Payqa Gat markapitami karqan. 5 Goliatpaqa cascunpis chalëcunpis broncipitami karqan. Tsay chalëcuqa pitsqa chunka pitsqa (55) kïlumi lasarqan. 6 Tsaynöpis chaki senqa tsapaqninpis lanzanpis broncipitami karqan. 7 Lanzanpa chakinpis telarpa awa qorikunannö rakumi karqan. Tsay lanzanpa puntancho fiërruqa soqta kïlumi lasarqan. Pelyaq aywaptinnami yanapaqninpis escüdun aptashqa puntanta aywaq.
8 Tsaycho Israel soldädukunata wajuparmi Goliat nirqan: “¿Imapätä pelyaq atskaq shäyämushqayki? Noqaqa filisteo runami kä. Qamkunaqa Saúlpa sirviqninmi kayanki. Noqawan pelyananpä allin kaq chöluta akrayämuy. 9 Qamkunapa soldäduyki vincimaptinqa llapäkunami munaynikikunacho kayäshä. Noqa vinciptïqa qamkunami noqakunapa munaynïkunacho kayanki. 10 Israel soldädukuna, qamkunatami kanan junaq nï: ¡Alli chölu karqa mayqaykipis pelyaq shayämuy!”
11 Filisteo runa tsaynö ninqanta wiyaykurmi Saúl y llapan Israel runakuna pasaypa mantsariyarqan.
Soldädukuna juntaraykäyanqanman David chanqan
12 Saúl mandanqan witsanmi Beléncho Isaía jutiyuq juk awkin tarqan. Paypami puwaq tsurinkuna karqan. Juk tsurinpa jutinmi karqan David. 13 Isaípa kimsa kaq mayor tsurinkunapa jutinkunami karqan Eliab, Abinadab y Sama. Paykunaqa poqushqa jövinna karmi Saúlwan guërraman aywayarqan. 14 Davidqa tapshi kaq tsurinmi karqan. Kimsa kaq mayor tsurinkunami Saúlwan guërraman aywashqa kayarqan. 15 Davidnami Saúl kaqman imaypis aywaq wawqinkunata watukaq. Tsaypitami Belénman kutiq taytanpa üshankunata mitsinanpä.
16 Goliatnami chusku chunka (40) junaq tutapapis tardipapis achäquita ashipaq.
17 Juk junaqmi tsurin Davidta Isaí nirqan: “Campamentucho kaykaq wawqikikunata watukaq ayway chunka tantata y ishkay chunka kïlu trïgu kamtsata apakurkur. 18 Tsaynöpis soldädukunapa capitanninpä chunka quësukunata apay. Wawqikikuna alli kaykäyanqanta musyanäpä imallankunatapis apamunki. 19 Paykunami Saúlwan y Israel mayinkunawan Ela pampacho kaykäyan filisteo runakunawan pelyayänanpä”.
20 Taytan tsaynö niptinmi Davidqa waraynin tuta tsaka tsakalla üshankunata paytakuskir wawqinkunapä mikuyta apar aywarqan. Chänanpämi Israel soldädukuna filisteo soldädukunawan pelyayänanpä büllata rurar yarquykäyänä. 21 Tsaymi Israel soldädukunawan filisteo soldädukuna frenti frenti churanakuyarqan. 22 Tsayman David chaykurmi täpakuqta qepinta paytakuykur soldädukuna kaqman cörrilla aywarqan wawqinkuna imanö kaykäyanqantapis rikaq. 23 Wawqinkunawan David parlaykaptinmi filisteo soldädukunapita Goliat yarqamurqan. Imaypis achäquita ashipanqannölla Israel soldädukunata achäquita ashipanqantami David wiyarqan.
24 Goliatta rikaykurmi Israel soldädukuna pasaypa mantsarir campamentunkunaman qeshpiyarqan. 25 Tsaychömi Davidta niyarqan: “¿Rikashqaykiku achäqui ashipämaqnintsik runa manakaqman churamanqantsikta? Pipis tsay runata vinciq kaqtaqa rey Saúlshi imaykatapis kamaripanqa. Tsaynöpis warmi tsurinwanshi tätsinqa y castankunatapis manashi impuestuta cobranqanatsu”.
26 Tsaynö niyanqanta wiyaykurmi tsaycho kaykaq wakin runakunata David tapurqan: “¿Imatä kanqa Israel runakunata achäqui ashipaq filisteo runata wanutsiqpä? ¡Pitä tsay jutsasapa runa imayyaqpis kawaq Tayta Diospa soldädunkunata achäquita ashipar manakaqman churananpä!”
27 Tsaymi puntata niyanqannölla soldädukuna Davidta yapay niyarqan. 28 Runakunawan David tsaynö parlaykaqta wiyaykurmi mayor wawqin Eliab ajaparnin nirqan: “¡Imaqtä kayman shamushqayki! Jirkacho wallkalla üshantsikta ¡piwan jaqiykurtä shamushqayki! Musyämi malgeniu kaynikiwan llutanta yarpar pelya rikäkuq shamunqaykita”.
29 Tsaymi David nirqan: “¿Imatatä mana allita rurashqä? ¿Mananaku imallatapis parlarküman?”
30 Tsaynö nirmi wawqinpita jukläman witiykur wakintapis tapukur nirqan: “Taqay runata vinciq kaqqa ¿imatatä chaskinqa?”
Tsaynö tapukuptinmi wakinkuna niyanqannölla paykunapis niyarqan. 31 Tsaynö tapukunqanta willayaptinmi Davidta Saúl qayatsirqan.
Goliatta David wanutsinqan
32 Tsaymi Saúl kaqman aywaykur David nirqan: “Taytay, taqay filisteo runata ama pipis mantsatsuntsu. Noqami paywan pelyaq aywashä”.
33 Tsaynö niptinmi Saúl nirqan: “Tsay filisteutaqa manami wanutsiyta kamäpakunkitsu. Qamqa wamrallarämi kanki. Payqa chölullarä kanqanpita patsami soldädu kar guërrakunallacho purishqa”.
34 Tsaynö niptinmi David nirqan: “Taytäpa üshankunata mitsikuptï leonpis o ösupis shamur üshäta apaptinmi 35 taripaykur shiminpitapis qechuq kä. Tsaycho tikrapämaptinpis quijädapita tsariykurmi maqaykar wanutsiq kä. 36 Imayyaqpis kawaq Tayta Diospa soldädunkunata taqay jutsasapa filisteo runa achäquita ashipar manakaqman churanqanpitami leontapis ösutapis wanutsinqänölla paytapis wanutsishä. 37 Leonpita y ösupita Tayta Dios salvamanqannöllami taqay filisteo runapa makinpitapis salvamanqa”.
Tsaymi Saúl nirqan: “Hïju, tsaynö kaptinqa ayway ari. Taqay runata wanutsinaykipä Tayta Dios yanapaykulläshuy”.
38 Tsaynö nirmi broncipita rurashqa cascuta y chalëcuta Davidta jatitsirqan. 39 Tsaypitanami espädata tseqllanman jatikurkur Davidqa puriyta qallaykurqan. Puriyta mana puëdirmi Saúlta nirqan: “Imaypis mana jatikushqa karmi kay jatitsimanqaykiwanqa puriyta puëdïtsu”.
Tsaynö nirmi llapan jatitsinqankunata llushtikurqan. 40 Nirkurmi raqrapita pitsqa qollushkunata pikshanman wiñarkur tukruntawan warakanta aptakurkur Goliatwan pelyaq aywarqan.
41 Tsaynö aywaptinmi Goliatpis Davidwan pelyananpä yarqamurqan. Goliatpa ñöpantanami yanapaqnin yarqurqan escüdun aptashqa. 42 Kuyayllapä jövin kanqanta rikarmi Davidta manakaqman churar 43 Goliat nirqan: “¿Allqu kanqätaku yarpanki tukruykiwan shamunaykipä?”
Tsaynö nirmi diosninkunapa jutinkunata joqarir Davidta maldicionarqan. 44 Tsaymi nirqan: “¡Mä, runa karqa shamuy! ¡Kanan wanuskatsirmi wiskurkuna y munti uywakuna mikuyäshunaykipä jitaskishayki!”
45 Tsaynö niptinmi David nirqan: “Qamqa espädaykiman y lanzaykiman yärakurmi wanutsimayta yarpaykanki. Noqami itsanqa Israel soldädukunapa mandaqnin munayyuq Tayta Diosman yärakur shamushqä. Paytami manakaqman churashqayki. 46 Kananmi Tayta Dios makïman churamushushqayki wanuskatsirniki kunkaykita roqunäpä. Tsaynöllami soldädu mayikikunapa ayankunapis wiskurkunawan munti uywakuna mikuyänanpä jitaräyanqa. Tsaynöpami maytsaychöpis runakuna musyayanqa Israel runakunata yanapaq Tayta Dios llapanpä munayyuq kanqanta. 47 Tsaynöllami kaycho qorikashqa kaykaq runakuna musyayanqa espädaynaqlla lanzaynaqlla Tayta Dios yanapamaptin vincinqäta. Tayta Dios favornïkuna karmi qamkunata ushakätsiyänäpä makïkunaman churayämushushqayki”.
48 Davidta atacananpä Goliat aywaptinmi Davidpis cörrilla aywarqan atacananpä. 49 Pikshanpita rumita jipiskirmi juk makilla Goliatta urkuncho warakaskirqan. Tsaymi urkuncho rumin jatipakushqa uksikaypa patsaman ishkiskirqan. 50 Espädan mana kaykaptinpis juk warakayllachömi filisteo runata David wanutsirqan. 51 Ishkiskiptinnami Davidqa cörrilla aywar Goliatpa espädanta jipiskir tsay espädawan wanuskatsirqan. Tsaypitanami kunkanta roqurir umantapis jipirqan.
Filisteo soldädukunata vinciyanqan
Allinnin kaq soldädunta wanutsinqanta rikaykurmi filisteo soldädukuna qeshpir aywakuyarqan. 52 Tsaymi Israel y Judá soldädukuna büllata rurarnin Gat y Ecrón markakunayaq qati qatiykur wanutsiyarqan. Tsaymi Saaraimpita hasta Gat y Ecrón markakunaman aywaq nänikunacho filisteo soldädukunapa ayankuna jitaräyarqan.
53 Qatikachäyanqanpita Israel runakuna kutiykurmi filisteo runakunapa campamentunpita imaykankunatapis apakuyarqan. 54 Davidnami Goliatpa armankunata kikinpa toldun rurinman churarqan. Goliatpa umantami itsanqa Jerusalénman aparqan.
55 Filisteo runata David wanutsiq aywaptinmi soldädukunapa capitannin Abnerta Saúl tapurqan: “¿Pitä tsay jövinpa taytan?”
Abnernami nirqan: “Taytay, manami musyätsu pï taytan kanqantapis”.
56 Tsaymi Saúl nirqan: “Ayway, kikinta tapumuy”.
57 Goliatpa umanta janchashqa David kutiykämuptinmi Abner pusharqan Saúl kaqman. 58 Saúlnami Davidta tapurqan: “Jövin, ¿pipa tsurintä kanki?”
Davidnami nirqan: “Taytay, noqaqa Belén markacho taq Isaípa tsurinmi kä”.