Rey kananpä Davidta akranqan
16
Tsaypitanami Samuelta Tayta Dios nirqan: “¿Imayyaqtä Saúlpä llakikur waqanki? Payqa manami Israel runakunapa mandaqnin rey kanqanatsu. Waqanaykipa rantinqa carnërupa waqranman aceitita wiñakurkur Beléncho kaykaq Isaímana ayway. Paypa juk tsurintami rey kananpä akrashqä”.2 Tsaynö niptinmi Samuel nirqan: “¡Kananqa! ¿Imatatä rurashä? ¡Juk reyta churanäpä aywanqäta musyaykurqa Saúl wanutsimanqachi!”
Tsaynö niptinmi Tayta Dios nirqan: “Juk ternërata qatikurkur ayway. Pipis tapushuptikiqa: ‘Tayta Diospä sacrificiuta rupatsiqmi aywaykä’ ninki. 3 Chaykur Isaíta pushanki sacrificiuta rupatsinaykipä kaqman. Tsaychömi mayqan tsurintapis rey kananpä akranqäta rikatsiptï umanman aceitita wiñapanki”.
4 Tsaymi Tayta Dios ninqannölla Belén markaman Samuel aywarqan. Belénman chaykuptinmi mayor runakuna payta chaskiyänanpä yarqamur mantsakashqa tapuyarqan: “¿Taytay, imaqtä shamushqayki?”
5 Tsaynö niptinmi Samuel nirqan: “Tayta Diosta adoraqmi shamushqä. Qamkunapis purificakuskir sacrificiuta rupatsinantsikpä shäyämuy”.
Tsaynö nirmi Isaíta y tsurinkunata yakuwan purificaskir sacrificiuta rupaykätsinqanman aywayänanpä nirqan.
6 Chaykuyaptinnami Isaípa tsurin Eliabta rikaykur shonqullancho Samuel nirqan: “Paytami Tayta Dios akrashqa kanqa rey kananpä”.
7 Tsaymi Tayta Dios nirqan: “Buen mözu kanqanpita y jatun kanqanpita akranqäta ama yarpaytsu. Manami paytatsu akrashqä. Buen mözu kanqanpita alli runa kanqanta runakuna yarpäyaptinpis noqaqa manami buen mözu kanqanpitatsu pitapis akrä, sinöqa alli shonquyuq kanqanpitami”.
8 Tsaypitami tsurin Abinadabta Samuelpa ñöpanman Isaí pusharqan. Payta rikaykurmi Samuel nirqan: “Paytapis Tayta Dios manami akrashqatsu”.
9 Tsaynö niptinmi tsurin Samatana Isaí pusharqan. Tsaymi Samuel nirqan: “Paytapis Tayta Dios manami akrashqatsu”.
10 Tsaynöllami qanchis tsurinkunata Isaí pusharqan. Paykunata rikaykurmi Samuel nirqan: “Pushamunqayki tsurikikunata mayqantapis Tayta Dios manami akrashqatsu”.
11 Tsaymi Samuel tapurqan: “¿Tsayllaku llapan tsurikikuna?”
Isaínami nirqan: “Taytay, tapshi kaq tsurillänami üshata mitsikuykan”.
Samuelnami nirqan: “Payta ras qayatsimuy. Pay manarä chämuptinqa manami mikushunrätsu”.
12 Tsaynö niptinmi tapshi tsurin Davidta Isaí qayatsirqan. Pay karqan kuyayllapä buen mözumi karqan. Chaykuptinmi Samuelta Tayta Dios nirqan: “Paytami akrashqä. Rey kananpä umanman aceitita wiñapay”.
13 Tsaymi rey kananpä wawqinkunapa ñöpancho Davidpa umanman aceitita Samuel wiñaparqan. Tsaypita patsami Tayta Diospa Espïritun Davidta shumaq yanaparqan. Nirkurnami Samuelqa Ramá markaman kutikurqan.
Arpata David tukanqan
14 Tsay witsanmi Tayta Diospa Espïritun Saúlpita yarqushqa karqan. Tsaymi juk supayta Tayta Dios kachaptin Saúlqa pasaypa löcuyar purirqan. 15 Tsaymi yanapaqnin runakuna Saúlta niyarqan: “Taytay, Tayta Dios kachamunqan supaymi löcuyaykätsishunki. 16 ¿Alliku kanman pillatapis arpa tukaqta ashiyämuptï? Paymi Tayta Dios kachamunqan supay löcuyätsishuptiki tukapäshunki. Tsaynöpami löcuyanqaykipita alliyanki”.
17 Tsaymi yanapaqnin runakunata Saúl nirqan: “Tsaynö kaptinqa ras aywar alli tukaqta apayämuy”.
18 Tsaynö niptinmi juk yanapaqnin nirqan: “Belén markacho Isaípa tsurintami arpata shumaq tukaqta rikashqä. Tsay jövinqa pelyaytapis manami mantsarintsu. Imatapis manami llutallaqa parlantsu y buen mözumi kaykan. Paytaqa Tayta Diosmi yanapan”.
19 Tsaynö niptinmi Isaíman kachakur Saúl nirqan: “Isaíta niyay üsha mitsiq tsurin Davidta kachamunanpä”.
20 Tsaymi Isaíqa tsurin Davidta Saúl kaqman kacharqan juk cabrata jancharkatsir, vïnu puritsikunan qaraman vïnuta wiñaparkur y tantata ashnuman chaqnaparkur. 21 Tsaynöpami Saúl kaqman David chaykur mandanqanta rurarqan.
Saúlmi Davidta kuyarnin arman puritsiq kananpä churarqan. 22 Tsaymi Saúl kachakurqan Isaíta kaynö niyänanpä: “Tsuriki Davidqa shonqunpänöshi. Tsayshi qamta rugakamushunki kachapaykunaykipä”.
23 Tsaynöpis Tayta Dios kachamunqan supay Saúlta löcuyätsiptinmi arpanta David tukapaq. Tukapaptinmi Saúl alliyaskir añawna kakuq.