Amalecita runakunata Saúl ushakätsinqan
15
Tsaypita juk kutichömi Saúlta Samuel nirqan: “Tayta Dios kachamaptinmi umaykiman aceitita wiñarqä Israel runakunapa mandaqnin rey kanaykipä.† Kananqa Tayta Dios nishunqaykita shumaq tantiyakuy. 2 Llapanta mandaq Tayta Diosmi nin: ‘Amalecita runakunatami ushakätsishä. Paykunatami ushakätsishä Israel runakuna Egiptupita shayämuptin markanpa päsayänanta mana munayanqanpita.† 3 Kananqa soldädukunata pushakurkur aywayay amalecita runakunata ushakätsiyänaykipä. Mana kuyapaypa wanutsiyanki ollqukunata, warmikunata, wamrakunata y llullukunatapis. Tsaynölla wanutsiyanki wäkankunata, üshankunata, cabrankunata, camëllunkunata y ashnunkunatapis’ ”.4 Samuel tsaynö niptinmi runakunata Telaim markaman Saúl qayatsirqan. Tsaycho yupaptinmi Israelpita ishkay pachak waranqa (200,000) soldädukuna kayarqan. Judápitanami chunka waranqa (10,000) soldädukuna kayarqan.a 5 Tsay soldädukunawanmi Saúlqa amalecita runakunapa markanman aywayarqan. Chaykurmi mayu kuchuncho churanakuykur atacayänanpä shuyaräyarqan. 6 Tsaypitanami tsaycho taq ceneo runakunata Saúl nirqan: “Unay castaykikunami Israel runakunata kuyapäyarqan Egiptupita päsayämuptin. Tsaynö kaykaptinqa amalecita runakunapita witikuyay. Mana witikuyaptikiqa paykunata wanutsiyanqächo qamkunatapis wanutsiyämantä”.
Tsaynö niptinmi ceneo runakuna amalecita runakunapita witikuyarqan.
7 Tsaypitami Saúl atacarnin amalecita runakunata wanutsiyarqan Havilapita qallaykur hasta Shur ninqan partiyaq. Tsayqa kaykan Egipto nacionlächömi. 8 Tsaychömi mandaqnin rey Agagta prësu tsariskir llapan soldädunkunatapis wanutsiyarqan. 9 Agagtami itsanqa wanutsiyarqantsu. Tsaynöpis manami wanutsiyarqantsu wera kaqtaqa üshatapis, cabratapis, wäkatapis, torïtukunatapis, carnërutapis. Ni imankunatapis alli kaqkunataqa manami rupatsiyarqantsu. Uyu kaqkunatami itsanqa llapanta wanutsiyarqan.
Saúl rey kananta Tayta Dios mana munanqan
10 Tsaypitami Samuelta Tayta Dios nirqan: 11 “Pësakümi rey kananpä Saúlta churanqäpita. Manami ninqäkunata cumplishqatsu”.
Tsaynö niptinmi Samuel pasaypa llakikur Tayta Diosta mañakur warat waqarqan. 12 Waraynin tutanami tsaka tsakalla Saúlwan tinkunanpä Samuel aywarqan. Aywaykaptinmi willayarqan Carmelman Saúl chaykur wankata ichïtsinqanta y tsaypitana Gilgalman aywanqanta.
13 Tsaypita Samuel aywar Saúl kaqman chaykuptinmi Saúl nirqan: “Taytay, Tayta Dios yanapaykulläshuy. Pay nimanqantaqa llapantami cumplishqä”.
14 Samuelnami nirqan: “Tsaynö kaptinqa ¿imanirtä üshakunawan cabrakuna waqaykämunqanta y törukuna müyaykäyämunqanta wiyaykä?”
15 Saúlnami nirqan: “Waqamuq üshakuna, cabrakuna y müyämuq törukunaqa amalecita runakunapami kaykan. Allinnin kaq üshakunata y törukunatami soldädukuna apayämushqa sacrificiuta Tayta Diospä rupatsiyänäpä. Tsaypita wakin kaqtaqa llapantami wanutsiyashqä”.
16 Tsaymi Samuel nirqan: “Tayta Dios shipshi imata nimanqantapis kanan willanäpä ¡upälla kay!”
Tsaynö niptinmi Saúl nirqan: “Taytay, mä willaykallämay”.
17 Tsaymi Samuel nirqan: “Mana väliq kanqaykita yarpaptikipis Tayta Diosmi churashushqayki Israel nacionpa mandaqnin rey kanaykipä. 18 Tsaymi jutsasapa kayanqanpita amalecita runakunata uywankunatawan llapanta ushakätsinaykipä Tayta Dios kachashushqayki. 19 Tsaynö nikäshuptikiqa ¿imanirtä pay nishunqaykita rurashqaykitsu? ¿Imanirtä Tayta Diosta ajanätsir amalecita runakunapa imaykantapis apamushqayki?”
20 Saúlnami nirqan: “Tayta Dios nimanqantaqa llapantami rurashqä. Amalecita runakunapa mandaqnin rey Agagllatami prësu apamushqä. Tsaypita kaqtaqa llapantami wanutsishqä. 21 Pelyaq aywaqkunami itsanqa allinnin kaq üshata, cabrata y wäkatapis apayämushqa Tayta Diosta adorar Gilgalcho sacrificiuta rupatsiyänäpä”.
22 Samuelnami nirqan: “Tayta Dios ¿mayqantatä munan: sacrificiukunata rupatsinantsiktaku o pay ninqanta cäsukunantsiktaku?
“Sacrificiuta rupatsinqantsikpitapis mas alli kaykan payta cäsukunqantsikmi.
Tsaynöpis carnërupa wiranta rupatsinqantsikpita mas alli kaykan pay ninqanta chaskikunqantsikmi.†
23 Diosta mana cäsukuq runakunaqa brüjunömi kayan.
Mana wiyakuq runakunaqa ïdulukunata adoraqkunanömi kayan.
Tayta Diosta mana cäsukunqaykipitami qamtapis kanan cäsushunkinatsu.
Tsaymi rey kaykanqaykipita jipishunki”.
Perdonananpä Samuelta Saúl ruganqan
24 Tsaynö niptinmi Saúl nirqan: “¡Rasunpami jutsata rurashqä! Runakuna niyanqanta cäsurmi Tayta Dios nimanqantapis ni qam yätsimanqaykitapis cäsushqätsu. 25 Tsaynö jutsata ruranqäpita perdonaykallämay. Tayta Diosta adoraq aywaptï compañamay”.
26 Samuelnami nirqan: “Qamwanqa manami aywashätsu. Tayta Dios nishunqaykita manami cäsukushqaykitsu. Tsaynöpis Tayta Dios manami munannatsu Israel nacionpa mandaqnin rey kanaykita”.
27 Samuel aywakur tumaykaptinmi tünicanpa kuchunpita Saúl aptakurkurqan. Tsaycho tünican rachiptinmi 28 Samuel nirqan: “Tünicäta rachir pedäzuta jipinqaykinöllami qamtapis Tayta Dios Israel nacionpa mandaqnin rey kanqaykipita jipishushqayki. Rey kananpäqa qampita mas alli runatanami churanqa. 29 Ninqätaqa rasunpaypami Tayta Dios cumplinqa. Israel runakunata kuyaq Tayta Diosqa manami llullakuntsu. Payqa manami runatsu llullakunanpäqa”.
30 Saúlnami nirqan: “Jutsatami rurashqä. Tsaynö kaptinpis Tayta Diosta adoraq aywaptï compañamay. Noqawan mana aywaptikiqa mayor runakunawan wakin runakunapis ¿imatarä yarpäyanqa?”
31 Tsaynö rugaptinmi Samuelqa Saúlwan aywarqan. Chaykurmi Tayta Diosta Saúl adorarqan.
Rey Agagta Samuel wanutsinqan
32 Tsaypitanami Samuel nirqan: “Amalecita runakunapa mandaqnin rey Agagta apayämuy”.
Apapäyaptinmi manana wanunanpä kanqanta yarpar rey Agag kushishqa aywarqan. 33 Chaykuptinmi Samuel nirqan: “Warmikunapa wamrankunata wanutsiptiki wamraynaq rikakuyanqannömi kanan qampa mamaykipis wamraynaq rikakunqa”.
Tsaynö nirmi Tayta Diospa ñöpancho rey Agagta Samuel wanuskatsir ichik ichik roqurqan.