Tsaynö willanakuyanqantaqa manami taytanta willarqantsu. 2 Taytan Saúlnami kaykarqan Gabaa markapa lindërun Migróncho^a kaykaq granäda jacha chakincho. Tsaychömi soqta pachak (600) soldädunkunawan kaykarqan. 3 Paywanmi efodnin jatishqa Ahías sacerdötipis kaykarqan. Tsay sacerdötimi Ahitobpa tsurin karqan. Ahitobnami Icabodpa wawqin karqan. Ahitobwan Icabodqa Fineespa tsurinkunami karqan. Fineesnami Elípa tsurin karqan. Sacerdöti Elíqa Siluchömi Tayta Diosta unay sirvirqan.

Campamentucho kaykaq runakunaqa manami musyayarqantsu filisteo soldädukunata atacananpä Jonatán aywanqanta. 4 Filisteo soldädukuna kayanqan kaqman Jonatán chänanpäqa wak tsimpa kay tsimpa wanwanyaykaq ishkay qaqakunami rakirqan. Jukaq qaqapa jutinmi karqan Boses y jukaq qaqapa jutinnami karqan Sene. 5 Jukaq qaqami karqan Micmasläpa y jukaq qaqanami karqan Gabaaläpa. Micmasqa norti kaqläpami karqan y Gabaanami sur kaqläpa karqan. 6 Tsaymi yanapaqninta Jonatán nirqan: “Wak tsimpaman päsashun Diosman mana criyiq filisteo runakunata atacanantsikpä. Tayta Dios yanapamashqa capazchi wakillantapis wanutsishun. Pay yanapamashqaqa atskaq karpis o wallkaqlla karpis vincishunmi”.

7 Tsaynö niptinmi yanapaqnin nirqan: “Yarpanqaykinö ras aywashun. Noqaqa imachöpis yanapanäpä listumi kaykä”.

8 Tsaymi Jonatán nirqan: “Wak tsimpaman päsaskir paykuna rikamänantsikpä rikananman aywashun. 9 ‘Tsayllacho shuyäyämay’ nimashqaqa tsayllachömi shuyaräshun. Manami paykuna kayanqan kaqmanqa witsäshuntsu. 10 ‘Witsäyämuy’ nimashqami itsanqa witsäshun. Tsaynöpami musyashun Tayta Dios yanapamashqa vincinantsikpä kanqanta”.

11 Tsaynö nirmi rikananman aywayarqan filisteo soldädukuna rikayänanpä. Paykunata rikaskirmi niyarqan: “¡Rikayay hebreo runakuna pakaräyanqan machaypita yarqaykäyämuqta!”

12 Tsaymi filisteo runakuna qayakur niyarqan: “¡Kayman witsäyämuy yarpäyanqäta willayänäpä!”

Tsaymi yanapaqninta Jonatán nirqan: “¡Aku aywashun! ¡Paykunatami Israel runakunapa makinman. Tayta Dios churamunqa!”

13 Tsaynö nirmi Jonatánqa makinwan y chakinwan tsarikur achpaypa witsarqan. Tsaynöllami yanapaqninpis qepanta witsarqan. Chaykurnin Jonatán qarpamuyllantami yanapaqnin wanutsirqan. 14 Tsaynö atacarmi pullan yugäda chakrallacho yanapaqninwan Jonatán wanutsiyarqan ishkay chunka (20) filisteo runakunata. 15 Tsaynö wanutsiyaptinmi campamentucho kaqkuna, campamentupita yarqushqa kaqkuna y markakunata atacaq aywaqkunapis pasaypa mantsakäyarqan. Tsaynöllami illaqpita temblor kaptin llapanpis pasaypa mantsakäyarqan.

16 Gabaacho rikachakuq Israel soldädukunami filisteo soldädukuna wakpa kaypa cörrikachaykäyaqta rikayarqan. 17 Tsayta willayaptinmi soldädunkunata Saúl nirqan: “Watukashun mayqanpis faltaykanqanta musyanantsikpä”.

Tsaynö watukayaptinmi Jonatánwan yanapaqnin faltäyarqan. 18 Tsaymi sacerdöti Ahíasta Saúl nirqan: “Imata ruranantsikpäpis Tayta Diosta tapukunantsikpä babulninta apamuy”.

Tsay junaqmi Tayta Diospa babulnin Israel runakunawan kaykarqan. 19 Sacerdötiwan Saúl parlanqanyaqmi filisteo soldädukuna kaykäyanqancho pasaypa bülla wiyakämurqan. Tsaynami sacerdötita Saúl nirqan: “Amana tapukushunnatsu. ¡Pelyaq ras aywashun!”

20 Tsaymi jinan höra filisteo runakunata atacayänanpä soldädunkunata pushakurkur Saúl aywarqan. Chäyänanpäqa filisteo runakuna kikinkunapura pantanakurmi wanutsinakuykäyänä. 21 Filisteo runakunawanmi wakin hebreo runakunapis kayarqan. Paykunaqa ñöpapita patsami filisteo soldädukunata yanapayarqan. Tsay runakunapis Saúlwan Jonatán vinciykäyanqanta rikarmi filisteo runakunata tikrapuyarqan. 22 Wakin Israel runakunanami Efraín jallqakunacho amparakushqa kaykäyarqan. Paykunapis filisteo runakuna qeshpiykäyanqanta musyaskirmi qepankunata aywar wanutsiyarqan. 23 Tsay wanutsinakuyqa karqan hasta Bet-avén markayaqmi. Tsay junaq filisteo runakunata vinciyänanpämi Israel runakunata Tayta Dios yanaparqan.

24 Pelyaman manarä aywarmi imatapis mana mikuyänanpä soldädunkunata Saúl nirqan: “Contrantsikkunata kanan tardi chipyaq manarä wanutsir imatapis mikuq kaqmi maldicionashqa kanqa”.

Saúl ninqanta cäsukur mana mikuyaptinmi Israel soldädukunapa kallpankunapis karqannatsu. 25 Tsaypita muntipa päsarmi abëjapa mishkin patsacho kaykaqta tariyarqan. 26 Tsay munticho abëjapa mishkin atska kaptinpis Saúl juratsinqanta mantsarmi ni mayqanpis yawarqantsu.

27 Jonatánqa taytan Saúl tsaynö juratsinqanta mana musyarmi tukrunwan abëjapa mishkinta oqtiskir mikurqan. Tsayta mikuskiptinmi pasaypa aywapakashqa kaykanqanpita kallpan yuriskirqan. 28 Mikuykaqta rikaykurmi juk soldädu nirqan: “Taytaykimi llapan soldädukunata juratsishqa kanan junaq imatapis mana mikuyänanpä. Tsaynöpis nishqa imatapis mikuq kaq maldicionashqa kananpä kanqantami. Tsaymi soldädukuna imatapis mana mikurnin pasaypa aywapakaykäyan”.

29 Tsaynö niptinmi Jonatán nirqan: “Tsaynö juratsir llutantami taytä rurashqa. Abëjapa mishkinta mikuskiptïmi kallpä yurishqa. 30 Qamkunapis filisteo soldädukuna jaqiyanqan mikuyta mikuyaptikiqa paykunata chipyaqmi ushakätsishwan karqan”.

31 Mallaqaywan kallpankuna ushakashqa kaykaptinpis filisteo runakunatami Israel runakuna Micmaspita patsa Ajalónyaq wanutsiyarqan. 32 Tsaypitanami filisteo runakunapa üshankunata, cabrankunata, wäkankunata y becërrunkunata patsallacho pishtaskir^b yawarnintinta mikuyarqan. 33 Tsayta rikaykurmi wakin runakuna aywar Saúlta willayarqan: “Yawarnintinta aytsata mikurmi Tayta Diosta cäsukuyantsu”.^†

Tsayta wiyarmi Saúl nirqan: “¡Tsaynö rurarqa jutsatami ruraykäyan! Tsaynö kaptinqa jatun rumita tanqaypa apayämuy. 34 Tsaynöpis runakunata niyanki törunkunata, üshankunata y cabrankunata apaykamur kaycho pishtaskir mikuyänanpä. Ama jutsata rurayätsuntsu yawarnintinta aytsata mikurnin”.

Tsaynö niptinmi törukunata y üshakunata tsay paqas apayarqan jinancho pishtaskir mikuyänanpä. 35 Tsaychömi Tayta Diospä juk altarta Saúl rurarqan. Tsay altarmi punta kaq ruranqan altar karqan.

36 Tsaypitami Saúl nirqan: “Kanan paqas warat filisteo soldädukunata llapanta wanuskatsirmi imaykankunatapis apamushun”.

Tsaymi soldädunkuna niyarqan: “Taytay, llapan yarpanqaykita rurashun”.

Tsaynö niptinmi sacerdöti nirqan: “Manarä imatapis rurar Tayta Diosta mañakushun”.

37 Tsaymi Tayta Diosta Saúl mañakur tapukurqan: “¿Filisteo soldädukunata qatipäyämanku o manaku? ¿Paykunata ushakätsiyänäpä yanapayämankiku o manaku?”

Tsaynö mañakuptinpis Tayta Dios tsay junaq imatapis manami nirqantsu.

38 Tsaymi soldädukunapa capitanninkunata Saúl nirqan: “Kayman llapaykikuna shäyämuy. Kananmi musyashun mayqantsik jutsata ruranqantsiktapis”.

39 Qorikäyaptinnami Saúl nirqan: “Salvamaqnintsik Tayta Dios rikaykämantsikmi. Mayqantapis jutsayuq kaqtaqa tsurï Jonatán kaptinpis wanutsishämi”.

Tsaynö niptin soldädunkunaqa manami imatapis parlakuyarqantsu. 40 Tsaymi tsaycho kaykaqkunata Saúl nirqan: “Qamkuna washalächo ichïyanki. Noqanami tsurï Jonatánwan kaycho ichïyäshä”.

Tsaynö niptinmi soldädukuna niyarqan: “Ninqaykinö katsun”.

41 Tsaypitanami Saúl mañakur nirqan: “Tayta Dios, mañakamunqäta ¿imanirtä contestamankitsu?”^c

Suertita jitayaptinmi yarqamurqan Saúlpä y tsurin Jonatánpä. Tsaynöpami musyayarqan wakin runakuna jutsaynaq kayanqanta. 42 Tsaymi Saúl nirqan: “Tsurï Jonatánpä y noqapä suertita jitayay”.

Suertita jitayaptinmi yarqamurqan tsurin Jonatánpä. 43 Tsaymi Jonatánta Saúl nirqan: “Hïju, ima jutsata ruranqaykitapis willamay”.

Tsaymi Jonatán willarqan: “Aptaranqä tukrupa puntanwanmi ichikllata abëjapa mishkinta yawarkurqä. ¿Tsayllapitatsurä wanüman?”

44 Tsaynami Saúl nirqan: “¡Jonatán! Mana wanutsiptïqa Tayta Dios pasaypa castigamätsun”.

45 Tsaynö niptin Israel runakuna Saúlta niyarqan: “¿Imanirtä Jonatántaqa pipis wanutsinqa? Paytami Tayta Dios yanapashqa filisteo soldädukunata vincinanpä. Tsaynöpami noqantsikpis paykunata vincishqantsik. Tsaynö kaykaptinqa manami pipis Jonatánta wanutsinmantsu”.

Tsaynöpami llapan runakuna Jonatánpa janan shäriyarqan mana wanutsinanpä. 46 Tsaymi soldädunkunawan Saúl manana qatikachäyaptin filisteo soldädukuna markankunapa kutikuyarqan.

47 Israel nacionpa mandaqnin rey karmi maytsaypapis soldädunkunawan Saúl aywayarqan Israel runakunapa contran kaq nacionkunawan pelyayänanpä. Tsay contran nacionkunami kayarqan Moab, Amón, Edom y Filistea nacionkuna. Tsaynöllami Sobapa mandaqnin reykunapis contran shäriyarqan. Soldädunkunawan maypa aywarpis llapantami Saúl vincirqan. 48 Tsaynöllami soldädunkunawan aywar amalecita runakunatapis vinciyarqan y asaltantikunapitapis Israel runakunata salvayarqan.

49 Saúlpa tsurinkunami kayarqan Jonatán, Isúi y Malquisúa. Mayor kaq warmi tsurinpa jutinmi karqan Merab y qepa kaq warmi tsurinpanami Mical. 50 Saúlpa warminpa jutinmi karqan Ahinoam. Payqa Ahimaaspa tsurinmi karqan. Soldädunkunapa capitanninpa jutinmi Abner karqan. Abnerpa taytanmi karqan Ner. Nerqa Saúlpa tiyunmi karqan. 51 Saúlpa taytan Cis y Abnerpa taytan Nerqa Abielpa tsurinkunami kayarqan.

52 Saúl rey kanqan witsanmi filisteo runakunawan imaypis guërra karqan. Tsaymi allinnin kaq jövinkunataqa soldädun kayänanpä llapanta Saúl qorirqan.