Filisteo runakunawan Israel runakuna pelyayanqan
13
Israel runakunata mandayta qallaykunqan witsan Saúlqa yashqa runanami karqan. Ishkay wata mandaq kaykarmi 2 Israel runakunapita kimsa waranqata (3,000) soldädunkuna kayänanpä akrarqan. Mana akranqan runakunatami nirqan wayinkunapa kutikuyänanpä. Tsay kimsa waranqa akranqan soldädukunapitami ishkay waranqata (2,000) akrarqan Micmascho y Bet-el jallqacho kikinwan quëdayänanpä. Juk waranqa (1,000) soldädukunatanami kacharqan Benjamín trïbu runakuna täyanqan Gabaa markaman Jonatánwan aywayänanpä.3 Soldädunkunawan Gabaaman Jonatán chaykurmi filisteo runakunapa cuartelninta atacar soldädukunata wanutsiyarqan. Tsaynö vinciyanqanta musyaskirmi Filistea nacioncho taq runakuna pasaypa rabyakuyarqan. Filisteo runakuna atacayänanpä kanqanta musyarmi hebreoa runakuna qorikäyänanpä cornëtata entëru Israel nacioncho Saúl tukatsirqan. 4 Cada markacho qorikäyaptinmi willayarqan filisteo soldädukunata Jonatán wanutsinqanta. Tsaynöllami filisteo runakuna pasaypa ajar shamuykäyanqantapis willayarqan. Tsaymi filisteo soldädukunawan pelyayänanpä Israel soldädukuna Gilgal markaman Saúlwan qorikäyarqan.
5 Tsaynöllami filisteo runakunapis Israel runakunawan pelyayänanpä qorikäyarqan. Filisteo runakunapami kimsa chunka waranqa (30,000) carrëtankuna y soqta waranqa (6,000) cawallun muntashqa soldädunkuna kayarqan. Chakillapa aywaq soldädukunanami lamar kuchuncho aqushanörä yupaytapis mana atipaypä kayarqan. Paykunami Micmascho qorikäyarqan. Micmasqa Bet-avén rupay yarqamunan kaqläpami karqan. 6 Tsaymi Israel runakuna pasaypa mantsarirnin pakakuyarqan machaykunaman, raqrakunaman, qaqakunaman, zanjakunaman y tsaki pözukunamanpis. 7 Wakin kaqnami qeshpirnin Jordán mayuta tsimpar Gad partipa y Galaad partipa aywakuyarqan.
Saúlqa Gilgalchömi soldädunkunawan quëdakuyarqan. Tsaycho quëdarmi soldädunkunaqa pasaypa mantsariyarqan. 8 Puntatami Samuelwan willanakushqa kayarqan qanchis junaq tsaycho payta shuyänanpä.† Qanchis junaq Saúl shuyaraptinpis Samuelqa manami Gilgalman charqantsu. Tsaymi runakuna qoyay qoyay qeshpiyaptin 9 Saúl nirqan: “Uywakunata apayämuy rupatsina sacrificiuta y alli päsakuy sacrificiuta rupatsinantsikpä”.
Uywakunata apayaptinmi pishtaskatsir rupatsina sacrificiuta kikin Saúl rupatsirqan.
10 Sacrificiuta rupatsir ushaykaptinnami Samuel charqan. Chaykaqta rikaykurmi Saúl aywarqan Samuelta winchikunanpä. 11 Tsaymi Samuel nirqan: “¿Imanirtä sacrificiuta rupatsishqayki?”
Saúlnami nirqan: “Jitapämanqayki junaq mana chämuptikimi y runakuna jaqiramar aywakuyaptinmi tsaynö rurashqä. Filisteo runakunami atacayämänanpä Micmascho qorikashqa kaykäyan. 12 Tayta Diosta manarä mañakuptï atacayämänanpä kanqantami yarpashqä. Tsaymi mana chämuptiki sacrificiuta kikïna rupatsishqä”.
13 Tsaynö niptinmi Samuel nirqan: “Llutantami rurashqayki. Tayta Diosta cäsukuptikiqa qampita aywaraqkunallami Israel runakunapa mandaqnin rey kanman karqan. 14 Payta mana cäsunqaykipitami juk runatana akranqa Israel runakunapa mandaqnin rey kananpä. Tsay runaqa Tayta Diospa shonqunpänömi kanqa”.†
15 Tsaynö niskirmi Gilgalpita Samuel aywakurqan.
Saúlnami soldädunkunata pushakurkur Benjamín trïbu runakuna täyanqan Gabaa markaman aywarqan. Tsaycho soldädunkunata yupaptinmi soqta pachakllana (600) kayarqan. 16 Saúl y tsurin Jonatánmi Gabaacho campamentunkuna rurayarqan. Filisteo soldädukunami Micmascho campamentunkuna rurayarqan. 17 Filisteo soldädukunami kimsa grüpuman rakikaykur Micmascho campamentunkunapita yarquyarqan Israel runakuna täyanqan markakunata ushakätsiyänanpä. Juk grüpumi Sualcho kaykaq Ofra marka kaqläpa aywayarqan. 18 Juk grüpumi Bet-horón kaqläpa aywayarqan y juk grüpunami Zeboim raqra janan tsunyaq jirka kaqläpa aywayarqan.
19 Israel runakunata munaynincho tsarararmi filisteo runakuna kachapäyarqantsu ni jukllayllapis herrëru kananta. Tsaynö kachapäyarqantsu espädakunata ni lanzakunata rurayänanta mana munarmi. 20 Tsaymi Israel runakunaqa filisteo runakunamanrä aywayaq planchankunata takatsiyänanpä y lampankunata, jächankunata y ösinkunata afilatsiyänanpä. 21 Planchata y lampata takapäyanqanpitami puwaq grämu qellayta cobrayaq. Jächata y ayjata afilayanqanpitanami chusku grämu qellayta cobrayaq. 22 Tsaynöpami filisteo soldädukunawan pelyayanqan junaq Israel soldädukunapa ni mayqanpapis espädan ni lanzan karqantsu. Saúlpa y Jonatánllapami karqan.
23 Juk grüpu filisteo soldädukunami Israel runakunata tsapäyänanpä Micmas raqraman aywayarqan.