Israel runakunata Samuel yätsinqan
12
Tsaypitanami llapan Israel runakunata Samuel nirqan: “Qamkuna munayanqaykinömi mandayäshuqniki reyta churashqä. 2 Kananpitaqa paymi mandayäshuqniki rey kanqa. Noqaqa chölullarä kanqäpita patsami qamkunata yanapashqä. Kananqa soquyashqa awkinnami kaykä. Tsurïkunapis qamkunawanmi kaykäyan. 3 Pipa törunta o ashnuntapis duëñu tukushqa kaptïqa Tayta Diospa y akranqan reypa ñöpancho shimpiyämätsun. Tsaynöpis shimpiyämätsun pitapis ñakatsishqa o maqashqa kaptïqa o pipa jananpis shärinäpä chaskipakushqa kaptïqa. Mayqaykikunapapis jaqaykikuna karqa pägayälläshaykimi”.4 Tsaymi niyarqan: “Manami imaypis suwapäyämashqaykitsu, engañayämashqaykitsu ni chaskipakushqaykipistsu”.
5 Samuelnami nirqan: “Tayta Diospis y akranqan reypis rikaykämanmi jutsaynaq kanqäta”.
Tsaynö niptinmi runakuna niyarqan: “Rasun kaqtami nikanki”.
6 Tsaymi Samuel nirqan: “Tsaytaqa Tayta Diospis musyanmi. Paymi Moiséstawan Aarónta kacharqan Egiptupita unay castantsikkunata jipiyämunanpä.† 7 Tsaynöllami kananyaqpis Tayta Dios salvaykämantsik. Tsaynö kaykaptinqa yanapamanqantsikta paypa ñöpancho yarpätsiyäshayki. Yarpätsiptï shumaq wiyayämay.
8 “Jacobpita aywaraq unay castantsikkuna Egiptucho ñakar Tayta Diosta mañakuptinmi† Moiséstawan Aarónta kacharqan paykunata jipiyämunanpä. Jipiskamurnami kay taykanqantsik kaqcho täyänanpä pushamurqan. 9 Tsaycho täyänanpä churaykaptinpis paykunaqa Tayta Diosta manami cäsukuyarqantsu. Tsaymi Tayta Diospis paykunata yanaparqannatsu Hazor marka soldädukunapa capitannin Sísara† atacar munaynincho katsiptinpis. Tsaynöpis filisteo runakuna y moabita† runakuna atacar munaynincho katsiptinpis manami yanaparqantsu.
10 “Tsaypitanami Israel runakuna Tayta Diosta mañakur niyarqan: ‘Taytay, Baal y Astarot ïdulukunata adorayanqäpita perdonaykayällämay. Conträkunapa munayninpita salvayämaptikiqa qamllatami sirviyäshayki’.† 11 Tsaynö mañakuyaptinmi Tayta Dios churarqan Jerobaalta,† Baracta† y Jeftéta† contrankunapita salvananpä. Tsaynöllami noqatapis churamarqan qamkunata salvanäpä.† Tsaynöpami Tayta Dios yanapayäshushqayki alli kawayänaykipä.
12 “Tsaypitanami amonita runakunapa mandaqnin rey Nahas qamkunawan pelyaq shamurqan. Tsaymi kikin Tayta Dios qamkunapa mandashuqniki rey kaykaptinpis mañakayämarqayki juk reyta churapänäpä.† 13 Tsay reyqa noqantsikwanmi kaycho kaykan. Mañakayämanqaykinöllami Tayta Dios tsay reyta churamushqa.
14 “Kananqa Tayta Diospita mantsapakuyay, payllata sirviyay y niyäshunqaykikunata wiyakuyay. Paypa willakuyninta ama manakaqman churayaytsu. Mandayäshuqniki reypis Tayta Diosnintsikta cäsukur kawatsun. Tsaynöpami alli kawayanki. 15 Tayta Diosta mana cäsur llutankunata rurayaptikimi itsanqa qamkunata y mandayäshuqniki reytapis mana kuyapaypa castigayäshunki.
16 “Kaypita mayqaykipis ama witiyaytsu. Kanan rikayänaykipämi Tayta Dios milagruta ruranqa. 17 Usya killa kaykaptinpis tamyatsimur maqakatsimunanpämi Tayta Diosta mañakushä. Mañakunqänö tamyamuptin y maqakamuptinmi musyayanki reyta mañakur Tayta Diosta ajanätsiyanqaykita”.
18 Tsaynö niskir Tayta Diosta Samuel mañakuptinmi jinan höra tamyamurqan y maqakamurqan. Samuel mañakunqannölla tamyamuptin y maqakamuptinmi llapan runakuna Tayta Diospita y Samuelpita pasaypa mantsapakuyarqan. 19 Tsaymi Samuelta niyarqan: “Taytay, noqakunaqa rey kananpä mañakurmi jutsata rurayashqä. Tsaypita mana wanutsiyämänanpä Tayta Diosta mañakuykullay”.
20 Samuelnami nirqan: “Qamkunaqa rasunpami jutsayuq kaykäyanki. Tsaynö karpis ama mantsakäyaytsu. Tsaypa trokinqa llapan shonquykikunawan Tayta Dios munanqannö imaypis kawayay. 21 Ïdulukunata ama adorayankitsu. Tsaykunaqa imapäpis mana välirmi yanapayäshunkitsu ni salvayäshunkitsu. 22 Ama yarpäyaytsu rey kananpä mañakuyanqaykipita Tayta Dios manana yanapayäshunaykipä kanqanta. Paymi qamkunata awniyäshushqayki munaynincho tsararäyäshunaykipä. Tsay awninqanta cumplirmi imaypis yanapayäshunki.
23 “Tsaymi imaypis qamkunapä Tayta Diosta mañakushä. Qamkunapä mana mañakurqa jutsayuqmi rikakushä. Tsaynöpis pay munanqannö kawayänaykipämi imaypis yätsiyäshayki. 24 Tayta Diospita mantsapakur llapan shonquykikunawan pay munanqannö imaypis kawayay. Llapanchöpis alli kawayänaykipä pay yanapaykäyäshunqaykita ama qonqäyaytsu. 25 Tayta Diosta mana cäsukur jutsata rurayaptikimi itsanqa qamkunata y mandayäshuqniki reytapis ushakätsiyäshunki”.