2 Tsaymi rey Nahas nirqan: “Qamkunawanqa pactuta rurashä llapaykipa derëcha kaq ñawikikunata jipiskirrämi. Tsaynöpami llapan Israel runakunata manakaqman churashä”.

3 Tsaynö niptinmi Jabes mayor runakuna niyarqan: “Qanchis junaqyaq shuyaykayämay ninqaykikunata entëru Israel nacionman willakatsiyanqäyaq. Tsaypita yanapayämänanpä pipis mana shamuptinqa niyanqaykinöchi kanqa”.

4 Tsaynö niyanqanta Nahas awniptinmi willakuqninkunata kachayarqan. Saúl tanqan Gabaa markaman chaykur willakuyaptinmi llakikur llapan waqayarqan. 5 Saúlnami chakrancho arunqanpita törunkuna qatishqa charqan. Runakuna waqaykaqta tarirmi tapurqan: “¿Imanirtä waqaykäyanki?” nir. Tsaynö tapuptinmi Jabes runakuna niyanqanta willayarqan.

6 Willayaptinmi Tayta Diospa Espïritun Saúlta shakyätsirqan mana mantsariypa amonita runakunawan pelyananpä. Tsaymi pasaypa ajarnin 7 ishkay törukunata pishtaskir pedäzu pedäzu roqurqan. Tsaytanami willakuqkunawan entëru Israel nación markakunaman apatsirqan. Tsay markakunaman chaykurmi niyarqan: “Mayqaykikunapis Saúlta y Samuelta pelyashiq mana aywayaptikiqa qamkunapa töruykikunatapis kaynömi pedäzu pedäzu roqunqa”.

Tsaynö niyanqanta wiyarmi Israel runakuna pasaypa mantsarir pelyar yanapayänanpä Bezeccho llapan qorikäyarqan. 8 Bezeccho qorikaq runakunata Saúl yupaptinmi kimsa pachak waranqa (300,000) Israelpita kayarqan y kimsa chunka waranqa (30,000) Judápita kayarqan.^a

9 Tsaypitanami Jabesman kutiyänanpä willakuq aywaqkunata Saúl nirqan: “Jabes runakunata willayay waray manarä pullan junaq kaptin salvanäpä kanqanta”.

Tsay willakuq runakuna kutiykur willakuyaptinmi Jabes runakuna pasaypa kushikuyarqan.

10 Tsaypitanami amonita runakunapa mandaqnin rey Nahasta niyarqan: “Waray junaqmi shäyämushä ñawïkunata jipiyänaykipä”.

11 Tsaymi waraynin junaq soldädunkunata kimsa grüpuman Saúl rakirqan. Patsa manarä waraptinmi tsay kimsa grüpu soldädukuna amonita runakunaman illaqpita yaykuskir pullan junaqyaq wanutsiyarqan. Mana wanutsiyanqan kaq amonita runakunami wakpa kaypa mashtakaypa mashtakar qeshpiyarqan.

12 Tsaynö vinciskirmi Israel runakuna Samuelta niyarqan: “¿Pitä criyirqantsu Saúl mandamaqnintsik rey kananpä kanqanta? Tsay runakuna pï kayanqantapis willayämay wanutsiyänäpä”.

13 Tsaynö niyaptinmi Saúl nirqan: “Kanan junaq Tayta Dios Israel runakunata salvashqa kaykaptinqa manami pipis wanunqatsu”.

14 Tsaypitanami llapan runakunata Samuel nirqan: “Gilgal markaman aku aywashun rey kayninta Saúl qallaykunanpä”.

15 Tsaynö niptinmi llapan runakuna Gilgalman aywayarqan. Alli päsakuy sacrificiuta rupatsirmi Tayta Diospa ñöpancho Saúlta churayarqan rey kananpä. Tsaymi fiestata rurar llapanpis kushikuyarqan.