Rey kananpä Saúlpa umanman aceitita wiñanqan
10
Tsaypitami Saúlpa umanman aceitita pömupita Samuel wiñaparqan. Mutsaykurmi nirqan: “Tayta Diosmi churashushqayki kuyanqan Israel nacionpa mandaqnin rey kanaykipä.a 2 Kaypita kanan aywakurmi Benjamín trïbu runakuna täyanqan lindëruncho kaq Selsaman char ishkay runakunawan tinkunki. Tsayqa Raquel pamparaykanqan kaqchömi kanqa. Paykunami willayäshunki ashiykanqayki ashnuykikunata taytayki tarinqanta. Tsaynöllami willayäshunki taytayki qampä llakikuykanqanta.3 “Tsaypita päsarmi Taborcho encina jachaman chaykur kimsa runakunawan tinkunki. Paykunaqa Tayta Diosta adorayänanpämi Bet-elman aywaykäyanqa. Jukmi apanqa kimsa cabrata, juknami kimsa tantata y jukaqnami vïnu puritsikunan qaracho vïnuta. 4 Paykuna winchikuyäshurniki ishkay tantata qarayäshuptiki chaskikunki.
5 “Tsaypita päsarnami Tayta Diosta adorakuna Gabaa markaman chanki. Tsay markachömi filisteo soldädukunapa cuartelnin kaykan. Tsay markaman yaykuykarmi Tayta Diospa profëtankunawan tinkunki. Paykunaqa shamuykäyanqa jirkancho kaykaq altarcho Tayta Diosta adorayanqanpitami. Puntankunatami runakuna shamuykäyanqa salteriuta, panderëtata, kënata y arpata tukaraykar. Profëtakunanami Tayta Diospa willakuyninta willakuraykar shamuykäyanqa. 6 Tsaychömi Tayta Diospa Espïritun tantiyakuq kanaykipä yanapashuptiki paykunanö Tayta Diospa willakuyninta willakunki. 7 Kay ninqäkuna cumpliptinmi Tayta Dios yanapashunqaykita musyanki. Tsaynö yanapaykäshuptikiqa shumaq yarpachakuskir imatapis ruranki.
8 “Nirkurna Gilgal markaman puntar chämunqäyaq qanchis junaq shuyämanki. Tsaymanmi chämushä rupatsina sacrificiuta y alli päsakuy sacrificiuta rupatsinäpä.† Nirkurnami yätsishayki imata ruranaykipäpis”.
Saúlta Samuel ninqannölla llapanpis päsanqan
9 Samuelpita despidikuskir aywakuykaptinmi Saúlpa yarpayninta Tayta Dios tikratsirqan mas tantiyakuq kananpä. Tsaymi Samuel ninqannölla llapanpis tsay junaq karqan. 10 Tsaypita Gabaa markaman sirviqninwan Saúl charmi profëtakunawan tinkuyarqan. Tsaymi Tayta Diospa Espïritun Saúlta yanapaptin paypis profëtanö willakur qallaykurqan. 11 Profëtakunanö willakunqanta rikarmi reqinakuyanqan runakuna kikinkunapura parlayarqan: “¿Imatä päsashqa Cispa tsurin Saúlta? ¿Paypis Tayta Diospa profëtannaku?”
12 Tsaynö niyaptinmi tsaycho kaykaq juk runa nirqan: “Taytan profëta mana kaptinpis ¿imanirtä tsurinqa profëta kanmantsu?”
Tsay junaqpitami kananyaqpis niyan: “¿Saúlpis Tayta Diospa profëtannaku?”b
13 Willakuyta ushaskirnami Diosta adorakuyänan kaqman Saúl charqan.
14 Wayinman chaykuyaptinmi payta y sirviqninta tiyun tapurqan: “¿Maypatä aywayarqayki?”
Tsaynö tapuptinmi Saúl nirqan: “Ashnükunata ashiqmi aywayarqä. Maychöpis mana tarirmi Samuel kaqman tapukuyänäpä chäyarqä”.
15 Tsaymi Saúlpa tiyun nirqan: “Samuel imata nishunqaykitapis willamay”.
16 Tsaynö tapuptinpis Saúlqa rey kananpä Samuel ninqankunata manami willarqantsu. Tsaypa trokinqa willarqan ashnukunata mayna tariyanqanta ninqallantami.
Rey kananpä Saúlta churayanqan
17 Tsaypitanami Israel runakunata Mizpa markaman Samuel qayatsimurqan Tayta Diospa ñöpancho qorikäyänanpä. 18 Tsayman qorikäyaptinmi Samuel nirqan: “Tayta Diosmi nin: ‘Egipto runakunapa munaynincho ñakaykäyaptikimi qamkunata noqa jipimurqä. Tsaynöllami wakin nacionpa mandaqnin reykuna munaynincho katsiyäshuptikipis salvashqä. 19 Tsaynö salvaykaptïpis qamkunaqa wasqiyämarmi munayankitsu mandaqniki rey kanäta. Tsaymi mañakayämashqayki noqapa trokï juk runa mandashuqniki rey kananpä’ ”.
Tsaynö nirmi Samuel nirqan: “Kananqa trïbunpa trïbunpa castanpa castanpa qayaylläta Tayta Diospa ñöpanman shäyämuy”.
20 Tsaynö nir Israel trïbukunata Samuel qayaykatsir suertita jitaptinmi Benjamín trïbupä suerti yarqamurqan. 21 Nirkur Benjamín trïbupita llapan castakunata qayaykatsir suertita jitayaptinmi Matri castapä yarqamurqan. Matri castacho suertita jitayaptinmi Cispa tsurin Saúlpä yarqamurqan. Tsaymi Saúlta ashir tariyarqantsu. 22 Mana tarirmi Tayta Diosta yapay mañakurnin tapukuyarqan Saúl maycho kanqantapis musyayänanpä. Tsaymi Tayta Dios willarqan qepikuna kaykanqancho pakaraykanqanta. 23 Tsaymi cörrilla aywar pakaraykanqanpita jipiskamur runakunapa chawpinman pushayarqan. Saúl mas jatun kaptinmi runakunaqa umrunyaqlla chäyarqan. 24 Tsaymi runakunata Samuel nirqan: “Rikaykäyankimi Tayta Dios akranqan runata. Manami mayqan Israel runakunapis paymanqa tinkuntsu”.
Tsaymi runakuna niyarqan: “¡Viva mandamaqnintsik rey!”
25 Tsaynö niyaptinmi runakunata Samuel tantiyatsirqan rey imanö kananpä kanqanta y imata rurananpä kanqantapis. Tsay tantiyatsinqantami juk rölluman qellqaskir Tayta Dioswan Tinkuna Toldu rurinman churarqan. Tsaypitanami runakuna wayinkunapa kutikuyänanpä Samuel nirqan.
26 Saúlpis Gabaacho wayinman kutikuptinmi mas alli chölu kaq runakunata Tayta Dios shakyätsirqan Saúlta compañayänanpä. 27 Tsaymi wakin runakunaqa manakaqman churar niyarqan: “¡Payqa imanötä contrantsikpa munayninpita salvamäshun!”
Tsaynö nirmi Saúlta respitayarqantsu ni qaraytapis apayarqantsu. Paykuna tsaynö rurayaptinpis Saúlqa manami cäsuparqantsu.